വിനയ് ഫോര്‍ട്ട്- ഗ്രേസ് ആൻ്റണി ചിത്രം ‘തമാശ’യിലെ ഗാനത്തിൻ്റെ പ്രൊമോ വീഡിയോ
‘കുമ്പളങ്ങി നൈറ്റ്സ്’ എന്ന സൂപ്പര്‍ഹിറ്റ് ചിത്രത്തിലെ പ്രകടനത്തിലൂടെ ശ്രദ്ധേയയായ ഗ്രേസ് ആൻ്റണിയും വിനയ് ഫോര്‍ട്ടും ഒന്നിക്കുന്ന തമാശയിലെ ഗാനത്തിൻ്റെ പ്രൊമോ വീഡിയോ പുറത്തുവിട്ടു. നവാഗതനായ അഷ്റഫ് രചനയും സംവിധാനവും നിർവഹിക്കുന്ന ചിത്രമാണ് തമാശ. ചിത്രത്തിന്റെ ടൈറ്റിലും ഫസ്റ്റ് ലുക്ക് പോസ്റ്ററും സോഷ്യൽ മീഡിയയിൽ വൈറലായിരുന്നു. റെക്‌സ് വിജയന്‍ ഷഹബാസ് അമന്‍ എന്നിവര്‍ മായാനദിക്കും സുഡാനി ഫ്രം നൈജീരിയക്കും ശേഷം വീണ്ടും ഒന്നിക്കുന്ന ചിത്രം എന്ന പ്രത്യേകത കൂടി ‘തമാശ’യ്ക്കുണ്ട്. തിരക്കഥാകൃത്തും സംവിധായകനുമായ മുഹ്‌സിന്‍ പരാരിയാണു ഗാനത്തിന് വരികള്‍ ഒരുക്കിയിരിക്കുന്നത്.
ഒരിടവേളക്ക് ശേഷം സമീര്‍ താഹിര്‍ ചായഗ്രഹണം നിര്‍വഹിക്കുന്ന റൊമാൻ്റിക്ക് കോമഡി ചിത്രം കൂടിയാണ് ഇത്. ചിത്രത്തില്‍ വിനയ് ഫോര്‍ട്ട് കോളജ് അദ്ധ്യാപകനായാണ് എത്തുന്നത്. ദിവ്യ പ്രഭ, ഗ്രേസ് ആൻ്റണി, ചിന്നു സരോജിനി, എന്നിവരാണ് ചിത്രത്തിലെ നായികമാര്‍. നവാസ് വള്ളിക്കുന്ന്, അരുണ്‍ കുര്യന്‍, ആര്യ സാലിം എന്നിവരാണ് ചിത്രത്തിലെ മറ്റു പ്രധാന കഥാപാത്രങ്ങളെ അവതരിപ്പിക്കുന്നത്.
ഹാപ്പി ഹവേഴ്സ് എൻ്റർടെയ്ൻമെൻ്റ്സിൻ്റെ ബാനറിൽ സമീർ താഹിറും ഷൈജു ഖാലിദും ചേർന്നാണ് ചിത്രം നിർമിക്കുന്നത്. ഈ ബാനറിൽ സമീറും ഷൈജുവും ആദ്യം നി‌ർമിച്ച ചിത്രം സുഡാനി ഫ്രം നൈജീരിയയായിരുന്നു. വിനയ് ഫോര്‍ട്ട് വാർത്തകൾ ഇതുവരെ എന്ന സിനിമയിൽ നായകനായി അഭിനയിച്ച് വരികയാണിപ്പോള്‍. തമാശയുടെ ഷൂട്ടിങ് ഉടൻ ആരംഭിക്കും.
സമീര്‍ താഹിര്‍, ഷൈജു ഷാലിദ്, ലിജോ ജോസ് പെല്ലിശ്ശേരി, ചെമ്പന്‍ വിനോദ് ജോസ് എന്നിവര്‍ ചേര്‍ന്ന് നിര്‍മ്മിക്കുന്ന ചിത്രം നവാഗതനായ അഷ്റഫ് ഹംസയാണ് തിരക്കഥ എഴുതി സംവിധാനം ചെയ്യുന്നത്. ചിത്രം ഈദ് റിലീസ് ആയി തിയേറ്ററുകളില്‍ എത്തും.
Vinay fort new movie Thamasha…
