ചന്ദ്രമുഖിയുടെ രണ്ടാം ഭാഗം വരുന്നു ; രജനിക്കു പകരം ലോറൻസ്!

മലയാള സിനിമയുടെ എക്കാലത്തെയും സൂപ്പര്‍ ഹിറ്റ് ചിത്രമായ മണിച്ചിത്രത്താഴിന്റെ തമിഴ് പതിപ്പ് ചന്ദ്രമുഖിയുടെ രണ്ടാം ഭാഗം പ്രഖ്യാപിച്ചു. ചന്ദ്രമുഖി 2 എന്നാണ് ചിത്രത്തിനു പേരിട്ടിരിക്കുന്നത്.എന്നാല്‍ രണ്ടാം ഭാഗത്തില്‍ രജനികാന്ത് ഇല്ല എന്നതാണ് ശ്രദ്ധേയം. രാഘവ ലോറന്‍സ് ആണ് ചിത്രത്തില്‍ നായകന്‍.

ലോറന്‍സിനൊപ്പം വടിവേലുവും ഒരു പ്രധാന കഥാപാത്രത്തെ അവതരിപ്പിക്കും. ചന്ദ്രമുഖിയിലും വടിവേലു അഭിനയിച്ചിരുന്നു. ചിത്രത്തിലെ മറ്റ് അഭിനേതാക്കളുടെ വിവരങ്ങള്‍ പുറത്തുവിട്ടിട്ടില്ല.ലൈക്ക പ്രൊഡക്ഷന്‍സിന്റെ ഔദ്യോഗിക ട്വിറ്റര്‍ പേജിലൂടെയാണ് ചിത്രത്തിന്റെ പ്രഖ്യാപനം നടന്നത്. ചിത്രത്തിന്റെ ടൈറ്റില്‍ പോസ്റ്ററും പുറത്തുവിട്ടിട്ടുണ്ട്.

പി. വാസുവിന്റെ സംവിധാനത്തില്‍ 2005ലാണ് രജനികാന്തിനെ നായകനാക്കി ചന്ദ്രമുഖി പുറത്തിറങ്ങിയത്. തമിഴ്‌നാട്ടിലെ തിയേറ്ററുകളില്‍ രണ്ടര വര്‍ഷത്തോളം കളിച്ച് വന്‍ വിജയംമാണ് ചിത്രം നേടിയത്.