ബിജെപി വളരുന്നു; ചിലയിടത്ത് ഒരു വോട്ടിനാണ് സ്ഥാനാര്‍ഥികള്‍ തോറ്റുപോയത്; നമ്മള്‍ ഒപ്പമെത്തി കഴിഞ്ഞു

രാഷ്ട്രീയത്തിൽ വ്യക്തമായ കാഴ്ചപ്പാടുള്ള നടനാണ് കൃഷ്ണകുമാർ. തനിക്ക് മോദിയെയും എന്‍ഡിഎ സര്‍ക്കാരിനെയുമാണ് താൽപര്യമെന്ന് നടൻ തുറന്ന്പറഞ്ഞ് രംഗത്ത് എത്തിയിരുന്നു. തദ്ദേശതിരഞ്ഞെടുപ്പില്‍ തിരുവനന്തപുരത്ത് ബിജെപി സ്ഥാനാര്‍ത്ഥികള്‍ക്കായി വോട്ട് പിടിക്കുന്നതില്‍ മുന്‍പന്തിയില്‍ ആയിരുന്നു നടന്‍. ഇപ്പോള്‍ തെരഞ്ഞെടുപ്പ് ഫല പ്രഖ്യാപനത്തിന് ശേഷം ഒരു മാധ്യമത്തിന് അനുവദിച്ച അഭിമുഖത്തില്‍ കൃഷ്ണകുമാര്‍ പറഞ്ഞ വാക്കുകള്‍ ശ്രദ്ധേയമാവുകയാണ്.]

തദ്ദേശ തിരഞ്ഞെടുപ്പില്‍ ബിജെപിയുടെ തോല്‍വി കണക്കുകളില്‍ മാത്രമാണ്. ‘ഞാന്‍ പറഞ്ഞതില്‍ ഉറച്ചുനില്‍ക്കുന്നു. ഇനി ആരെയെങ്കിലും മോശം പറഞ്ഞെങ്കില്‍ ക്ഷമ ചോദിക്കാനും തയാറാണ്. സുരേഷേട്ടന്‍ സിനിമയിലും രാഷ്ട്രീയത്തിലും തിളങ്ങി നില്‍ക്കുന്ന താരമാണ്. അദ്ദേഹത്തിനൊപ്പം എന്നെയും കൊണ്ടുവന്നത് നേട്ടമായി കാണുന്നു’.

‘കണക്കുകള്‍ എടുത്തുനോക്കുമ്പോള്‍ പരാജയമാണ്. പക്ഷേ ബിജെപി വളരുന്നുണ്ട്. ചിലയിടത്ത് ഒരു വോട്ടിനൊക്കെയാണ് സ്ഥാനാര്‍ഥികള്‍ തോറ്റുപോയത്. നമ്മള്‍ ഒപ്പമെത്തി കഴിഞ്ഞു എന്നതാണ് ഇതില്‍ നിന്നും മനസിലാക്കേണ്ടത്. കോര്‍പറേഷനില്‍ നമ്മള്‍ പ്രതിപക്ഷമാകുന്നു. ബിജെപി മുന്നേറിക്കൊണ്ടിരിക്കുകയാണ്. പിന്നില്‍ നിന്നാണ് ബിജെപി ഓടാന്‍ തുടങ്ങിയത്. ഇന്ന് ഒരു മുന്നണി തളര്‍ന്ന് പുറകോട്ടുപോയി കഴിഞ്ഞു. തോല്‍വി കണക്കില്‍ മാത്രം. ഉള്ളില്‍ സന്തോഷമാണ്.’-കൃഷ്ണകുമാര്‍ പറഞ്ഞു