News
നീ വളരെ കരുത്തയായ പെണ്‍കുട്ടിയാണ്, ഈ പ്രതിസന്ധിയും വളരെ വേഗത്തില്‍ നിനക്ക് മറികടക്കാന്‍ സാധിക്കും; സാമന്തയ്ക്ക് പിന്തുണയുമായി ചിരഞ്ജീവി
നീ വളരെ കരുത്തയായ പെണ്‍കുട്ടിയാണ്, ഈ പ്രതിസന്ധിയും വളരെ വേഗത്തില്‍ നിനക്ക് മറികടക്കാന്‍ സാധിക്കും; സാമന്തയ്ക്ക് പിന്തുണയുമായി ചിരഞ്ജീവി
കഴിഞ്ഞ ദിവസമായിരുന്നു തന്റെ രോഗ വിവരം പങ്കുവെച്ച് നടി സാമന്ത രംഗത്തെത്തിയത്. കഴിഞ്ഞ കുറച്ച് മാസങ്ങളായി അപൂര്‍വ്വ രോഗമായ മയോസിറ്റിസിന് ചികിത്സയിലാണെന്ന് താരം ഇന്‍സ്റ്റഗ്രാമില്‍ പങ്കുവെച്ച കുറിപ്പില്‍ വ്യക്തമാക്കിയിരുന്നു. അസുഖത്തില്‍ നിന്നും മുക്തിനേടാന്‍ കൂടുതല്‍ സമയം ആവശ്യമാണെന്നും സധൈര്യം നേരിടാന്‍ തയ്യാറെടുക്കുകയാണെന്നും ആയിരുന്നു താരം കുറിപ്പിലൂടെ പങ്കുവെച്ചത്.
ഇപ്പോഴിതാ താരത്തിന് പിന്തുണയുമായി രംഗത്തെത്തുകയാണ് മുന്‍ഭര്‍ത്താവിന്റെ പിതാവും തെന്നിന്ത്യന്‍ സൂപ്പര്‍ സ്റ്റാറുമായ ചിരഞ്ജീവി. പ്രിയ സാം എന്ന് പറഞ്ഞു തുടങ്ങുന്ന അദ്ദേഹം നീ വളരെ കരുത്തയായ ഉള്‍ബലമുള്ള പെണ്‍കുട്ടിയാണെന്ന് പറയുന്നു. നമ്മുടെ ജീവിതത്തിലേയ്ക്ക് ഒട്ടനവധി വെല്ലുവിളികള്‍ കടന്നുവന്നു.
ഒരുപക്ഷേ അതെല്ലാം നമ്മുടെ സ്വയം കരുത്തിനെ തിരിച്ചറിയാന്‍ വേണ്ടിയുള്ളതാവാം. നീ വളരെ കരുത്തയായ പെണ്‍കുട്ടിയാണ്. ഈ പ്രതിസന്ധിയും വളരെ വേഗത്തില്‍ നിനക്ക് മറികടക്കാന്‍ സാധിക്കുമെന്ന് എനിക്കുറപ്പാണ്. ധൈര്യത്തോടെ മുന്നേറാനുള്ള എല്ലാ ശക്തിയും നിനക്കുണ്ടാവട്ടെ എന്നാണ് അദ്ദേഹം കുറിച്ചിരിക്കുന്നത്.
യശോദ എന്ന താരത്തിന്റെ ഏറ്റവും പുതിയ ചിത്രത്തിന് ലഭിച്ച പിന്തുണയ്ക്ക് നന്ദി പറഞ്ഞാണ് സാമന്ത തന്റെ പോസ്റ്റ് ആരംഭിക്കുന്നത. നിങ്ങള്‍ നല്‍കുന്ന ഈ സ്നേഹവും പിന്തുണയുമാണ് എന്റെ ജീവിതത്തിലേയ്ക്ക് കടന്നുവരുന്ന എല്ലാ പ്രതിസന്ധികളേയും അതിജീവിക്കാന്‍ സഹായിക്കുന്നത്. കഴിഞ്ഞ കുറച്ച് മാസങ്ങള്‍ക്ക് മുന്‍പ് എനിക്ക് പേശികളെ ബാധിക്കുന്ന മയോസിറ്റിസ് എന്ന രോഗമുണ്ടെന്ന് കണ്ടെത്തി.
രോഗം ഉടന്‍ മാറുമെന്നും ആ വാര്‍ത്ത നിങ്ങളുമായി പങ്കുവെയ്ക്കാന്‍ കഴിയുമെന്നുമാണ് ഞാന്‍ പ്രതീക്ഷിക്കുന്നത്. എന്നാല്‍ അതിന് ഞാന്‍ പ്രതീക്ഷിക്കുന്നതിനേക്കാല്‍ അല്‍പ്പം സമയം കൂടുതല്‍ വേണ്ടിവരും. ഇക്കാര്യം അംഗീകരിക്കാന്‍ ഞാനിപ്പോഴും ബുദ്ധിമുട്ടുകയാണ്.
ഉടന്‍ തന്നെ പൂര്‍ണമായി സുഖം പ്രാപിക്കുമെന്ന് ഡോക്ടര്‍ക്ടമാര്‍ ഉറപ്പു നല്‍കുന്നുണ്ട്. എനിക്ക് നല്ല ദിവസങ്ങളും മോശം ദിവസങ്ങളും ജീവിതത്തില്‍ ഉണ്ടായിരുന്നു. ശാരീരികമായും വൈകാരികമായും എനിക്ക് ഇനി ഒരു ദിവസം കൂടി താങ്ങാന്‍ കഴിയില്ലെന്ന് തോന്നുമ്പോള്‍ പോലും, എങ്ങനെയോ ആ നിമിഷം കടന്നുപോയി. ഇതും കടന്നു പോകും..’ എന്നായിരുന്നു സമാന്ത ഇന്‍സ്റ്റഗ്രാമില്‍ കുറിച്ചത്.
