നടിയും ഗായികയും നര്‍ത്തകിയുമായ ചിത്ത റിവേര അന്തരിച്ചു

പ്രശസ്ത നടിയും ഗായികയും നര്‍ത്തകിയുമായ ചിത്ത റിവേര (91)അന്തരിച്ചു. വാര്‍ധക്യസഹജമായ രോഗങ്ങളെ തുടര്‍ന്ന് ന്യൂയോര്‍ക്കിലെ വസതിയിലായിരുന്നു അന്ത്യം. സ്‌കൂള്‍ ഓഫ് ബാലേയിലൂടെ കലാരംഗത്തെത്തിയ റിവേര ബ്രോഡ്‌വേ നാടകവേദികളിലൂടെയാണ് അഭിനയരംഗത്ത് പ്രശസ്തി നേടുന്നത്.

ഗയ്‌സ് ആന്റ് ഡോള്‍സ്, കാന്‍ കാന്‍, ഷിക്കാഗോ, കിസ് ഓഫ് ദ സ്‌പൈഡര്‍ വുമണ്‍, ദ റിങ്ക്, ജെഫീസ് ഗേള്‍സ് തുടങ്ങി ഒട്ടേറെ നാടകങ്ങളില്‍ അഭിനയിച്ചിട്ടുണ്ട്, രണ്ടു തവണ ടോണി അവാര്‍ഡ് ജേതാവാകുകയും ചെയ്തു. ഡ്രാമ ലീഗ് അവാര്‍ഡ്, ഡ്രാമ ടെസ്‌ക് അവാര്‍ഡ് തുടങ്ങിയ പുരസ്‌കാരങ്ങളും റിവേരയെ തേടിയെത്തി.

2009ല്‍ അമേരിക്കന്‍ പ്രസിഡന്റ് ബരാക്ക് ഒബാമ പ്രസിഡന്‍ഷ്യല്‍ മെഡല്‍ ഓഫ് ഫ്രീഡം നല്‍കി ആദരിച്ചു. 1969ല്‍ പുറത്തിറങ്ങിയ ‘സ്വീറ്റ് ചാരിറ്റി’യിലൂടെയാണ് സിനിമയില്‍ ശ്രദ്ധ നേടുന്നത്.

ഒട്ടേറെ മ്യൂസിക്കല്‍ സിനിമകളുടെയും ഡോക്യുമെന്ററികളുടെയും ടെലിവിഷന്‍ ഷോകളുടെയും ഭാഗമാവുകയും ഒട്ടേറെ അംഗീകാരങ്ങള്‍ നേടുകയും ചെയ്തിട്ടുണ്ട്. 2021ല്‍ റിലീസ് ചെയ്ത ‘ടിക് ടിക്… ബൂം’ ആണ് അവസാന ചിത്രം.

നര്‍ത്തകനും നടനും നൃത്തസംവിധായകനുമായ ടോണി മോര്‍ഡെന്റിനെ റിവേര 1957ല്‍ വിവാഹം ചെയ്തു. വെസ്റ്റ് സൈഡ് സ്‌റ്റോറിയിലെ സഹതാരമായിരുന്നു അദ്ദേഹം.

1958ല്‍ റിവേരയ്ക്കും മോര്‍ഡെന്റിനും മകള്‍ (ലിസ മോര്‍ഡെന്റ്) പിറന്നു. 1966ല്‍ ഇവര്‍ വിവാഹമോചിതരായി. മാതാപിതാക്കളുടെ പാത തുടര്‍ന്ന ലിസ ഇന്ന് അമേരിക്കയിലെ അറിയപ്പെടുന്ന നര്‍ത്തകിയും ഗായികയും നടിയുമാണ്.