Malayalam
‘രാജ്യദ്രോഹം’; വര്‍ത്തമാനത്തിന് വിലക്കിട്ട് സെന്‍സര്‍ ബോര്‍ഡ്
‘രാജ്യദ്രോഹം’; വര്‍ത്തമാനത്തിന് വിലക്കിട്ട് സെന്‍സര്‍ ബോര്‍ഡ്
ദേശ വിരുദ്ധമാണെന്നും മതസൗഹാര്‍ദ്ദം തകര്‍ക്കുന്നതുമാണെന്ന കാരണത്തില്‍ സിദ്ധാര്‍ത്ഥ് ശിവയുടെ വര്‍ത്തമാനം എന്ന ചിത്രത്തിന് പ്രദര്‍ശനാനുമതി നിഷേധിച്ച് സെന്‍സര്‍ ബോര്‍ഡ്. ചിത്രം രാജ്യദ്രോഹം ആണെന്നും സാമുദായിക സ്പര്‍ദ്ധ ഉണ്ടാക്കുമെന്നുമാണ് ചിത്രത്തിന് പ്രദര്‍ശനാനുമതി നല്‍കാതിരിക്കാന്‍ സെന്‍സര്‍ ബോര്‍ഡ് പറയുന്ന കാരണങ്ങള്‍. സിനിമയില്‍ ജെഎന്‍യു വിദ്യാര്‍ത്ഥികളുടെ പ്രക്ഷോഭവും ദളിത്, മുസ്ലീം വിദ്യാര്‍ത്ഥികള്‍ക്കിടയിലെ അരക്ഷിതാവസ്ഥയുമെല്ലാം ഉള്ളതിനാലാണ് വിലക്ക് എന്നാണ് റിപ്പോര്‍ട്ടുകള്‍. കൂടുതല്‍ പരിശോധനയ്ക്കായി ചിത്രം റിവൈസിംഗ് കമ്മിറ്റിക്ക് കൈമാറിയിരിക്കുകയാണ്.
പാര്‍വ്വതി തിരുവോത്താണ് ‘വര്‍ത്തമാനത്തിലെ’ കേന്ദ്ര കഥാപാത്രം. സിദ്ധാര്‍ത്ഥ് ശിവ സംവിധാനം ചെയ്ത ചിത്രത്തിന്റെ തിരക്കഥ നിര്‍വ്വഹിച്ചിരിക്കുന്നത് ആര്യാടന്‍ ഷൗക്കത്താണ്. കേരളത്തില്‍ നിന്നുള്ള ബിജെപി നേതാവായ ഒരു സെന്‍സര്‍ ബോര്‍ഡംഗം ആര്യാടന്‍ ഷൗക്കത്ത് തിരക്കഥ രചിച്ച ചിത്രം രാജ്യദ്രോഹപരമാണെന്ന് പരസ്യമായി ട്വീറ്റ് ചെയ്യുകയും ചെയ്തു. പിന്നീട് വിവാദമായതിനെ തുടര്‍ന്ന് ഈ ട്വീറ്റ് നീക്കം ചെയ്യുകയായിരുന്നു.
റോഷന്‍ മാത്യൂ, സിദ്ദിഖ് എന്നിവരാണ് ചിത്രത്തിലെ മറ്റ് പ്രധാന കഥാപാത്രങ്ങള്‍. ബിജിപാലാണ് ചിത്രത്തിന്റെ പശ്ചാത്തല സംഗീതം ചെയ്തിരിക്കുന്നത്. അളഗപ്പന്‍ നാരായണനാണ് ചിത്രത്തിന്റെ ഛായാഗ്രാഹകന്‍. ആര്യാടന്‍ നാസര്‍, ബെന്‍സി നാസര്‍ എന്നിവരാണ് ചിത്രത്തിന്റെ നിര്‍മ്മാതാക്കള്‍. സാമൂഹ്യരാഷ്ട്രീയ വിമര്‍നങ്ങളെ രാജ്യദ്രോഹമായി ചിത്രീകരിക്കുന്നതിനെതിരേ വ്യാപകമായ എതിര്‍പ്പാണ് സോഷ്യല്‍ മീഡിയയിലടക്കം ഉയരുന്നത്.
