ഷാരൂഖ് ഖാൻ ചിത്രം ജവാന്റെ ക്ലിപ്പുകൾ ഓൺലൈനിൽ; പരാതി നൽകി ഭാര്യ ഗൗരി ഖാൻ

‘പത്താന്റെ വൻ വിജയത്തിന് ശേഷം ഷാരൂഖ് ഖാന്റെ അടുത്ത ആക്ഷൻ ചിത്രമായ ജവാനിലാണ് ഇപ്പോൾ എല്ലാവരുടെയും ശ്രദ്ധ. എന്നാൽ വിവിധ സിനിമാ ക്ലിപ്പുകൾ ഓൺലൈനിൽ പോസ്റ്റ് ചെയ്തതായി കണ്ടെത്തിയതിനെത്തുടർന്ന് ഷാരൂഖ് ഖാന്റെ ഭാര്യ , ഗൗരി ഖാൻ പരാതി നൽകി. ഷാരൂഖ് ഖാന്റെ പ്രൊഡക്ഷൻ ഹൗസായ റെഡ് ചില്ലീസ് എന്റർടൈൻമെന്റും ഭാര്യ ഗൗരി ഖാനും അഞ്ച് ട്വിറ്റർ ഉപയോക്താക്കൾ ചിത്രത്തിന്റെ റിലീസിന് മുമ്പ് മൈക്രോ ബ്ലോഗിംഗ് സൈറ്റിൽ സിനിമയുടെ വീഡിയോ ക്ലിപ്പുകൾ മോഷ്ടിച്ച് ചോർത്തി എന്നാണ് നിർമ്മാതാക്കൾ പരാതി ഉയർത്തുന്നത്. ഷാരൂഖിന്റെ ഈ വർഷത്തെ ഏറ്റവും വലിയ രണ്ടാമത്തെ ചിത്രമായ ജവാൻ ഏറെ പ്രതീക്ഷയോടെയാണ് റിലീസിന് തയ്യാറെടുക്കുന്നത്. ഇതിനിടെയാണ് ജവാന്റെ വീഡിയോ ക്ലിപ്പുകൾ ഓൺലൈനിൽ ചോർന്നതിനെക്കുറിച്ചുള്ള വാർത്തകൾ പുറത്തു വരുന്നത്.

വിവരസാങ്കേതിക നിയമപ്രകാരം മോഷണം നടത്തിയെന്ന് ആരോപിച്ച് ഓഗസ്റ്റ് 10, വ്യാഴാഴ്ച മുംബൈയിലെ സാന്താക്രൂസ് പോലീസ് സ്റ്റേഷനിൽ എഫ്‌ഐആർ രജിസ്റ്റർ ചെയ്തു.എഫ്‌ഐആർ പ്രകാരം, ഷാരൂഖ് ഖാൻ നായകനായ ചിത്രത്തിന്റെ ‘മോഷ്ടിച്ച’ ക്ലിപ്പുകൾ സോഷ്യൽ മീഡിയയിൽ പങ്കിട്ടു. ജവാന്റെ വീഡിയോ ക്ലിപ്പുകൾ ചില ട്വിറ്റർ ഉപയോക്താക്കൾ ഓൺലൈനിൽ ചോർത്തിയതായി പ്രൊഡക്ഷൻ ഹൗസ് കണ്ടെത്തിയതായും എഫ്‌ഐആറിൽ പറയുന്നു.

അന്വേഷണത്തിന് ശേഷം, അഞ്ച് ട്വിറ്റർ ഹാൻഡിലുകൾ തിരിച്ചറിഞ്ഞു, അവയിലൂടെയാണ് ചിത്രത്തിന്റെ വീഡിയോ ക്ലിപ്പുകൾ ചോർന്നത്. അവർക്ക് നിയമപരമായ അറിയിപ്പുകൾ അയച്ചു. ഉപയോക്താക്കളിൽ ഒരാൾ മാത്രമാണ് അറിയിപ്പ് അംഗീകരിച്ചത്.

ആറ്റ്‌ലി കുമാർ സംവിധാനം ചെയ്ത ജവാൻ ഏറെ പ്രതീക്ഷയോടെ കാത്തിരിക്കുന്ന ഒരു ആക്ഷൻ-ത്രില്ലറാണ്. റെഡ് ചില്ലീസ് എന്റർടെയ്ൻമെന്റിന്റെ കീഴിൽ ഷാരൂഖ് ഭാര്യ ഗൗരി ഖാനും ഗൗരവ് ഗുപ്തയും ചേർന്നാണ് ജവാൻ നിർമ്മിക്കുന്നത്. കിംഗ് ഖാനെ കൂടാതെ തെന്നിന്ത്യൻ സൂപ്പർ താരങ്ങളായ നയൻതാര, വിജയ് സേതുപതി എന്നിവരും ചിത്രത്തിൽ പ്രധാന കഥാപാത്രങ്ങളെ അവതരിപ്പിക്കുന്നു. ദീപിക പദുക്കോണും പ്രത്യേക വേഷത്തിൽ എത്തുന്നുണ്ട്. ഹിന്ദി, തമിഴ്, തെലുങ്ക് ഭാഷകളിൽ ചിത്രം സെപ്റ്റംബർ 7 ന് ലോകമെമ്പാടും റിലീസ് ചെയ്യും.