തന്റേതല്ലാത്ത ഒരു മുഖം കാണിക്കേണ്ട കാര്യമെന്താണ്? മേക്കപ്പ് ഇല്ലാത്ത ചിത്രങ്ങളുമായി കനിഹ

മലയാളികളുടെ ഇഷ്ട്ട താരമാണ് കനിഹ. ഭാഗ്യദേവത, പഴശ്ശിരാജ, സ്പിരിറ്റ് തുടങ്ങി മലയാളത്തിൽ ചുരുങ്ങിയ സിനിമകളിൽ മാത്രമേ അഭിനയിച്ചുള്ളുവെങ്കിലും ഓർത്തിരിക്കാൻ കഴിയുന്ന കഥാപാത്രങ്ങളെയാണ് താരം സമ്മാനിച്ചത്. അഭിനയത്തിൽ നിന്ന് സംവിധാന രംഗത്തേക്ക് ചുവടുറപ്പിക്കാനുള്ള ഒരുക്കത്തിലായിരുന്നു കനിഹ. ഹ്രസ്വചിത്രമാണ് താരം സംവിധാനം ചെയ്യുന്നത്.

ലോക്ക് ഡൗൺ ആയതോടെ സോഷ്യൽ മീഡിയയിൽ സജീവമായിരുന്നു കനിഹ. നിരന്തരം ആരാധകരുമായി സംവദിക്കുകയും ചിത്രങ്ങൾ പങ്കുവെയ്ക്കുകയും ചെയ്തിരുന്നു. ഇപ്പോഴിതാ മേക്കപ്പ് ഇല്ലാതെ വീണ്ടും പ്രേക്ഷകർക്കു മുന്നിലെത്തിയിരിക്കുകയാണ് താരം. മേക്കപ്പോ, ‍ഡിസൈനര്‍ വസ്ത്രങ്ങളോ ഇല്ലാത്ത ചിത്രങ്ങൾ എന്തുകൊണ്ട് പോസ്റ്റ് ചെയ്യുന്നു എന്ന നിരന്തരമുള്ള ചോദ്യങ്ങളുടെ മറുപടി കൂടിയാണ് ഈ ചിത്രങ്ങളെന്ന് കനിഹ പറയുന്നു.

യഥാർഥത്തിൽ എങ്ങനെയാണോ അങ്ങനെ തന്നെ മറ്റുള്ളവരുടെ മുന്നിലും പ്രത്യക്ഷപ്പെടാനാണ് താൻ ആഗ്രഹിക്കുന്നത്. എല്ലാ കുറവുകളുമുള്ള തന്നെ അംഗീകരിച്ചു കൊണ്ട് സ്വയം മുന്നോട്ടു പോകുന്ന വ്യക്തിത്വമാണ് തന്റേതെന്നും അങ്ങനെ തന്നെയാവണം മറ്റുള്ളവരെന്നും നടി പറഞ്ഞു.

തന്റേതല്ലാത്ത ഒരു മുഖം കാണിക്കേണ്ട കാര്യമെന്തെന്ന് കനിഹ ചോദിക്കുന്നു. യഥാർഥ മുഖം കണ്ട്, അതു മറ്റുള്ളവർക്ക് പ്രപചോദനമാകുന്നുണ്ടെങ്കിൽ അതാണ് സന്തോഷം പകരുന്ന കാര്യമെന്നും നടി പറഞ്ഞു.