Malayalam
അമ്മയാകലും കുട്ടികളെ വളര്ത്തലുമല്ല എന്റെ വഴി, അങ്ങനെ ജീവിക്കുന്ന ഒരുപാടുപേര് എനിക്ക് ചുറ്റുമുണ്ട്; അമ്മ വേഷങ്ങള് അവതരിപ്പിക്കാന് ബുദ്ധിമുട്ടില്ലെന്ന് ലക്ഷ്മി ഗോപാലസ്വാമി
അമ്മയാകലും കുട്ടികളെ വളര്ത്തലുമല്ല എന്റെ വഴി, അങ്ങനെ ജീവിക്കുന്ന ഒരുപാടുപേര് എനിക്ക് ചുറ്റുമുണ്ട്; അമ്മ വേഷങ്ങള് അവതരിപ്പിക്കാന് ബുദ്ധിമുട്ടില്ലെന്ന് ലക്ഷ്മി ഗോപാലസ്വാമി
അരയന്നങ്ങളുടെ വീട് എന്ന ചിത്രത്തിലൂടെ മമ്മൂട്ടിയുടെ നായികയായി അഭിനയ ലോകത്തേയ്ക്ക് താരമാണ് ലക്ഷ്മി ഗോപാലസ്വാമി. താരത്തിന് നടിയായും നര്ത്തകിയായും പ്രേക്ഷകരുടെ പ്രീതി സമ്പാദിക്കുവാനായി. ആദ്യ സിനിമയിലൂടെ തന്നെ മികച്ച രണ്ടാമത്തെ നടിയ്ക്കുള്ള സംസ്ഥാന ചലച്ചിത്ര പുരസ്കാരം സ്വന്തമാക്കിയ ലക്ഷ്മി പിന്നീടിങ്ങോട്ട് മോഹന്ലാല്, ജയറാം, മമ്മൂട്ടി തുടങ്ങി മുന്നിര നായകന്മാരുടെ എല്ലാം നായികയായി അഭിനയിച്ചു. ശക്തമായ സ്ത്രീകഥാപാത്രങ്ങളും നടിയെ തേടി എത്തി.
ഇപ്പോഴിതാ ഒരു അഭിമുഖത്തില് ഇപ്പോഴത്തെ ജീവിതത്തെ കുറിച്ചും വിവാഹം വേണ്ടായെന്ന തീരുമാനത്തിലേക്ക് എത്തിയതിനെ കുറിച്ചും വെളിപ്പെടുത്തി നടി. അമ്മയാകലും കുട്ടികളെ വളര്ത്തലുമല്ല തന്റെ വഴിയെന്ന് താരം പറയുന്നു. ‘എന്തുകൊണ്ട് മലയാള സിനിമയിലേക്ക് വരുന്നില്ല സെലക്റ്റീവായോ എന്നെല്ലാം പലരും ചോദിക്കുന്നു. കഥാപാത്രങ്ങളുടെ തിരഞ്ഞെടുപ്പ് വലിയ പ്രശ്നമാണ്.’
‘നാല്പ്പത്തിയഞ്ച് കഴിഞ്ഞ അഭിനേത്രികള്ക്കെല്ലാം ഈ പ്രയാസമുണ്ടാകുമെന്ന് ഞാന് കരുതുന്നു. അമ്മവേഷങ്ങള് അവതരിപ്പിക്കാന് ബുദ്ധിമുട്ടില്ല. എന്നാല് ഇതുവരെ ചെയ്ത വേഷങ്ങളിലൂടെ പ്രേക്ഷകര് നല്കിയ സ്നേഹവും ബഹുമാനവും നിലനിര്ത്തുന്ന കഥാപാത്രങ്ങളുമായി മാത്രം ക്യാമറയ്ക്ക് മുന്നില് വന്നാല് മതിയെന്നാണ് തീരുമാനം. യാത്രകള്ക്കിടെ കാണുമ്പോള് ഫോട്ടോയെടുക്കാന് ഓടിയെത്തുന്നവരില് അധികവും മലയാളികളാണ്.’
‘ചില സിനിമകളില് കഥാപാത്രങ്ങളായി എന്റെ മുഖം അവര് സങ്കല്പിച്ചിരുന്നെന്നും ആ വേഷം ഞാന് ചെയ്താല് നന്നായേനെയെന്നും അവര് പറയുമ്പോള് മനസില് സന്തോഷം നിറയും. മലയാളസിനിമയില് എത്തിയശേഷമാണ് കേരളീയ ആഘോഷങ്ങളില് പങ്കെടുത്ത് തുടങ്ങിയത്. അരയന്നങ്ങളുടെ വീട് സിനിമയില് അഭിനയിക്കാനെത്തിയതിന്റെ രണ്ടാം ദിവസമായിരുന്നു തിരുവോണം. അന്ന് ആദ്യമായി ഓണസദ്യ കഴിച്ചു. മമ്മൂക്കയാണ് വിളമ്പിത്തന്നത്.’
‘നൃത്തവും അഭിനയവുമാണ് എന്റെ ജീവിതമെന്ന് ഞാന് എത്രയോ മുമ്പെ തീരുമാനിച്ചുറപ്പിച്ചിരുന്നു. വിവാഹപ്രായമായപ്പോള് സ്വാഭാവികമായും കുടുംബത്തില് നിന്നും സമൂഹത്തില് നിന്നും സമ്മര്ദങ്ങള് ഉയര്ന്നു. എന്നാല് നിര്ബന്ധങ്ങള്ക്ക് വഴങ്ങി എന്റെ ആഗ്രഹത്തെ വഴിതിരിച്ചുവിടാന് മനസ് ഒരുക്കമായിരുന്നില്ല. അമ്മയാകലും കുട്ടികളെ വളര്ത്തലുമല്ല എന്റെ വഴിയെന്ന് ഞാന് തീരുമാനിച്ചിരുന്നു. അതിഷ്ടപ്പെടുന്ന അങ്ങനെ ജീവിക്കുന്ന ഒരുപാടുപേര് എനിക്ക് ചുറ്റുമുണ്ട്.’
‘അവരോടെനിക്ക് സ്നേഹവും ബഹുമാനവുമാണ്. അവര് അങ്ങനെയും ഞാനിങ്ങനെയും ജീവിക്കട്ടെ. സ്ത്രീകള്ക്ക് വിവാഹം കഴിച്ചും കഴിക്കാതെയും ജീവിക്കാനുള്ള സ്വാതന്ത്ര്യമുണ്ട്. ഇന്ന് അവിവാഹിതയായി തുടരാന് ആഗ്രഹിക്കുന്ന ഒരുപാട് പെണ്കുട്ടികളെയും സ്ത്രീകളെയും എനിക്കറിയാം. ഞാനത്തരമൊരു തീരുമാനമെടുത്തകാലത്ത് ആ വഴിക്ക് നീങ്ങുന്നവര് താരതമ്യേന കുറവായിരുന്നുവെന്ന് മാത്രം.’
‘സാമ്പത്തിക സുരക്ഷിതത്വമാണ് ഒരു സ്ത്രീയെ സംബന്ധിച്ചിടത്തോളം ഏറ്റവും പ്രധാനമെന്ന് അന്നും ഇന്നും വിശ്വസിക്കുന്നു. സ്വന്തം കാലില് നില്ക്കാനുള്ള സാമ്പത്തികഭദ്രത ഉറപ്പുവരുത്തിക്കഴിഞ്ഞാല് നമുക്ക് നമ്മെക്കുറിച്ചുതന്നെ അഭിമാനമുണ്ടാകും. അവിവാഹിതയായി തുടരുന്നതില് സന്തോഷവതിയാണ്. എന്റെ ലോകത്ത് ഞാന് തിരക്കിലാണെന്ന്’, ലക്ഷ്മി ഗോപാലസ്വാമി പറയുന്നു.
നടന് മുകേഷുമായി വിവാഹം എന്ന തരത്തില് വാര്ത്തകള് വന്നിരുന്നു. എന്നാല് ഇത് തീര്ത്തും അടിസ്ഥാന രഹിതമാണെന്ന് പറഞ്ഞുകൊണ്ട് ലക്ഷ്മി തന്നെ രംഗത്ത് വന്നിരുന്നു. തനിക്ക് യോജിച്ച ഒരു പുരുഷനെ കണ്ടെത്താന് ആയിട്ടില്ലെന്നാണ് ലക്ഷ്മി ഗോപാലസ്വാമി പറയുന്നു. രൂപഭാവങ്ങളിലും കാഴ്ചപാടുകളിലും അഭിരുചിയിലും താനുമായി യോജിക്കുന്ന ആളായിരിക്കണം ജീവിത പങ്കാളി എന്നാണ് നടിയുടെ സങ്കല്പ്പം. അത്തരമൊരു ആളെ ഇതുവരെ കണ്ടെത്താന് കഴിഞ്ഞിട്ടില്ലാ എന്നുമാണ് നടി പറഞ്ഞിരുന്നത്.
നാല്പ്പതോളം മലയാള ചിത്രങ്ങളില് ലക്ഷ്മി ഇതുവരെ അഭിനയിച്ച് കഴിഞ്ഞു. മമ്മൂട്ടി, മോഹന്ലാല്, സുരേഷ് ഗോപി, ജയറാം തുടങ്ങിയ സൂപ്പര് താരങ്ങളുടെയെല്ലാം നായികയായി. കര്ണാടക സ്വദേശിയായ ലക്ഷ്മി ഭരതനാട്യത്തില് പ്രാഗത്ഭ്യം നേടിയ ഒരു ക്ലാസിക്കല് നര്ത്തകി കൂടിയാണ്. ലക്ഷ്മിയ്ക്ക് കര്ണാടക സര്ക്കാരിന്റെയും കേരള സര്ക്കാറിന്റെയും സംസ്ഥാനപുരസ്കാരങ്ങള് ലഭിച്ചിട്ടുണ്ട്.
