ആഘോഷം അതിരു കടന്നു; സ്‌ക്രീനിന് തീയിട്ട് ബാലകൃഷ്ണ ആരാധകര്‍

സൂപ്പര്‍താരങ്ങളുടെ ചിത്രങ്ങളുടെ റിലീസ് ദിനം ആരാധകര്‍ ആഘോഷ പൂര്‍വമാണ് വരവേല്‍ക്കാറുള്ളത്. എന്നാല്‍ ആരാധകരുടെ ഈ ആഘോഷങ്ങള്‍ പലപ്പോഴും അതിരുകടക്കാറുമുണ്ട്. അത്തരത്തില്‍ തിയേറ്ററിന് തകരാര്‍ സംഭവിക്കും വിധമുള്ള ഒരു ആഘോഷത്തിന്റെ വീഡിയോയാണ് ഇപ്പോള്‍ സമൂഹ മാധ്യമങ്ങളില്‍ ശ്രദ്ധേയമാകുന്നത്.

നന്ദമൂരി ബാലകൃഷ്ണ നായകനാകുന്ന പുതിയ ചിത്രം ‘വീര സിംഹ റെഡ്ഡി’യുടെ പ്രദര്‍ശനത്തിനിടയില്‍ ആരാധകര്‍ സ്‌ക്രീനിന് തീയിട്ടു. വിശാഖപട്ടണത്തിന് അടുത്തുള്ള സബ്ബാവാരം എന്ന സ്ഥലത്തെ തിയേറ്ററിലാണ് സംഭവം നടന്നത്.

സ്‌ക്രീനിന് തീ പടരുന്നതും ഇതിനെത്തുടര്‍ന്ന് തിയേറ്ററില്‍ ഉണ്ടായിരുന്നവരെ വേഗം ഒഴിപ്പിക്കുന്നതും വീഡിയോയില്‍ കാണാം. അതേസമയം വീര സിംഹ റെഡ്ഡിക്ക് മികച്ച പ്രതികരണം ലഭിക്കുന്നുണ്ട്. ഗോപിചന്ദ് മാലിനേനി സംവിധാനം ചെയ്ത ചിത്രം ‘പുഷ്പ’ നിര്‍മ്മതാക്കളായ മൈത്രി മൂവി മേക്കേഴ്‌സാണ് നിര്‍മ്മിച്ചത്.

ശ്രുതി ഹാസന്‍ നായികയായി അഭിനയിക്കുന്ന ചിത്രത്തില്‍ ദുനിയ വിജയ്, വരലക്ഷ്മി ശരത്കുമാര്‍ എന്നിവരാണ് മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്. മലയാളി താരം ഹണി റോസും സിനിമയില്‍ പ്രധാന വേഷത്തിലെത്തുന്നുണ്ട്.