ഏകദിനങ്ങളിൽ നിന്നും നേരത്തെ വിരമിച്ചത് ഗുരുതര രോഗമുള്ളതിനാലെന്ന് ഓസീസ് ക്രിക്കറ്റ് താരം: രോഗ കാരണം തിരിച്ചറിയാനാകാതെ ഡോക്ടർമാർ.
ഏകദിനങ്ങളിൽ നിന്നും നേരത്തെ വിരമിച്ചത് ഗുരുതര രോഗമുള്ളതിനാലെന്ന് ഓസീസ് ക്രിക്കറ്റ് താരം: രോഗ കാരണം തിരിച്ചറിയാനാകാതെ ഡോക്ടർമാർ.
മരണം വരെ സംഭവിക്കാവുന്ന ഗുരുതര രോഗവുമായി ഓസീസ് ക്രിക്കറ്റ് താരം. ഓസ്‌ട്രേലിയയുടെ ഓൾറൗണ്ടർ ജോൺ ഹേസ്റ്റിങ്ങ്‌സാണ്‌ ക്രിക്കറ്റ് ലോകത്തെ ഞെട്ടിച്ച വെളിപ്പെടുത്തൽ നടത്തിയത്. ശ്വാസകോശത്തിൽ രക്തസ്രാവമുണ്ടെന്നും ഇത് മാരകമായേക്കാമെന്നും 32 കാരനായ ഹേസ്റ്റിങ്ങ്സ് പറഞ്ഞു. ബൗളറെന്ന നിലയിൽ ക്രിക്കറ്റ് കളിക്കുന്നത്‌ തുടരുകയാണെങ്കിൽ മരണം വരെ സംഭവിക്കുമെന്നും ഓസീസ് താരത്തെ ചികിത്സിച്ച ഡോക്ടർമാർ മുന്നറിയിപ്പ്‌ നൽകിയിട്ടുണ്ട്‌.വിദഗ്ദ്ധ പരിശോധന്യ്ക്ക്‌ വിധേയനായെങ്കിലും രോഗകാരണം കണ്ടു പിടിക്കാൻ കഴിഞ്ഞിട്ടില്ല.
ഇതോടെ ഹേസ്റ്റിങ്ങ്‌സിന്റെ ക്രിക്കറ്റ് കരിയർ തന്നെ ചോദ്യചിഹ്നമായിരിക്കുകയാണ്‌. ബിഗ് ബാഷ്‌ ലീഗിൽ സിഡ്‌നി സിക്‌സേഴ്‌സുമായി കരാറൊപ്പിട്ടിട്ടുണ്ടെങ്കിലും ഹേസ്റ്റിങ്ങ്‌ ഇത്തവണ കളിക്കാനിറങ്ങില്ല.
കഴിഞ്ഞ നാലഞ്ച്‌ മാസമായി എനിക്ക് ഈ അസുഖമുണ്ട്‌. വളരെ പ്രതിസന്ധി നിറഞ്ഞ കാലഘട്ടത്തിലൂടെയാണ് ഞാൻ കടന്നുപോകുന്നത്. ഞാനെപ്പോഴൊക്കെ ബോൾ ചെയ്യാനായി റെഡിയാകുന്നോ അപ്പോഴേക്കും രക്തം ഛർദ്ദിക്കുകയാണ്‌. ഈ വർഷം എനിക്ക് ബൗൾ ചെയ്യാൻ കഴിയില്ലെന്നുറപ്പാണ്‌.
ഈ രോഗാവസ്ഥ മറികടക്കാനായാൽ എനിക്ക് തിരിച്ചുവരാനാകും. പക്ഷേ ഡോക്ടർമാർക്ക്‌ ഒരു തീരുമാനം പറയാനാകുന്നില്ല. ഗ്രൗണ്ടിൽ രക്തം ഛർദ്ദിക്കുന്ന അവസ്ഥയുണ്ടാകില്ലെന്നോ ഇത് മാറാ രോഗമല്ലെന്നോ ഉറപ്പു നൽ കാൻ ഡോക്ടർമാർക്ക്‌ കഴിയുന്നില്ല. ഇതെന്നെ തകർത്തുകളയുന്ന കാര്യമാണ്. എന്നാൽ ഇപ്പോൾ ഞാൻ എന്റെ രോഗവുമായി പൊരുത്തപ്പെട്ടു കഴിഞ്ഞു.
എന്റെ ജീവിതം തന്നെ ക്രിക്കറ്റിനു വേണ്ടിയുള്ളതാണ്‌. ഇനിയും ഒരുപാട് രാജ്യങ്ങളിൽ പോയി എനിക്ക് കളിക്കണം. ഏകദിനത്തിൽ നിന്നും ചതുർദിന ക്രിക്കറ്റിൽ നിന്നും ഞാൻ നേരത്തെ വിരമിച്ചത് ഈ രോഗമുള്ളതിനാലാണ്‌. ഇനി എന്തെങ്കിലും അദ്ഭുതം സംഭവിച്ചാലേ എനിക്ക് വീണ്ടും കളിക്കാനാകൂ.
ഓസീസിനായി 29 ഏകദിനങ്ങളിലും ഒമ്പത്‌ ടി ട്വന്റി മത്സരങ്ങളിലും കളിച്ചിട്ടുള്ള ഹേസ്റ്റിങ്ങ്സ് അടുത്തിടെ ഏകദിനങ്ങളിൽ നിന്നും ചതുർദിന മത്സരങ്ങളിൽ നിന്നും വിരമിച്ചിരുന്നു. സിഡ്‌നി സിക്‌സേഴ്‌സുമായി കരാർ ഒപ്പിടുന്നതിന്‌ മുമ്പ് ബിഗ് ബാഷ്‌ ലീഗിൽ മെൽബൺ സ്റ്റാർസ്റ്റിന്റെ താരമായിരുന്നു ഹേസ്റ്റിങ്ങ്സ്. ഏഴു വർഷമാണ്‌ മെൽബൺ സ്റ്റാർസിൽ താരം കളിച്ചത്‌. ഐ.പി.എല്ലിൽ കൊല്ക്കത്ത നൈറ്റ് റൈഡേഴ്‌സിന്റേയും ചെന്നൈ സൂപ്പർ കിങ്ങ്‌സിന്റേയും താരമായിരുന്നു ഹേസ്റ്റിങ്ങ്സ്
