‘വേണമെങ്കില്‍ എനിക്ക് തിരിച്ച് പോയി ഒരു ചായക്കട തുറക്കാം, പക്ഷെ രാജ്യം ഇനിയും ദുരിതം അനുഭവിക്കരുത്’; മോദിയുടെ ട്വീറ്റ് കുത്തിപ്പൊക്കി സിദ്ധാര്‍ത്ഥ്

ബിജെപി സര്‍ക്കാര്‍ ഭരണത്തില്‍ വരുന്നതിന് മുമ്പുള്ള പ്രധാനമന്ത്രി നരേന്ദ്രമോദിയുടെ ട്വീറ്റ് കുത്തിപ്പൊക്കി നടന്‍ സിദ്ധാര്‍ഥ്. തനിക്ക് വേണമെങ്കില്‍ തിരിച്ച് പോയി ഒരു ചായക്കട തുറക്കാം.

പക്ഷെ രാജ്യം ഇനിയും ദുരിതം അനുഭവിക്കരുത് എന്ന് പറയുന്ന ട്വീറ്റാണ് സിദ്ധാര്‍ഥ് കുത്തിപ്പൊക്കിയത്. 2014 ഏപ്രില്‍ 29ന് മോദി കുറിച്ച വാക്കുകള്‍ വിശ്വസിക്കാന്‍ കഴിയുമോ എന്നാണ് താരം ചോദിക്കുന്നത്.

”ഇന്ത്യക്ക് ശക്തമായൊരു സര്‍ക്കാരിനെ വേണം. മോദി എന്ന വ്യക്തിയിലല്ല കാര്യം. എനിക്ക് തിരിച്ച് പോയി ഒരു ചായക്കട വേണമെങ്കില്‍ തുറക്കാം. പക്ഷെ രാജ്യം ഇനിയും ദുരിതം അനുഭവിക്കരുത്” എന്നാണ് മോദിയുടെ ട്വീറ്റ്.

”ഈ ട്വീറ്റില്‍ ഇയാള്‍ പറയുന്ന എല്ലാ കാര്യങ്ങളോടും ഞാന്‍ യോജിക്കുന്നു. നിങ്ങള്‍ക്ക് വിശ്വസിക്കാന്‍ കഴിയുമോ അത്?” എന്നാണ് മോദിയുടെ ട്വീറ്റ് റീട്വീറ്റ് ചെയ്തു കൊണ്ട് സിദ്ധാര്‍ഥ് കുറിച്ചിരിക്കുന്നത്.

രാജ്യത്ത് കൊവിഡ് പ്രതിസന്ധി രൂക്ഷമാകുന്ന പശ്ചാത്തലത്തില്‍ കഴിഞ്ഞ ദിവസങ്ങളിലും പ്രധാനമന്ത്രിയെയും സര്‍ക്കാരിനെയും വിമര്‍ശിച്ച് സിദ്ധാര്‍ഥ് ട്വീറ്റ് ചെയ്തിരുന്നു. ബിജെപി അധികാരത്തില്‍ നിന്ന് പുറത്താകുന്ന ദിവസം രാജ്യം യഥാര്‍ത്ഥത്തില്‍ വാക്സിനേറ്റഡ് ആകുമെന്നാണ് സിദ്ധാര്‍ഥ് കഴിഞ്ഞ ദിവസം പറഞ്ഞത്.