വളരെ മര്യാദ ഉള്ള ഒരു വ്യക്തിയായിരുന്നു, നല്ല ഒരു നടിയായിരുന്നു, ദൈവം വിളിച്ചപ്പോള്‍ അവര്‍ പോയി; ചിത്രയുടെ നിര്യാണത്തില്‍ അനുശോചിച്ച് ഇന്നസെന്റ്

നടി ചിത്രയുടെ നിര്യാണത്തില്‍ അനുശോചിച്ച് ഇന്നസെന്റ്. ചിത്രയുടെ മരണവാര്‍ത്ത കേട്ട് താന്‍ ഞെട്ടിപ്പോയി എന്ന് അദ്ദേഹം പറഞ്ഞു. വളരെ നല്ല ഒരു വ്യക്തിത്വത്തിന് ഉടമയായിരുന്നു എന്നും ഈ മരണം മലയാള സിനിമയുടെ നഷ്ടമാണെന്നും അദ്ദേഹം പറഞ്ഞു. ദേവാസുരം, അമരം, മിസ്റ്റര്‍ ബട്‌ളര്‍ തുടങ്ങി നിരവധി സിനിമകളില്‍ ചിത്ര മികച്ച പ്രകടനം കാഴ്ചവെച്ചു.

വളരെ മര്യാദ ഉള്ള ഒരു വ്യക്തിയായിരുന്നു ചിത്ര. നല്ല ഒരു നടി തന്നെയായിരുന്നു. അവര്‍ വളരെ സൂക്ഷിച്ചു ജീവിക്കുന്ന ആളാണ്. എന്നാല്‍ ദൈവം വിളിച്ചപ്പോള്‍ അവര്‍ പോയി. മലയാള സിനിമയ്ക്ക് നഷ്ടം എന്നേ പറയാന്‍ സാധിക്കൂ. വ്യക്തിപരമായി അത്ര ഓര്‍മ്മകള്‍ ഒന്നും തന്നെ ഇല്ല. ദേവാസുരം പോലുള്ള സിനിമകളില്‍ അഭിനയിച്ചിരുന്നു എങ്കിലും ഒന്നിച്ചുള്ള രംഗങ്ങള്‍ ഇല്ലായിരുന്നു. ഇന്നസെന്റ് പറഞ്ഞു.

ഇന്നുപകല്‍ 5.30യോടെ ചെന്നൈയിലെ വസതിയില്‍ വെച്ചായിരുന്നു ചിത്രയുടെ അന്ത്യം. ഹൃദയാഘാതം മൂലമായിരുന്നു മരണം. 56 വയസ്സായിരുന്നു. ഒരു വടക്കന്‍ വീരഗാഥ, ആറാംതമ്പുരാന്‍, അദ്വൈതം തുടങ്ങി നിരവധി മലയാള ചിത്രങ്ങളില്‍ ശ്രദ്ധേയമായ വേഷങ്ങള്‍ ചെയ്തിട്ടുണ്ട്.