2 കോടി 15 ലക്ഷം രൂപ നൽകാനുണ്ട്; ആഷിഖ് അബുവിനെതിരെ പ്രൊഡ്യൂസേഴ്സ് അസോസിയേഷന് പരാതി നൽകി നിർമാതാവ്

സംവിധായകൻ ആഷിഖ് അബുവിനെതിരെ പരാതിയുമായി നിർമാതാവ് സന്തോഷ്‌ ടി കുരുവിള. ഇത് സംബന്ധിച്ച് പ്രൊഡ്യൂസേഴ്സ് അസോസിയേഷന് മുമ്പാകെയാണ് പരാതി നൽകിയത്. ആഷിഖ് അബു 2 കോടി 15 ലക്ഷം രൂപ തനിക്ക് നൽകാൻ ഉണ്ടെന്നാണ് പരാതി. ഡിസ്ട്രിബ്യൂട്ടേഴ്സ് അസോസിയേഷനിലും സന്തോഷ്‌ ടി കുരുവിള പരാതി നൽയിട്ടുണ്ട്.

ചൊവ്വാഴ്ചയാണ് പരാതി നൽകിയത്. ഇതിനെത്തുടർന്ന് ആഷിഖ് അബുവിനോട് നിർമാതാക്കളുടെ സംഘടന വിശദീകരണം തേടി. ആഷിഖ് അബുവിന്റെ വിശദീകരണം വന്ന ശേഷം രണ്ട് പേരെയും ഒരുമിച്ചിരുത്തി വിഷയം ചർച്ച ചെയ്ത് പരിഹരിക്കാനാണ് നിർമാതാക്കളുടെ സംഘടന തീരുമാനിച്ചിരിക്കുന്നത്.

നിലവിൽ നാരദൻ, മഹേഷിന്റെ പ്രതികാരം, മായാനദി എന്നീ മൂന്ന് സിനിമകളെച്ചൊല്ലിയാണ് തർക്കം നിലനിൽക്കുന്നത്. ഇതിന്റെ വിതരണാവകാശം, മ്യൂസിക് റൈറ്റ്സ്, ലാഭവിഹിതം അങ്ങനെ പല വിഭാഗങ്ങളിലായി തനിക്ക് പൈസ ലഭിക്കാൻ ഉണ്ടെന്നാണ് സന്തോഷ് ടി കുരുവിളയുടെ പരാതി.

സന്തോഷ് ടി കുരുവിളയുടെ മൂൺഷോട്ട് എൻ്റർടെയ്ൻമെൻ്റ്സ്, ആഷിഖ് അബുവിന്റെ ഒപിഎം സിനിമാസ് ചേർന്നാണ് ഈ മൂന്ന് സിനിമകളും നിർമിച്ചത്. ഇതിൽ മായാനദിയും മഹേഷിന്റെ പ്രതികാരവും ബോക്സ് ഓഫീസിൽ വലിയ നേട്ടമുണ്ടാക്കിയിരുന്നു. പ്രേക്ഷകരിൽ നിന്ന് മികച്ച അഭിപ്രായവും ഈ സിനിമകൾക്ക് ലഭിച്ചിരുന്നു.

2009ൽ ഡാഡി കൂൾ എന്ന ചിത്രത്തിലൂടെ സംവിധാന രംഗത്തേയ്ക്ക് ചുവട് വെച്ച വ്യക്തിയാണ് ആഷിഖ് അബു. തുടർന്ന് സാൾട്ട് ആൻഡ് പെപ്പർ, 22 ഫീമെയിൽ കോട്ടയം, ഡാ തടിയ, അഞ്ചു സുന്ദരികൾ, ഇടുക്കി ഗോൾഡ്, ഗാംഗ്‌സ്റ്റർ, റാണി പദ്മിനി, മായാനദി, വൈറസ്, ആണും പെണ്ണും ആന്തോളജി ഫിലിമിലെ ഒരു ചിത്രം, നീല വെളിച്ചം എന്ന് തുടങ്ങിയ ചിത്രങ്ങളാണ് ആഷിഖ് അബു സംവിധാനം ചെയ്തത്.

മഹേഷിന്റെ പ്രതികാരം പ്രൊഡ്യൂസ് ചെയ്തതും ആഷിഖ് അബുവാണ്. ഇപ്പോൾ പുതിയ സിനിമയായ റൈഫിൾ ക്ലബിന്റെ പണിപ്പുരയിലാണ് ആഷിഖ്. ചിത്രത്തിന്റെ പ്രൊഡ്യൂസറും ഛായാഗ്രഹണവും ആഷിഖ് തന്നെയാണ് നിർവഹിക്കുന്നത്. ചില സിനിമകളിൽ അഭിനയിക്കുകയും ചെയ്തിട്ടുണ്ട് ആഷിഖ്. തീവ്രം, അന്നയും റസൂലും, ഇയ്യോബിന്റെ പുസ്തകം, പറവ തുടങ്ങിയ ചിത്രങ്ങളിലാണ് അഭിനയിച്ചിട്ടുള്ളത്.