‘എന്റെ നേതാവിന് നന്ദി’; നെഞ്ചിൽ ധോണിയുടെ ഓട്ടോഗ്രാഫ് വാങ്ങി വിഘ്‌നേഷ് ശിവൻ

നെഞ്ചിൽ ധോണിയുടെ ഓട്ടോഗ്രാഫ് വാങ്ങി വിഘ്‌നേഷ് ശിവൻ. വിഘ്നേഷ് ധരിച്ച ടി ഷര്‍ട്ടിൽ ധോണി ഒപ്പുവയ്ക്കുന്ന വിഡിയോ താരം തന്നെയാണ് സമൂഹമാധ്യമങ്ങളിൽ പങ്കുവച്ചത്. ‘‘എന്റെ നേതാവിന് നന്ദി’’ എന്നായിരുന്നു വിഡിയോയുടെ അടിക്കുറിപ്പ്. ധോണിയുടെ കൈകളിൽ വിഘ്നേഷ് സ്നേഹ ചുംബനം നൽകുന്നതും വിഡിയോയിൽ കാണാം.

ഇന്ത്യൻ ക്രിക്കറ്റ് താരം എം.എസ്. ധോണിയുടെ കടുത്ത ആരാധകനാണ് വിഘ്നേഷ് ശിവൻ. മുൻപും ധോണി തന്റെ റോൾ മോഡൽ ആണെന്ന് വിഘ്‌നേഷ് പറഞ്ഞിട്ടുണ്ട്. എം.എസ്. ധോണിയുടെ സിനിമാ നിർമാണക്കമ്പനിയായ ധോണി എന്റര്‍ടെയ്ന്മെന്റ്സ് നിർമിക്കുന്ന ആദ്യ സിനിമ ‘എൽജിഎം’ (‘ലെറ്റ്സ് ഗെറ്റ് മാരീഡ്) ട്രെയിലര്‍ ലോഞ്ചിനിടെയായിരുന്നു ഈ മനോഹര നിമിഷം അരങ്ങേറിയത്. ധോണിയുടെ ഭാര്യ സാക്ഷി സിങ് റാവത്താണ് പ്രൊഡക്‌ഷൻ കമ്പനിയുടെ മാനേജിങ് ഡയറക്ടർ. ഇവരുടെ ആദ്യ നിർമാണ സംരംഭം കൂടിയാണിത്.

ഹരീഷ് കല്യാൺ, ഇവാന (അലീന ഷാജി) എന്നിവർ ഒന്നിക്കുന്ന ചിത്രം രമേഷ് തമിൽമണി സംവിധാനം ചെയ്യുന്നു. ഛായാഗ്രഹം വിശ്വജിത് ഒടുക്കത്തിൽ, സംഗീതം രമേഷ് തമിൽമണി.