മുഖം കാണിക്കാതെ താരം; പാരിജാതത്തിലെ രസ്നയുടെ പുതിയ വിശേഷം !

രസ്നയെ അറിയാത്ത മലയാള ടെലിവിഷൻ പ്രേക്ഷകർ ഉണ്ടാകില്ല. ഏഷ്യനെറ്റ് സംപ്രേക്ഷണം ചെയ്ത പാരിജാതം എന്ന പരമ്പരയിലൂടെ പ്രേക്ഷകരുടെ പ്രിയങ്കരിയായി മാറിയ താരമാണ് രസ്ന. ആറാം ക്‌ളാസ് മുതൽ അഭിനയ രംഗത്ത് എത്തിയ രസ്ന മലയാളി വീട്ടമ്മമാരുടെ സ്വന്തം നായിക ആണ്. പത്താം ക്ലാസ് വിദ്യാർത്ഥിനി ആയിരിക്കുമ്പോഴാണ് താരം മലയാള ടെലിവിഷൻ ആസ്വാദകരുടെ സ്വീകരണ മുറിയിൽ ഒരേ സമയം സീമയായും അരുണയായും അങ്ങനെ പടർന്ന് പന്തലിച്ചത്.

ഒരേ സമയം വ്യത്യസ്ത സ്വഭാവമുള്ള കഥാപാത്രങ്ങളെ ഡബിൾ റോളിൽ അവതരിപ്പിക്കാൻ അന്ന് രസ്ന കാണിച്ച മിടുക്ക് പിന്നീട് ഒരുപാട് സീരിയലുകളിൽ നായിക പ്രാധാന്യമുള്ള കഥാപാത്രങ്ങളായും, നായികയായും രസ്നയെ കൊണ്ട് ചെന്നെത്തിച്ചു.മലയാളത്തിന് പുറമെ തമിഴ്, കന്നട ഭാഷകളിലും താരം തിളങ്ങി

സീരിയൽ രംഗത്ത് തിളങ്ങി നിൽക്കുമ്പോഴാണ് പെട്ടെന്ന് രസ്ന അപ്രത്യക്ഷമാകുന്നത്. പിന്നീട് വിവാഹം കഴിഞ്ഞുവെന്നുള്ള വാർത്തയാണ് രസ്നയെ കുറിച്ച് കേൾക്കുന്നത്. ഇപ്പോൾ സന്തോഷകരമായ കുടുംബജീവിതം നയിക്കുകയാണ് നടി.

രസ്നയെ പോലെ സഹോദരി നീനുവും മിനിസ്ക്രീനിൽ ചുവട് വെച്ചിട്ടുണ്ട്. സീ കേരളം സംപ്രേക്ഷണം ചെയ്ത സത്യ എന്ന പെൺകുട്ടിയിലൂടെ മെർഷീന എന്ന നീനുവും പ്രേക്ഷകരുടെ പ്രിയങ്കരിയായിട്ടുണ്ട്. സീ കേരളം ചാനലിന്റെ തുടക്കത്തിൽ സംപ്രേക്ഷണം ആരംഭിച്ച പരമ്പര ഈ അടുത്ത കാലത്താണ് അവസാനിച്ചത്. ചേച്ചിയെ പോലെ അനിയത്തിയേയും ഇരു കൈകളും നീട്ടി സ്വീകരിക്കുകയായിരുന്നു പ്രേക്ഷകർ.

ഇപ്പോൾ സോഷ്യൽ മീഡിയയിൽ വൈറലാകുന്നത് നീനുവിന്റെ ഇൻസ്റ്റഗ്രാം പോസ്റ്റാണ്. വീട്ടിലെ പുതിയ സന്തോഷമാണ് നീനു പ്രേക്ഷകരുമായി പങ്കുവെച്ചിരിക്കുന്നത്. രസ്നയുടെ രണ്ടാമത്തെ മകൻ വിഘ്നേഷിന്റെ പിറന്നാൾ ചിത്രമാണ് നീനു പ്രേക്ഷകർക്കായി പങ്കുവെച്ചിരിക്കുന്നത്.

എന്റെ കുഞ്ഞ് ചെക്കന് രണ്ട് വയസ് പൂർത്തിയായിരിക്കുകയാണ്. ഇപ്പോൾ ഇവന്റെ ചിത്രങ്ങൾ പങ്കുവെയ്ക്കാൻ അനുമതി ലഭിച്ചത് വലിയ കാര്യമാണ് എന്ന് കുറിച്ചു കൊണ്ടാണ് വിഘ്നേഷിനോടൊപ്പമുള്ള ചിത്രം പങ്കുവെച്ചിരിക്കുന്നത്. അതേസമയം കുഞ്ഞന്റെ മുഖം വെളിപ്പെടുത്തിയിട്ടില്ല. നീനുവിന്റെ തോളിൽ കിടക്കുന്ന കുട്ടിയുടെ ചിത്രമാണ് പങ്കുവെച്ചിരിക്കുന്നത്. ആരാധകരും കുഞ്ഞ് വിഘ്നേഷിന് പിറന്നാൾ ആശംസ നേർന്നിട്ടുണ്ട്.

ഇനി അഭിനയത്തിലേയ്ക്ക് മടങ്ങി വരില്ലെന്ന് മുൻപ് ഒരു അഭിമുഖത്തിൽ പറഞ്ഞിരുന്നു.മക്കൾ രണ്ടുപേരുടെയും കാര്യം ഞാൻ തന്നെ നോക്കണം. അല്ലാതെ ഒന്നും ശരിയാകില്ല. ഭർത്താവ് ജോലി തിരക്കുകളിൽ ആണ്. അപ്പോൾ അദ്ദേഹത്തിനും ഒരു പിന്തുണയുടെ ആവശ്യം ഉണ്ടെന്നും നടി പറഞ്ഞിരുന്നു. അഭിനയത്തിനെക്കാളും കുടുംബത്തിന് ആണ് പ്രധാന്യം കൊടുക്കുന്നതെന്നും നടി അഭിമുഖത്തിൽ വെളിപ്പെടുത്തിയിരുന്നു.

about rasna