ഇനി ‘സാമി സാമി’യ്ക്ക് ഡാന്‍സ് കളിക്കില്ല; നടുവേദന വരും; രശ്മിക മന്ദാന

അല്ലു അര്‍ജുന്റേതായി പുറത്തെത്തിയ ചിത്രമായിരുന്നു പുഷ്പ. ചിത്രത്തിലെ ഗാനങ്ങളെല്ലാം തന്നെ വളരെപ്പെട്ടെന്നാണ് വൈറലായി മാറിയത്. രശ്മികയുടെ ഡാന്‍സും പ്രേക്ഷകര്‍ ഏറ്റെടുത്തിരുന്നു. എന്നാല്‍ ഇപ്പോഴിതാ ഇനി സ്‌റ്റേജുകളില്‍ ‘സാമി സാമി’ എന്ന ഗാനത്തിന് നൃത്തം ചെയ്യുന്നില്ലെന്ന് പറയുകയാണ് രശ്മിക മന്ദാന.

ഒരുപാട് തവണ സാമി സാമിയ്ക്ക് നൃത്തം ചെയ്തുകഴിഞ്ഞന്നെും പ്രായമാവുമ്പോള്‍ നടുവേദന വരുമെന്നും നടി പറഞ്ഞു. ട്വിറ്ററിലൂടെ ആരാധകരുമായി സംവദിക്കുന്ന ‘റഷ് അവര്‍’ എന്ന ചോദ്യോത്തരവേളയില്‍ ഒരാളുടെ ചോദ്യത്തിനുത്തരമായാണ് രശ്മിക തന്റെ തീരുമാനത്തേക്കുറിച്ച് പറഞ്ഞത്.

‘ഒരുപാട് തവണ സാമി സാമിയ്ക്ക് നൃത്തം ചെയ്തുകഴിഞ്ഞു. കുറച്ചുകൂടി പ്രായമാവുമ്പോള്‍ പുറംവേദന വരുമെന്നാണ് തോന്നുന്നത്. എനിക്കുവേണ്ടി നിങ്ങള്‍ക്ക് ഈ ഗാനത്തിന് എന്തുകൊണ്ട് ചുവടുവെച്ചുകൂടാ?’ എന്നായിരുന്നു രശ്മിക ആരാധകന് നല്‍കിയ മറുപടി.

പുഷ്പയുടെ രണ്ടാം ഭാഗമായ ‘പുഷ്പ: ദ റൂള്‍’ ചിത്രീകരണ വേളയിലാണ്. ഫഹദ് ഫാസില്‍ ആണ് ചിത്രത്തില്‍ അല്ലു അര്‍ജുന്റെ പ്രതിനായകനായി എത്തുന്നത്. തെന്നിന്ത്യന്‍ താരം സായ് പല്ലവിയും പുഷ്പ 2വിന്റെ ഭാഗമാകുമെന്ന് റിപ്പോര്‍ട്ടുകളുണ്ട്. ഒരു അതിഥി വേഷത്തിലാകും നടി അഭിനയിക്കുക. മൈത്രി മൂവി മേക്കേഴ്‌സ് നിര്‍മ്മിക്കുന്ന ചിത്രത്തിന് സംഗീതം പകരുന്നത് ദേവി ശ്രീ പ്രസാദ് ആണ്.