കഴിഞ്ഞ ദിവസമായിരുന്നു നടി രശ്മിക മന്ദാനയുടെ എഐ ഡീപ്പ് ഫേക്ക് വീഡിയോ സോഷ്യല്‍ മീഡിയയില്‍ പ്രചരിക്കാന്‍ തുടങ്ങിയത്. ഇത് ഏറെ വിവാദമായിരുന്നു. ഇപ്പോഴിതാ രശ്മികയുടേത് മാത്രമല്ല അലിയ ഭട്ട്, കിയാറ അദ്വാനി, ദീപിക പദുക്കോണ്‍ എന്നീ ബോളിവുഡ് നടിമാരുടെ വ്യാജ വീഡിയോകളും ഇപ്പോള്‍ എക്‌സില്‍ പ്രചരിക്കുകയാണ്. ഒരു സമൂഹമെന്ന നിലയില്‍ ഇത്തരം സംഭവങ്ങളെ നേരിടണമെന്നാണ് രശ്മികയുടെ പ്രതികരണം.
ഒറ്റനോട്ടത്തില്‍ രശ്മിക തന്നെയെന്ന് തോന്നും, പക്ഷേ രശ്മികയല്ല. സാറ പട്ടേല്‍ എന്ന ബ്രിട്ടിഷ് ഇന്ത്യന്‍ ഇന്‍ഫ്‌ലുവന്‍സര്‍ ഒക്ടോബര്‍ 9ന് ഇന്‍സ്റ്റഗ്രാമില്‍ പോസ്റ്റ് ചെയ്ത വീഡിയോ ആണ് ഒറിജിനല്‍. സാറയുടെ തലമാറ്റി രശ്മികയുടേതാക്കി മാറ്റിയാണ് പ്രചരിപ്പിച്ചത്. വ്യാജ വീഡിയോ വേദനിപ്പിച്ചുവെന്നും ഭയപ്പെടുത്തിയെന്നുമാണ് രശ്മികയുടെ പ്രതികരണം. കൂടുതല്‍പ്പേര്‍ ഇരയാകുന്നതിന് മുമ്പ് ഒരു സമൂഹമെന്ന നിലയില്‍ പ്രശ്‌നത്തെ നേരിടണമെന്നും നടി ആവശ്യപ്പെട്ടു.
കേന്ദ്ര സൈബര്‍ സുരക്ഷ സംഘത്തെ അടക്കം ടാഗ് ചെയ്താണ് നടിയുടെ പോസ്റ്റ്. ഡീപ്പ് ഫേക്കുകള്‍ അപകടരമാണെന്ന് പ്രതികരിച്ച കേന്ദ്ര മന്ത്രി രാജീവ് ചന്ദ്രശേഖര്‍, സാമൂഹിക മാധ്യമങ്ങളില്‍ പോസ്റ്റ് ചെയ്യപ്പെടുന്ന ഉള്ളടക്കത്തിന്റെ കാര്യത്തില്‍ സോഷ്യല്‍ മീഡിയ കമ്പനികള്‍ക്ക് ഉത്തരവാദിത്വമുണ്ടെന്നും ഓര്‍മ്മപ്പെടുത്തി. ഡീപ്പ് ഫേക്ക് സാങ്കേതിക വിദ്യ പുതിയ സംഭവമല്ലെങ്കിലും എഐ ടൂളുകളുടെ കടന്ന് വരവ് മുഖം മാറ്റല്‍ എളുപ്പമാക്കി.
ഒറ്റ ചിത്രം മതി ഏത് വീഡിയോയിലും നിങ്ങളുടെ മുഖം വരുത്താം, ചിത്രങ്ങളുടെ എണ്ണം കൂടിയാല്‍ വ്യാജന്റെ ഒറിജിനാലിറ്റിയും കൂടും. സാമാന്യം കമ്പ്യൂട്ടര്‍ ഉപയോഗിക്കാന്‍ അറിയുന്ന ആര്‍ക്കും ഇതൊക്കെ ചെയ്യാന്‍ പറ്റും. മുഖം മാത്രമല്ല, ശബ്ദവും മാറ്റാന്‍ പറ്റുന്ന വെബ്‌സൈറ്റുകളുണ്ട്. നിലവിലെ വീഡിയോയില്‍ തലമാറ്റിയൊട്ടിക്കുന്നതിനപ്പുറം, എഴുതി നല്‍കുന്ന നിര്‍ദ്ദേശത്തിന് അനുസരിച്ച് വീഡിയോ നിര്‍മ്മിച്ച് നല്‍കുന്ന സംവിധാനങ്ങള്‍ വേറെയുമുണ്ട്.
പ്രശസ്ത നടികളുടെ മുഖം വച്ച് പോണ്‍ വീഡിയോകള്‍ നിര്‍മ്മിച്ച് പ്രചരിപ്പിക്കുന്ന സംഘം എക്‌സില്‍ സജീവമാണ്. ഇത്തരക്കാരെ നിയന്ത്രിക്കാന്‍ കാര്യമായ ശ്രമങ്ങളൊന്നും ഇലോണ്‍ മസ്‌കിന്റെ നിയന്ത്രണത്തിലുള്ള പഴയ ട്വിറ്ററിന്റെ ഭാഗത്ത് നിന്നുണ്ടായിട്ടില്ല. പ്രമുഖ ബോളിവുഡ് നടിമാരുടെ ഡീപ്പ് ഫേക്ക് വീഡിയോകള്‍ ഷെയര്‍ ചെയ്യുന്ന ഒരു അക്കൗണ്ടിലെ വീ!ഡിയോകള്‍ക്ക് പതിനായിരത്തിലധികം കാഴ്ചക്കാരുണ്ട്.
ഇത്തരം ഡസന്‍ കണക്കിന് അക്കൗണ്ടുകള്‍ ട്വിറ്ററില്‍ ഒരു നിയമത്തെയും കൂസാതെ സ്വൈര്യ വിഹാരം നടത്തുന്നു. എഐ ഡീപ്പ് ഫേക്ക് നിര്‍മ്മാണ വെബ്‌സൈറ്റുകളെ ട്രാക്ക് ചെയ്യാനും നിയന്ത്രിക്കാനും ഫലപ്രദമായ സംവിധാനമുണ്ടാക്കാന്‍ ഒരു രാജ്യത്തിനും, ടെക് കന്പനിക്കും ഇത് വരെ സാധിച്ചിട്ടുമില്ല. ആഗോള തലത്തില്‍ തന്നെ എഐ ജനറേറ്റഡ് വ്യാജ ഉള്ളടക്കത്തെ നിയന്ത്രിക്കാന്‍ പുതിയ മാര്‍ഗനിര്‍ദ്ദേശങ്ങള്‍ വേണമെന്ന ആവശ്യം ശക്തമാകുകയാണ്.
