ഡല്‍ഹിയിലെ ആന്‍ഡ്രൂസ് ഗഞ്ചിലെ റോഡ് ഇനി മുതല്‍ അറിയപ്പെടുക സുശാന്തിന്റെ പേരില്‍

തെക്കന്‍ ഡല്‍ഹിയിലെ ആന്‍ഡ്രൂസ് ഗഞ്ചിലെ റോഡിന് അന്തരിച്ച ബോളിവുഡ് താരം സുശാന്ത് സിങ് രജ്പുത്തിന്റെ പേര് നല്‍കി. പേരുമാറ്റം നഗരസഭ അംഗീകരിച്ചായി വ്യാഴാഴ്ച അധികൃതര്‍ അറിയിച്ചു. ‘സുശാന്ത് സിങ് രജ്പുത്ത് മാര്‍ഗ്’ എന്നായിരിക്കും പേര്. സുശാന്തിനോടുള്ള ആദര സൂചകമായാണ് റോഡിന്റെ പേരുമാറ്റം. കഴിഞ്ഞ സെപ്റ്റംബറില്‍ കോണ്‍ഗ്രസ് കൗണ്‍സിലര്‍ അഭിഷേക് ദത്ത് റോഡിന് സുശാന്തിന്റെ പേരിടാനുള്ള നിര്‍ദേശം നഗരസഭയില്‍ നല്‍കുകയായിരുന്നു.

അതേസമയം, സുശാന്തിന്റെ 35ാമത്തെ ജന്മദിനമായിരുന്ന ജനുവരി 21 ന് താരത്തിന്റെ യുഎസിലുള്ള സഹോദരി ശ്വേത സിങ് ഫിസിക്‌സ് വിദ്യാര്‍ഥികള്‍ക്കായി 25 ലക്ഷം രൂപയുടെ സ്‌കോളര്‍ഷിപ് പ്രഖ്യാപിച്ചിരുന്നു. കലിഫോര്‍ണിയ സര്‍വകലാശാലയില്‍ പഠനത്തിന് അവസരമൊരുക്കും വിധമാണിത്.

2020 ജൂണ്‍ 14ന് ആണ് സുശാന്തിനെ ബാദ്രയിലെ സ്വവസതിയില്‍ മരിച്ചനിലയില്‍ കണ്ടെത്തുന്നത്. സുശാന്തിന്റെ മരണവുമായി ബന്ധപ്പെട്ട് നിരവധി വിവാദങ്ങളും വിമര്‍ശനങ്ങളും ഉടലെടുത്തിരുന്നു. സുശാന്തിന്റെ മണം കൊലപാതകം ആണെന്ന് ആരോപിച്ച് ബന്ധുക്കളും ആരാധകരും രംഗത്തെത്തിയതോടെ നിരവധി പേരെയാണ് ചോദ്യം ചെയ്തത്. എന്നാല്‍ മാസങ്ങളായി സിബിഐ, ഇഡി, എന്‍സിബി എന്നീ കേന്ദ്ര ഏജന്‍സികള്‍ സംഭവത്തക്കുറിച്ച് അന്വേഷിക്കുന്നുണ്ടെങ്കിലും കേസന്വേഷണം ഇതുവരെയും എങ്ങുമെത്തിയിട്ടില്ല.