Malayalam
സിനിമ കാണാനാവാത്തതിലെ രോഷം തിയേറ്ററുകളില്‍ തീര്‍ക്കരുത്; ആരാധകരോട് അഭ്യര്‍ത്ഥനയുമായി കിച്ച സുദീപും നിര്‍മ്മാതാവും
സിനിമ കാണാനാവാത്തതിലെ രോഷം തിയേറ്ററുകളില്‍ തീര്‍ക്കരുത്; ആരാധകരോട് അഭ്യര്‍ത്ഥനയുമായി കിച്ച സുദീപും നിര്‍മ്മാതാവും
കൊവിഡ് പശ്ചാത്തലത്തില്‍ നിരവധി തവണ റിലീസ് മാറ്റിവെയ്ക്കപ്പെട്ട് ആരാധകര്‍ ഏറെ ആകാംക്ഷയോടെ കാത്തിരിക്കുന്ന ചിത്രമാണ് ‘കൊട്ടിഗൊബ്ബ 3’. കഴിഞ്ഞ ദിവസം തിയേറ്ററുകളിലെത്തുമെന്ന് പ്രഖ്യാപിക്കപ്പെട്ടിരുന്ന ചിത്രം കാണാന്‍ പുലര്‍ച്ചെ മുതല്‍ ആരാധകരുടെ നീണ്ട നിരയായിരുന്നു.
എന്നാല്‍ നിര്‍മ്മാതാവുമായി ബന്ധപ്പെട്ട ചില സാമ്പത്തിക ഇടപാടുകളിലെ അനിശ്ചിതത്വം മൂലം ചിത്രം റിലീസ് ചെയ്യപ്പെട്ടിരുന്നില്ല. ഇതിനെത്തുടര്‍ന്ന് കര്‍ണ്ണാടകയുടെ വിവിധ ഭാഗങ്ങളില്‍ സിനിമാപ്രേമികള്‍ അക്രമാസക്തരായിരുന്നു. പിന്നാലെ നിര്‍മ്മാതാവും കിച്ച സുദീപും അഭ്യര്‍ഥനകളുമായി എത്തിയിരുന്നു.
ചിത്രം റിലീസ് ചെയ്യപ്പെടാത്തതില്‍ താന്‍ വ്യക്തിപരമായി ക്ഷമ ചോദിക്കുന്നുവെന്നും എന്നാല്‍ സിനിമ കാണാനാവാത്തതിലെ രോഷം തിയേറ്ററുകളില്‍ തീര്‍ക്കരുതെന്നും ആരാധകരോട് സുദീപ് അഭ്യര്‍ഥിച്ചു. ഭാവിയില്‍ ഇത്തരം സംഭവങ്ങള്‍ ആവര്‍ത്തിക്കാതിരിക്കാന്‍ തന്റെ ശ്രദ്ധയുണ്ടാവുമെന്നും സുദീപ് ട്വീറ്റ് ചെയ്തു.
എന്നാല്‍ സാന്‍ഡല്‍വുഡിനുള്ളിലെ തന്നെ ചില ഗൂഢാലോചനകള്‍ കാരണമാണ് ചിത്രത്തിന്റെ റിലീസ് ഒരു ദിവസം മുടങ്ങിയത് എന്നായിരുന്നു നിര്‍മ്മാതാവ് ശൂരപ്പ ബാബുവിന്റെ പ്രതികരണം. ഈ സമയത്ത് കിച്ച സുദീപ് ആരാധകര്‍ ചിത്രത്തിനൊപ്പം നില്‍ക്കുകയാണ് വേണ്ടതെന്നും നിര്‍മ്മാതാവ് അഭ്യര്‍ഥിച്ചു.
നിര്‍മ്മാതാവിന്റെ വീഡിയോ സന്ദേശത്തിനു പിന്നാലെ കിച്ച സുദീപും സോഷ്യല്‍ മീഡിയയിലൂടെ തന്റെ വീഡിയോ പ്രതികരണം പങ്കുവച്ചു. താങ്കള്‍ക്കെതിരെ പ്രവര്‍ത്തിച്ചത് ആരാണെന്ന് തനിക്കറിയാമെന്ന് പറഞ്ഞുകൊണ്ടുള്ളതായിരുന്നു സുദീപിന്റെ വീഡിയോ.
