പ്രശസ്ത ബോളിവുഡ് താരം മിഥിലേഷ് ചതുര്‍വേദി അന്തരിച്ചു; ഹൃദയസ്തംഭനമാണ് മരണകാരണം എന്ന് വിവരം

പ്രശസ്ത ബോളിവുഡ് താരം മിഥിലേഷ് ചതുര്‍വേദി അന്തരിച്ചു. 67 വയസ്സായിരുന്നു. ഹൃദയസ്തംഭനമാണ് മരണകാരണം എന്നാണ് പുറത്ത് വരുന്ന വിവരം.

മിഥിലേഷ് ചതുര്‍വേദിയുടെ മരുമകന്‍ ആശിഷ് ആണ് സോഷ്യല്‍ മീഡിയ വഴി മരണം സംഭവിച്ചതായി ഔദ്യോഗികമായി സ്ഥിരീകരണ കുറിപ്പ് പുറത്ത് വിട്ടത്.

മുതിര്‍ന്ന താരത്തിന്റെ വിയോഗത്തില്‍ നിരവധി പ്രമുഖര്‍ അനുശോചിച്ചു. സോഷ്യല്‍ മീഡിയയിലും നിരവധി പേരാണ് അനുശോചനം അറിയിച്ചിരിക്കുന്നത്.

പതിറ്റാണ്ടുകളായി ബോളിവുഡില്‍ നിറഞ്ഞു നിന്ന താരം 1997ല്‍ ഭായ് ഭായ് എന്ന ചിത്രത്തിലൂടെയാണ് അരങ്ങേറ്റം കുറിച്ചത്. കോയ് മില്‍ ഗയാ, സത്യ, ഗഡാര്‍, ഏക് പ്രേം കഥ തുടങ്ങി നിരവധി ബോളിവുഡ് സിനിമകളില്‍ നിറഞ്ഞുനിന്നിട്ടുള്ള താരം സ്‌കാം 1992: ദി ഹര്‍ഷദ് മേത്താ സ്‌റ്റോറി എന്ന വെബ്‌സീരീസിലും അഭിനയിച്ചിട്ടുണ്ട്.