മുറി ഒഴിയാൻ തയ്യാറായില്ല, വിദേശ വനിതയോട് മോശമായി പെരുമാറി, ഹോട്ടൽ ജീവനക്കാരുമായുള്ള തർക്കത്തെ തുടർന്ന് നടൻ വിനായകൻ പോലീസ് കസ്റ്റഡിയിൽ

നടൻ വിനായകൻ പോലീസ് കസ്റ്റഡിയിൽ. ഹോട്ടലിൽ മദ്യപിച്ച് ബഹളമുണ്ടാക്കിയതിനെത്തുടർന്ന് ആണ് നടനെ കസ്റ്റഡിയിലെടുത്തിരിക്കുന്നത്. കൊല്ലത്തെ ഒരു പഞ്ചനക്ഷത്ര ഹോട്ടലിൽവെച്ചാണ് സംഭവം. സിനിമാ ഷൂട്ടിങ്ങുമായി ബന്ധപ്പെട്ടാണ് കൊല്ലം അഞ്ചാലുംമൂടുള്ള പഞ്ചനക്ഷത്ര ഹോട്ടലിൽ വിനായകനെത്തിയത്.

കഴിഞ്ഞ കുറച്ചുദിവസമായി വിനായകൻ, ജയസൂര്യ തുടങ്ങിയ നടന്മാരുൾപ്പടെയുള്ളവർ ഇവിടെയാണ് താമസിച്ചിരുന്നത്. ഷൂട്ടിങ്ങ് കഴിഞ്ഞ് മറ്റു അഭിനേതാക്കൾ ഹോട്ടൽ റൂം ഒഴിഞ്ഞു കൊടുത്തിട്ടും വിനായകൻ ഒഴിയാൻ തയ്യാറായില്ല. തുടർന്ന് ഹോട്ടൽ ജീവനക്കാരുമായി തർക്കമുണ്ടാവുകയായിരുന്നു.

മാത്രമല്ല, മദ്യപിച്ച് ലക്ക് കെട്ട നടൻ വിദേശ വനിതയോട് മോശമായി പെരുമാറിയെന്നും റിപ്പോർട്ടുകൾ പുറത്തെത്തുന്നുണ്ട്. തുടർന്ന് പോലീസെത്തി വിനായകനെ വൈദ്യപരിശോധനയ്ക്ക് വിധേയനാക്കിയ ശേഷം പോലീസ് സ്റ്റേഷനിലേയ്ക്ക് കൊണ്ടു വന്നു. അഞ്ചാലുംമൂട് സ്റ്റേഷനിലേയ്ക്ക് ആണ് നടനെ കൊണ്ടുവന്നത്. പിന്നാലെ താരം പോലീസ് സ്റ്റേഷന് അകത്തുവെച്ചും ബഹളമുണ്ടാക്കി.

ഇതിന്റെ വീഡിയോ ഇപ്പോൾ സോഷ്യൽ മീഡിയയിൽ വൈറലായികൊണ്ടിരിക്കുകയാണ്. തന്നെ എന്തിനാണ് സ്റ്റേഷനിൽ പിടിച്ചുവെച്ചിരിക്കുന്നതെന്നാണ് വിനായകൻ ചോദിക്കുന്നത്. കൂടാതെ വിനായകന്റെ മാനേജരും സംഘവും മാധ്യമ പ്രവർത്തകരുമായി സംഘർഷമുണ്ടാക്കുകയും ചെയ്തു.

മുമ്പും സമാന കേസിൽ വിനായകനെ പൊലീസ് അറസ്റ്റ് ചെയ്തിരുന്നു. എറണാകുളം നോർത്ത് പൊലീസ് സ്റ്റേഷനിൽ ബഹളം വച്ചതിനെ തുടർന്നായിരുന്നു വിനായകനെ അറസ്റ്റ് ചെയ്തത്. തുടർന്ന് ജാമ‍്യത്തിൽ വിട്ടയക്കുകയായിരുന്നു. അന്ന് വിനായകൻ ലഹരി ഉപയോഗിച്ചാണ് പ്രശ്നങ്ങൾ ഉണ്ടാക്കിയതെന്നായിരുന്നു പൊലീസിൻറെ ആരോപണം.