ക്യാമറ ഇവിടെ വെക്കണമെന്ന് പറഞ്ഞാൽ അവിടെ വെക്കും… എനിക്ക് രാത്രി വരാൻ പറ്റില്ല, ഈ പട്ടാപകൽ രാത്രി സീനെടുക്കെന്ന് പറഞ്ഞാൽ അനുസരിക്കുന്നവർക്ക് മാത്രമേ ഇവരെക്കെ ഡേറ്റ് കൊടുക്കൂ; ശാന്തിവിള ദിനേശൻ

വിവാദപ്രസ്താവനകളിലൂടെ വാര്‍ത്തകളില്‍ ഇടം പിടിക്കാറുള്ള സംവിധായകനാണ് ശാന്തിവിള ദിനേശ്. അദ്ദേഹത്തിന്റെ തന്നെ യൂട്യൂബ് ചാനലിലൂടെയാണ് പലപ്പോഴും അഭിപ്രായ പ്രകടനങ്ങള്‍ നടത്താറുള്ളത്. അവയെല്ലാം തന്നെ വളരെപ്പെട്ടെന്ന് വൈറലായി മാറാറുമുണ്ട്. ഇപ്പോഴിതാ അദ്ദേഹത്തിന്റെ പുതിയ വീഡിയോ ശ്രദ്ധ നേടുന്നു

മലയാള സിനിമയിൽ ഇന്ന് അഭിനേതാക്കളും നിർമാതാക്കളാവുന്ന സാ​ഹചര്യമാണ്. ഇവർക്കെല്ലാം സ്വന്തമായി നിർമാണ കമ്പനിയുമുണ്ട്. ഇവർക്ക് പുറമെ പല അഭിനേതാക്കളും നിർമാണ ചെലവിൽ ഒരു പങ്ക് വഹിക്കുന്നുണ്ട്. എന്നാൽ ഈ പ്രവണത നിർമാതാക്കളുടെ സംഘടന അനുവദിക്കരുതെന്ന് അഭിപ്രായപ്പെട്ടിരിക്കുകയാണ് ശാന്തിവിള ദിനേശ്.

‘ഏതെങ്കിലും നിർമാതാവിന്റെ അവതാര്യം കൊണ്ടാണ് ഓരോ പുതുമുഖങ്ങൾ വളർന്ന് വരുന്നത്. നാല് പടം ചെയ്ത് പത്താളെ കിട്ടുമെന്നായാൽ അവർ തന്നെ പ്രൊഡ്യൂസ് ചെയ്യുന്നു’

നിർമ്മിക്കുന്ന പൈസയും അഭിനയിക്കുന്ന പൈസയുമെല്ലാം തനിക്ക് തന്നെ ലഭിക്കട്ടെയെന്ന ആർത്തി പണ്ടാരങ്ങളായി മലയാള സിനിമാ താരങ്ങൾ മാറുന്നെന്ന് ഇദ്ദേഹം ആരോപിച്ചു’

‘ദുൽഖർ സൽമാനോട് ചെന്ന് ഒരു കഥ പറഞ്ഞാൽ ദുൽഖർ പറയുന്നത് ഞാൻ പ്രൊഡ്യൂസ് ചെയ്യാമെന്നാണ്. ടെവിനോ, പൃഥിരാജ്, ദിലീപ്, മോഹൻലാൽ, മമ്മൂട്ടിയടക്കം എല്ലാവരും നിർമ്മിക്കുകയാണ്.

‘നിങ്ങൾ നിർമ്മിക്കേണ്ട, നിങ്ങൾ അഭിനയിച്ചാൽ മതി. ഇത് ചെയ്യാൻ നിർമാതാക്കൾ ഇവിടെയുണ്ടെന്ന് പറയണം സംഘടനാ തലപ്പത്തിലുള്ളവർ പറയണം’

‌’കൈ വെള്ളയിൽ എന്റെ കൊണ്ടു നടക്കാൻ പുതിയ നിർമാതാക്കൾ ഉള്ളപ്പോൾ‌ ഞാനെന്തിന് പഴയ സംവിധായകരെയും നിർമാതാക്കളെയും കൊണ്ട് നടക്കണമെന്ന് ഏതൊയൊരാളിനോട് മമ്മൂക്ക പകുതി തമാശയ്ക്കും പകുതി കാര്യത്തിലും പറഞ്ഞത്രെ. എന്നോടൊരാൾ പറഞ്ഞതാണ്’

‘ക്യാമറ ഇവിടെ വെക്കണമെന്ന് പറഞ്ഞാൽ അവിടെ വെക്കും. എനിക്ക് രാത്രി വരാൻ പറ്റില്ല, ഈ പട്ടാപകൽ രാത്രി സീനെടുക്കെന്ന് പറഞ്ഞാൽ അനുസരിക്കുന്നവർക്ക് മാത്രമേ ഇവരെക്കെ ഡേറ്റ് കൊടുക്കൂ,’ ശാന്തിവിള ദിനേശൻ പറയുന്നു. ഇതിന് ഉദാഹരണമുണ്ടെന്നും ഇദ്ദേഹം വാദിക്കുന്നു.

‘ജോയ് തോമസടക്കമുള്ള നിർമാതാക്കളുടെ നിർമാണ നിർവാഹണം നടത്തിയിരുന്ന കെആർ ഷൺമുഖം എന്ന മനുഷ്യനെ സൂപ്പർ താരങ്ങളായിക്കഴിഞ്ഞപ്പോൾ മോഹൻലാലും മമ്മൂട്ടിയടക്കമുള്ള നായകൻമാർ ചേർന്ന് ഫീൽഡ് ഔട്ട് ആക്കി’

‘കാരണം പറഞ്ഞ ഡേറ്റിന് ശംഭു അണ്ണൻ വർക്ക് ചെയ്യുന്ന സെറ്റിലേക്ക് മമ്മൂട്ടി വന്നില്ലെങ്കിൽ വിവരമറിയും’

‘കൊടുത്ത ഡേറ്റിന് വേറൊരു സെറ്റിൽ അഭിനയിക്കാതെ ഇവിടത്തെ ഡേറ്റിൽ അഭിനയിക്കുന്നെന്ന് അറിഞ്ഞപ്പോൾ കാറു കൊണ്ട് നിർ‌ത്തി ശംഭു അണ്ണൻ ഇറങ്ങിയപ്പോൾ ഇട്ടിരുന്ന മേക്കപ്പിൽ മമ്മൂട്ടി ഇറങ്ങി പോവാമണ്ണായെന്ന് പറഞ്ഞു’

‘ആ ശംഭുവണ്ണനെ ഒരു പടവുമില്ലാതെ വർഷങ്ങളോളം വീട്ടിലിരുത്തി, ശാന്തിവിള ദിനേശ് പറഞ്ഞു’

നട്ടെല്ലുള്ള സംവിധായകരെ സൂപ്പർ താരങ്ങളായപ്പോൾ ഒതുക്കി. പേരൊന്നും പറയുന്നില്ല, പലരും ഇപ്പോൾ ജീവിച്ചിരിപ്പില്ലെന്നും ഇദ്ദേഹം പറയുന്നു.

കഴിഞ്ഞ ദിവസം ഇവിടെ ഇറങ്ങിയ കുറേ സിനിമകളെടുത്ത് നോക്കൂ. ഒരു മാളികപ്പുറം, രോമാഞ്ചം, ജന​ഗണമന പോലുള്ള സിനിമകൾ മാറ്റി നിർത്തിയാൽ നിർമാതാവ് മുടക്കിയ കാശെങ്കിലും കിട്ടിയ എത്ര സിനിമയുണ്ട്. വിരലിലെണ്ണാവുന്ന സിനിമയേ ഉള്ളൂ,’ ശാന്തിവിള ദിനേശ് പറഞ്ഞു. മലയാള സിനിമയിലെ താരങ്ങളെപറ്റി വിവാദ പ്രസ്താവനകൾ നടത്തുന്ന വ്യക്തിയാണ് സംവിധായകൻ ശാന്തിവിള ദിനേശൻ. മമ്മൂട്ടി, മോഹൻലാൽ തുടങ്ങിയ താരങ്ങളെ പറ്റി തുറന്നടിക്കാൻ യാതൊരു മടിയും ശാന്തിവിള ദിനേശൻ കാണിക്കാറില്ല. പലപ്പോഴും ഇതിന്റെ പേരിൽ ഫാൻസിന്റെ രൂക്ഷമായ പ്രതികരണങ്ങളും ഇദ്ദേഹത്തിന് നേരിടേണ്ടി വരാറുണ്ട്.