‘ഞാൻ എന്തു ചെയ്യുന്നുവെന്ന് ഓർത്ത് നിങ്ങൾ ആശങ്കപ്പെടേണ്ട കാര്യമില്ല; വിമർശകർക്ക് അതേ നാണയത്തിൽ മറുപടിയുമായി അനശ്വര രാജൻ

ഉദാഹരണം സുജാതയിലൂടെ ബാലതാരമായി സിനിമയിലേക്ക് തുടക്കം കുറിച്ച താരമാണ് അനശ്വര രാജൻ. പിന്നീട് തണ്ണീർമത്തൻ ദിനങ്ങളിലൂടെ നായികയായി പ്രേക്ഷക ശ്രദ്ധ നേടിയെടുക്കുകയായിരുന്നു. കുറച്ച് ദിവസമായി സോഷ്യൽമീഡിയയിൽ തകർത്തോടുകയാണ് അനശ്വര രാജന്റെ ചിത്രങ്ങൾ. 18ആം പിറന്നാൾ ആഘോഷിച്ചതിനു പിന്നാലെ തൻ്റെ ഇൻസ്റ്റഗ്രാം അക്കൗണ്ടിൽ പോസ്റ്റ് ചെയ്ത ചിത്രത്തിനു ലഭിച്ച സദാചാര കമൻ്റുകൾക്ക് ഇതാ തക്ക മറുപടിയുമായി രംഗത്തെത്തിയിരിക്കുകയാണ് താരം.

വസ്ത്രത്തിൻ്റെ ഇറക്കം കുറഞ്ഞെന്ന് ചൂണ്ടിക്കാട്ടിയാണ് കൗമാര താരത്തിനെതിരെ സദാചാര കമൻ്റുകൾ നിറഞ്ഞത്. ഇതിന്, അതേ വസ്ത്രം ധരിച്ച് രണ്ട് ചിത്രങ്ങൾ കൂടി പോസ്റ്റ് ചെയ്താണ് താരം മറുപടി നൽകിയത്. ‘ഞാൻ എന്തു ചെയ്യുന്നുവെന്ന് ഓർത്ത് നിങ്ങൾ ആശങ്കപ്പെടേണ്ട കാര്യമില്ല.

എന്റെ പ്രവൃത്തികൾ നിങ്ങളെഅസ്വസ്ഥരാക്കുന്നതെന്തിനെന്നോർത്ത് നിങ്ങൾ ആശങ്കപ്പെടുക.’– ചിത്രങ്ങൾക്ക് അടിക്കുറിപ്പായി അനശ്വര കുറിച്ചു. മുൻപും താരം സൈബർ ആക്രമണം നേരിട്ടിട്ടുണ്ട്.