കന്നഡഗാനം പാടിയില്ല; കച്ചേരിയ്ക്കിടെ ഗായകന്‍ കൈലാഷ് ഖേറിനുനേരെ കുപ്പിയേറ്, രണ്ട് പേര്‍ അറസ്റ്റില്‍

കര്‍ണാടകത്തിലെ ഹംപിയില്‍ കച്ചേരിയ്ക്കിടെ പ്രശസ്ത ഗായകന്‍ കൈലാഷ് ഖേറിനുനേരെ കുപ്പിയേറ്. കന്നഡഗാനം പാടാത്തതില്‍ പ്രതിഷേധിച്ചായിരുന്നു കുപ്പിയെറിഞ്ഞത്.

മൂന്നുദിവസങ്ങളിലായി നടന്ന ഹംപി ഉത്സവത്തിന്റെ സമാപനച്ചടങ്ങിലാണ് സംഭവം. പ്രദേശവാസികളായ പ്രദീപ് (22), സുരാഹ് (21) എന്നിവരെ പോലീസ് അറസ്റ്റുചെയ്തു.

പ്രതികളെറിഞ്ഞ കുപ്പി വേദിയില്‍ കൈലാഷിന് പിറകിലാണ് വീണത്. കുപ്പിയേറുണ്ടായിട്ടും വകവെക്കാതെ അദ്ദേഹം ഗാനം ആലപിച്ചു. ഇതിനിടെ സംഘാടകരെത്തി വേദിയില്‍നിന്ന് കുപ്പിയെടുത്തു മാറ്റി.

വിജയനഗരസാമ്രാജ്യത്തിന്റെ പാരമ്പര്യ അനുസ്മരണത്തിന് എല്ലാവര്‍ഷവും കര്‍ണാടക സര്‍ക്കാരാണ് മൂന്നുദിവസത്തെ ഹംപി ഉത്സവം സംഘടിപ്പിക്കുന്നത്.