ഇവിടെ ഷൂട്ടിംഗ് തന്നെയാണോ നടക്കുന്നത്?.., ആ രീതികളോട് ഒത്തുപോകാന്‍ സാധിക്കാത്തതിനാല്‍ താന്‍ മതിയാക്കി ഇനി അഭിനയിക്കുന്നില്ലെന്ന് പറഞ്ഞ് കരഞ്ഞ് ഇറങ്ങി പോകാന്‍ തുടങ്ങി; തുറന്ന് പറഞ്ഞ് രണ്‍വീര്‍ സിംഗ്

ദീപിക പദുക്കോണും രണ്‍വീര്‍ സിംഗും പ്രിയങ്ക ചോപ്രയും മത്സരിച്ച് അഭിനയിച്ച ചിത്രമാണ് ബാജിറാവു മസ്താനി. എന്നാല്‍ രണ്ടു ദിവസം കൊണ്ടു തന്നെ ഈ സഞ്ജയ് ലീല ബന്‍സാലി ചിത്രം പ്രിയങ്ക ചോപ്ര ഉപേക്ഷിക്കാന്‍ ഒരുങ്ങിയരുന്നതായുള്ള റിപ്പോര്‍ട്ടുകളാണ് പുറത്തു വരുന്നത്. ഒരു അഭിമുഖത്തില്‍ രണ്‍വീര്‍ സിംഗ് ആണ് ഇക്കാര്യം തുറന്നു പറഞ്ഞത്.

ആദ്യമായി സഞ്ജയ് ലീല ബന്‍സാലി ചിത്രത്തില്‍ അഭിനയിക്കാന്‍ എത്തിയതായിരുന്നു പ്രിയങ്ക. എന്നാല്‍ അദ്ദേഹത്തിന്റെ സംവിധാന രീതികളെ കുറിച്ചൊന്നും പ്രിയങ്കയ്ക്ക് അറിയുമായിരുന്നില്ല. എല്ലാ സംവിധായകരേയും പോലെയല്ല സഞ്ജയ് ലീല ബന്‍സാലി സിനിമകളെ സമീപിക്കുന്നതും സംവിധാനം ചെയ്യുന്നതും, പ്രിയങ്കയ്ക്ക് അതെല്ലാം ഉള്‍ക്കൊള്ളാന്‍ ബുദ്ധിമുട്ടായിരുന്നു.

ഇവിടെ ഷൂട്ടിംഗ് തന്നെയാണോ നടക്കുന്നത്? ഒമ്പത് മണിയായിട്ടും ഒരു സിംഗിള്‍ ഷോട്ട് പോലും നമ്മള്‍ ചിത്രീകരിക്കാത്തത് എന്താണ് എന്നെല്ലാം പ്രിയങ്ക സെറ്റില്‍ പലരോടും ചോദിക്കുമായിരുന്നു. മൂന്നാമത്തെ ദിവസമായിട്ടും ബന്‍സാലി രീതികളോട് ഒത്തുപോകാന്‍ സാധിക്കാത്തതിനാല്‍ താന്‍ മതിയാക്കി ഇനി അഭിനയിക്കുന്നില്ലെന്ന് പറഞ്ഞ് കരഞ്ഞ് ഇറങ്ങി പോകാന്‍ തുടങ്ങി എന്നാണ് രണ്‍വീര്‍ പറയുന്നത്.

2015 ഡിസംബര്‍ 18ന് പുറത്തിറങ്ങിയ സിനിമയാണ് ബാജിറാവോ മസ്താനി. പ്രിയങ്ക ചോപ്ര ഇതിന് മുമ്പ് ബന്‍സാലി സംവിധാനം ചെയ്ത രാം ലീലയില്‍ അഭിനയിച്ചിരുന്നു. രാം ചാഹേ ലീല ചാഹേ എന്ന ഡാന്‍സ് നമ്പറില്‍ മാത്രമായിരുന്നു താരം പ്രത്യക്ഷപ്പെട്ടത്. ആദ്യമായി ബന്‍സാലി ചിത്രത്തില്‍ മുഴുനീള കഥാപാത്രത്തെ അവതരിപ്പിച്ചത് ബാജിറാവോ മസ്താനിയിലാണ്.