News
സുശാന്ത് സിംഗിന് ബൈപോളാര്‍ അസുഖമുണ്ടായിരുന്നുവെന്ന് മുംബൈ പോലീസ്
സുശാന്ത് സിംഗിന് ബൈപോളാര്‍ അസുഖമുണ്ടായിരുന്നുവെന്ന് മുംബൈ പോലീസ്
ബോളിവുഡ് താരം സുശാന്ത് സിംഗിന് ബൈപോളാര്‍ അസുഖമുണ്ടായിരുന്നുവെന്നും അദ്ദേഹം ഈ അസുഖത്തിന് ചികിത്സയിലായിരുന്നുവെന്നും മുംബൈ പോലീസ് കമ്മീഷണര്‍ പരം ബീര്‍ സിംഗ് വ്യക്തമാക്കി. പോലീസ് അന്വേഷണത്തിലാണ് ഇക്കാര്യം കണ്ടെത്തിയതത്രേ.
ഇതുവരെ കേസുമായി ബന്ധപ്പെട്ട് 56 പേരുടെ മൊഴിയെടുത്തു. എല്ലാ ഭാഗങ്ങളും സൂക്ഷ്മമായി പരിശോധിച്ചുകൊണ്ടിരിക്കുകയാണെന്നും മുംബൈ പോലീസ് വ്യക്തമാക്കി.
മരണത്തിന് തൊട്ടുമുമ്പ് സുശാന്ത് ഗൂഗിളില്‍ തിരഞ്ഞത് സ്വന്തം പേര്, തന്റെ മരണത്തിന് ഒരാഴ്ച മുമ്പ് മരിച്ച മുന്‍ മാനേജറുടെ അസുഖത്തിന്റെ വിവരങ്ങള്‍ തുടങ്ങിയവയാണെന്ന വിശദാംശങ്ങളും പോലീസ് പുറത്തുവിട്ടു.
കലിന ഫോറന്‍സിക് ലാബില്‍ നിന്ന് ലഭിച്ച മൊബൈല്‍ ഫോണിന്റേയും ലാപ്പടോപ്പിന്റേയും ഫോറന്‍സിക് റിപ്പോര്‍ട്ടുകളില്‍ നിന്നാണ് ഈ വിവരങ്ങള്‍ പുറത്തുവന്നിരിക്കുന്നത്.
സുശാന്തിന് ബൈപോളാര്‍ അസുഖമുണ്ടായിരുന്നതായാണ് മനസ്സിലാക്കുന്നതെന്നും അദ്ദേഹം അതിന്റെ മരുന്നും കഴിക്കുന്നുണ്ടായിരുന്നുവെന്നും പറഞ്ഞ കമ്മീഷണര്‍ അദ്ദേഹത്തിന്റെ മരണത്തിലേക്ക് നയിച്ച കാരണം എന്താണെന്ന് പോലീസ് അന്വേഷിച്ചുകൊണ്ടിരിക്കുകയാണെന്നും വ്യക്തമാക്കി.
