മാതൃഭൂമിക്ക് സിനിമ പരസ്യം നല്കാതിരിക്കുന്നതിന്റെ വൈരാഗ്യം; മോഹൻലാലിനെ കടന്നാക്രമിക്കുന്നു – മാതൃഭൂമിയുടെ വ്യാജവാർത്തകൾക്കെതിരെ ‘അമ്മ അസോസിയേഷൻ രംഗത്ത്

മാതൃഭൂമിക്ക് സിനിമ പരസ്യം നല്കാതിരിക്കുന്നതിന്റെ വൈരാഗ്യം; മോഹൻലാലിനെ കടന്നാക്രമിക്കുന്നു – മാതൃഭൂമിയുടെ വ്യാജവാർത്തകൾക്കെതിരെ ‘അമ്മ അസോസിയേഷൻ രംഗത്ത്

മാതൃഭൂമിയോട് ശക്തമായ പ്രതിഷേധങ്ങൾ എല്ലാ തരത്തിലും ഉയരുകയാണ്. ഇപ്പോൾ മലയാള സിനിമ താര സംഘടനയായ ‘അമ്മ അസോസിയേഷനും മാതൃഭൂമിക്കെതിരെ രംഗത്ത് എത്തിയിരിക്കുകയാണ്. മോഹൻലാൽ രാജി സന്നദ്ധത അറിയിച്ചു എന്ന് മാതൃഭൂമി നൽകിയ വാർത്ത എല്ലാ മാധ്യമങ്ങളും ഏറ്റെടുത്തിരുന്നു. എന്നാൽ ഇത് മാതൃഭൂമി കെട്ടിച്ചമച്ചതെണെന്നും പരസ്യം നൽകാത്തതിന്റെ വിരോധം തീർക്കുകയാണെന്നും ‘അമ്മ അസോസിയേഷന്റെ പേജിലെ പോസ്റ്റിലൂടെ പറയുന്നു. പരസ്യങ്ങൾ നല്കാതിരിക്കുന്നതിന്റെ വൈരാഗ്യം മാതൃഭൂമി തീർക്കുന്നത് പുതിയതായി ഇറങ്ങുന്ന സിനിമയെ മോശമാക്കി റിവ്യൂ നല്കിയാണെന്നാണ് അമ്മയുടെ ആരോപണം.

‘അമ്മ അസോസിയേഷൻ പോസ്റ്റ് പൂർണരൂപം

ഇന്ന് രാവിലെ മാതൃഭൂമി ദിനപത്രത്തിൽ വന്ന ഒരു വാർത്തയുടെ അടിസ്ഥാനത്തിൽ അമ്മയിലെ എല്ലാ അംഗങ്ങളുടേയും അറിവിലേക്കായിട്ടാണ് ഈ പോസ്റ്റ് ഇടുന്നത്. അമ്മയുടെ പ്രസിഡന്റ് സ്ഥാനത്ത് നിന്നും രാജി വെക്കാൻ മോഹൻലാൽ സന്നദ്ധത അറിയിച്ചുവെന്നും അമ്മയിൽ ചേരിതിരിവാണെന്നുമാണ് വാർത്ത വന്നിരിക്കുന്നത്. അമ്മയുടെ അംഗങ്ങൾ ആരും തന്നെ ഇതിൽ ആശങ്കപ്പെടേണ്ടതില്ല. അത് മാതൃഭൂമിക്ക് അമ്മയോടുളള ശത്രുത കൊണ്ടല്ല, മാതൃഭൂമിക്ക് സിനിമാസംബന്ധമായ ഒരു പരസ്യവും നൽകേണ്ടതില്ലായെന്ന് മലയാള സിനിമയിലെ മറ്റു സംഘടകൾ തീരുമാനിച്ചിരുന്നു.

ഇതിനെ തുടർന്ന് കഴിഞ്ഞ ഒന്നര വർഷമായി പലതരത്തിൽ പരസ്യം ലഭിക്കാത്തതിലുള്ള വിദ്വേഷം മാതൃഭൂമി തീർത്തുകൊണ്ടിരിക്കുകയാണ്. പുതുതായി പുറത്തിറങ്ങുന്ന എല്ലാ സിനിമകളേയും അധിക്ഷേപിക്കുക മലയാള സിനിമയുടെ ഭാഗമായി പ്രവർത്തിക്കുന്ന എല്ലാവരേയും മോശമായി ചിത്രീകരിക്കുക എന്നിങ്ങനെ പലതരത്തിലുള്ള പ്രവർത്തികൾ അവർ ചെയ്യുന്നു. അതിന്റെ ഭാഗമായി ഇന്ന് അമ്മ സംഘടനയേയും അതിന്റെ പ്രസിഡന്റ് ശ്രീ മോഹൻലാലിനേയും അവർ കടന്ന് ആക്രമിച്ചിരിക്കുകയാണ്.

അമ്മയിൽ യാതൊരുവിധത്തിലുമുള്ള പ്രശ്‌നങ്ങളുമില്ല. പ്രസിഡന്റ് മോഹൻലാലും സംഘടനയിലെ ഒരു എക്‌സിക്ക്യൂട്ടീവ് അംഗവും രാജി സന്നദ്ധത അറിയിച്ചിട്ടുമില്ല. ഭാവിയിലും ഇത്തരത്തിലുള്ള വാർത്തകൾ മാതൃഭൂമി പ്രസിദ്ധീകരിക്കാൻ സാദ്ധ്യതയുണ്ട്. അംഗങ്ങൾ ആരും ഇതിൽ ആശങ്കപ്പെടേണ്ടതില്ല. അമ്മ’ കൂടുതൽ കെട്ടുറപ്പോടെ മുന്നോട്ട് പോകുന്നതായിരിക്കും.

amma association facebook post against mathrubhumi