രമേശ് ചെന്നിത്തലയും എംഎ ആരിഫും അഭിനേതാക്കളാകുന്നു; പുതിയ ചിത്രത്തിന്റെ വിവരങ്ങള്‍ പങ്കുവെച്ച് സംവിധായകന്‍

മുന്‍ പ്രതിപക്ഷ നേതാവ് രമേശ് ചെന്നിത്തലയും എംഎ ആരിഫ് എംപിയും സിനിമയില്‍ അഭിനയിക്കാന്‍ തയ്യാറെടുക്കുന്നുവെന്ന് വാര്‍ത്തകള്‍. റെജു കോശി എഴുതി നിഖില്‍ മാധവ് സംവിധാനം ചെയ്യുന്ന ‘ഹരിപ്പാട് ഗ്രാമപഞ്ചായത്ത്’ എന്ന സിനിമയിലാണ് നേതാക്കള്‍ വേഷമിടാന്‍ തയ്യാറെടുക്കുന്നത്.

രാഷ്ട്രീയ നേതാവിന്റെ വേഷത്തില്‍ തന്നെയാണ് രമേശ് ചെന്നിത്തല അഭിനയിക്കുന്നത്. എം.ജി ശ്രീകുമാര്‍ ആലപിച്ച ഗാനത്തിലാണ് ആരിഫ് എംപി എത്തുന്നത്. ചിത്രത്തിലെ മൂന്ന് രംഗങ്ങളിലാണ് രമേശ് ചെന്നിത്തല അഭിനയിക്കുന്നത്. വളരെ പ്രധാനപ്പെട്ട ഭാഗമാണ്.

ജനക്കൂട്ടത്തിനിടയില്‍ നിന്നുള്ള രംഗങ്ങളാണ് എല്ലാം. കോവിഡ് കുറഞ്ഞ് ചിത്രീകരണത്തിന് അനുമതി ലഭിക്കുന്ന സൗഹചര്യത്തില്‍ സിനിമ പൂര്‍ത്തിയാക്കും എന്നാണ് സംവിധായകന്‍ വ്യക്തമാക്കിയിരിക്കുന്നത്.

അസ്‌കര്‍ സൗദാനാണ് നായകനാകുന്ന ചിത്രത്തില്‍ ഹരിപ്പാട്ടെ അക്കര ബാബുവിന്റെയും അവിടത്തെ രാഷ്ട്രീയ പശ്ചാത്തലവുമാണ് നര്‍മ്മത്തോടെ അവതരിപ്പിക്കുന്നത്. ധര്‍മ്മജന്‍, നീന കുറുപ്പ്, ഭീമന്‍ രഘു, ബിജുകുട്ടന്‍, കോബ്രാ രാജേഷ്, അരിസ്റ്റോ സുരേഷ്, ഫിയാസ് കരീം എന്നിവരും ചിത്രത്തില്‍ അഭിനയിക്കുന്നുണ്ട്.