”രാമേശ്വരത്ത്‌ ശിവനും പാർവ്വതിക്കും മുന്നിൽ വെച്ച് ഒന്നായതിന്‍റെ വാർഷികമാണ്‌ ഇന്ന് ;കുറിപ്പുമായി ആര്യൻ കൃഷ്ണ മേനോന്‍!
നടന്, സ്‌ക്രിപ്പ് റൈറ്റര്‍, സംവിധായകന്‍ എന്നീ നിലകളിലെല്ലാം സജ്ജീവമായ തെരമാണ് ആര്യന്‍ കൃഷ്ണ മേനോന്‍. ടൂർണമെന്‍റ് എന്ന സിനിമയിലൂടെയായിരുന്നു അരങ്ങേറ്റം. മോഹൻലാൽ – ബ്ലസി ചിത്രം പ്രണയത്തിൽ ബോളിവുഡ് താരം അനുപം ഖേറിന്‍റെ ചെറുപ്പകാലം അവതരിപ്പിച്ച് ശ്രദ്ധിക്കപ്പെടുകയുമുണ്ടായി. പിന്നീട് ദി ഗ്രേറ്റ് ഫാദർ, ലില്ലി, കൂദാശ, വൺ തുടങ്ങിയ നിരവധി സിനിമകളുടെ ഭാഗമായി. ഇൻസ്റ്റയൽ ഏറെ സജീവമായ താരം വീട്ടിലെ വിശേഷങ്ങൾ സോഷ്യൽമീഡിയയിൽ പങ്കുവയ്ക്കാറുണ്ട്.ആര്യൻ കൃഷ്ണ മേനോനും കുടുംബവും സോഷ്യൽമീഡിയിയൽ ഏറെ സജീവമായുള്ളവരാണ്. റേഡിയോ ജോക്കിയായി കരിയർ തുടങ്ങിയ ശേഷം പിന്നീട് നടനും സംവിധായകനുമായി മാറുകയായിരുന്നു താരം. 2010 മുതൽ സിനിമാലോകത്ത് സജീവമാണ് ആര്യൻ.
ഇംഗ്ലീഷ് കവയത്രിയായ സൗമ്യ വിദ്യാധർ ആണ് ആര്യന്‍റെ ഭാര്യ. സന, പീലി, കനി എന്നിവരാണ് ഇവരുടെ മക്കൾ. കൈലാസം എന്ന് പേരിട്ട തന്റെ വീട്ടിലെ രസങ്ങളും വിശേഷങ്ങളുമൊക്കെ ഇൻസ്റ്റയിൽ ആര്യൻ മിക്കപ്പോഴും പങ്കുവയ്ക്കാറുണ്ട്. ഇപ്പോഴിതാ തങ്ങളുടെ വിവാഹ വാർഷിക ദിനത്തിൽ താരത്തിന്‍റെ ഇൻസ്റ്റ പോസ്റ്റ് വൈറലായിരിക്കുകയാണ്.
”രാമേശ്വരത്ത്‌ ശിവനും പാർവ്വതിക്കും മുന്നിൽ വെച്ച് ഒന്നായതിന്‍റെ വാർഷികമാണ്‌ ഇന്ന്. എന്നെ സംബന്ധിച്ച്‌ സെപ്റ്റംബർ 1 എന്നത് കോബ എന്ന ഈ ആര്യൻ 2.0 ജനിച്ച ദിവസം. സന എന്റെ മകളായി ജനിച്ച ദിവസം, കൈലാസം ( ഈ വീട് കൈലാസത്തിൽ കയറിയത്‌ സെപ്റ്റംബർ 10 ആണെങ്കിൽ കൂടിയും – പിന്നെ കൈലാസം കേവലം ഒരു വീട് ആയല്ല ഞാൻ കാണുന്നത്, ഞാൻ ഉദ്ദേശിച്ചത് നിങ്ങൾക്ക് മനസ്സിലായെങ്കിൽ) ജനിച്ച ദിവസം എല്ലാം ഈ ദിവസം ആണ്.ഞങ്ങളുടെ ഈ യാത്രയിൽ സോഷ്യൽ മീഡിയ വളരെ വലിയ ഒരു പങ്കാണ്‌ നിർവ്വഹിച്ചത്, നിർവ്വഹിച്ച്‌ കൊണ്ടിരിക്കുന്നത്‌. ഇന്ന് കൈലാസം എന്നത് കേവലം ഞാനും എന്റെ 4 പെണ്ണുങ്ങളും ഉൾപ്പെടുന്ന ഒരു കുടുംബം അല്ല, ലോകമെമ്പാടുമുള്ള പല തരത്തിൽ ഉള്ള മനുഷ്യർ സുഹൃത്തുക്കളായി വന്ന് ഈ കുടുംബത്തിന്‍റെ അംഗങ്ങളായി മാറി. എത്രയെത്ര സ്നേഹനിധികൾ..!
മാത്സര്യ ബുദ്ധിയുടേയും, അസൂയയുടേയും, കുശുമ്പിന്‍റേയും, വെറുപ്പിന്‍റേയും അങ്ങനെ ഒരു നൂറായിരം നെഗറ്റിവിറ്റികൾ ഭരിക്കുന്ന ഈ ലോകത്ത്‌ നന്മമാത്രം – കലർപ്പില്ലാത്ത സ്നേഹം മുൻനിർത്തി അത്രയും ഞങ്ങൾക്ക് പ്രിയപ്പെട്ടവരായി മാറിയ എത്രയോ പേർ!! പുഞ്ചിരിക്കുമ്പോൾ കൂടെ പുഞ്ചിരിക്കുന്നവർ, വിഷമിക്കുമ്പോൾ താങ്ങാവുന്നവർ. മുന്നേറാൻ ശക്തിയാകുന്നവർ. പോസ്റ്റുകളിൽ വന്ന് അടി കൂടിയാലും, പരസ്പരം വിമർശ്ശിച്ചാലും, രാഷ്ട്രീയപരമായി മറു ചേരിയിലാണെങ്കിലും വിളിച്ചാൽ വിളിപ്പുറത്ത്‌ എന്തിനും തുനിഞ്ഞ്‌ നിൽക്കുന്നവർ.
ഈ സന്തോഷ ദിനത്തിൽ എന്നും ഒപ്പമുള്ളത്തിന് ഒത്തിരി നന്ദി പറയുന്നു. ഉപാധികളില്ലാതെ ഞങ്ങളോട്‌ ചേർന്ന് നിൽക്കുന്നതിന്‌ നന്ദി. ജീവിതത്തിന്‍റെ ഈ മഹാപ്രവാഹത്തിൽ കൈകോർത്ത്‌ നിൽക്കുന്നതിന്‌. ഹൃദയത്തിൽ തൊട്ട് നന്ദി”, ആര്യൻ സൗമ്യയോടൊപ്പം നിൽക്കുന്നൊരു ചിത്രം പങ്കുവെച്ച് കുറിച്ചിരിക്കുകയാണ്.
