‘മുറിവുകളും കഠിനാധ്വാനവും നിറഞ്ഞ ഒരു നീണ്ട യാത്രയുടെ സന്തോഷകരമായ അന്ത്യം’; പൃഥ്വിരാജ് ചിത്രത്തിലെ അനുഭവങ്ങള്‍ പങ്കുവെച്ച് സാഗര്‍ സൂര്യ

പൃഥ്വിരാജ്-ഷാജി കൈലാസ് കൂട്ടിക്കെട്ടില്‍ പുറത്തെത്തിയ ചിത്രമായിരുന്നു ‘കാപ്പ’. സമ്മിശ്ര പ്രതികരണങ്ങളാണ് ചിത്രത്തിന് ലഭിക്കുന്നത്. ‘തട്ടീം മുട്ടീം’ എന്ന ടെലിവിഷന്‍ പരമ്പരയിലൂടെ ശ്രദ്ധ നേടി വെള്ളിത്തിരയിലും അരങ്ങേറ്റം കുറിച്ച നടന്‍ സാഗര്‍ സൂര്യയും ചിത്ത്രതില്‍ ഒരു പ്രധാന വേഷത്തില്‍ എത്തുന്നുണ്ട്.

സിനിമയില്‍ വെട്ടുകൊണ്ട് വീഴുന്ന രംഗമുണ്ട് സാഗറിന്. എല്ലാം മേക്കപ്പും വച്ചുകെട്ടും മാത്രമല്ല എന്നതിന് ഉദാഹരണമാണ് ഇപ്പോള്‍ സാഗര്‍ തന്റെ കഥാപാത്രത്തെ കുറിച്ച് പറയുന്ന വാക്കുകള്‍. വീണ്ടുമൊരു പൃഥ്വിരാജ് ചിത്രത്തില്‍ അഭിനയിച്ചപ്പോഴുള്ള കഠിനാധ്വാനവും ബുദ്ധിമുട്ടുകളുമാണ് സാഗര്‍ പങ്കുവച്ചിരിക്കുന്നത്.

മുതുകില്‍ ചുവന്നു തടിച്ച പാടുകളും കൈ ചുവന്നു നീരുവച്ചതുമായ ചിത്രങ്ങളാണ് നടന്‍ പോസ്റ്റ് ചെയ്തത്. തലയ്ക്ക് ചുറ്റും കെട്ടുമായി ഇരിക്കുന്ന വീഡിയോയും താരം പങ്കുവച്ചിട്ടുണ്ട്.

‘മുറിവുകളും കഠിനാധ്വാനവും നിറഞ്ഞ ഒരു നീണ്ട യാത്രയുടെ സന്തോഷകരമായ അന്ത്യമാണ് ഈ ചിത്രങ്ങള്‍. ഭാവി സംരംഭങ്ങളില്‍ ഏര്‍പ്പെടാന്‍ എനിക്ക് ഉപകാരപ്പെടുന്ന ഒരുപാട് അനുഭവങ്ങള്‍ ഇതില്‍ നിന്നുമുണ്ടായി. കാപ്പ സിനിമയുടെ ഭാഗമാകാനും ഈ സംഘത്തോടൊപ്പം പ്രവര്‍ത്തിക്കാനും സാധിച്ചത് ശരിക്കും ഒരു അനുഗ്രഹമായിരുന്നു.’

‘എന്നെ വിശ്വസിച്ച് ബിജുവിനെ ഏല്‍പ്പിച്ച പൃഥ്വിരാജിനും ഷാജി കൈലാസിനും നന്ദി. ഇതില്‍ അഭിമാനവും സന്തോഷവും തോന്നുന്നു’ എന്നാണ് സാഗര്‍ ചിത്രങ്ങള്‍ക്കൊപ്പം കുറിച്ചിരിക്കുന്നത്. ‘കടുവ’യ്ക്ക് ശേഷം പൃഥ്വിരാജും ഷാജി കൈലാസും ഒന്നിച്ച സിനിമയാണ് കാപ്പ. തിരുവനന്തപുരത്തെ ഗുണ്ടാപ്പകയാണ് ചിത്രത്തിനാധാരം.