ഉംറ നിര്‍വഹിച്ചതിന് പിന്നാലെ ജമ്മു കശ്മീരിലെ വൈഷ്ണവോ ദേവി ക്ഷേത്രം സന്ദര്‍ശിച്ച് ഷാരൂഖ് ഖാന്‍

കഴിഞ്ഞ കുറച്ച് ദിവസങ്ങള്‍ക്ക് മുമ്പ് കിംഗ് ഖാന്‍ ഷാരൂഖ് ഖാന്‍ ഉംറ നിര്‍വഹിക്കുന്ന ചിത്രങ്ങള്‍ സോഷ്യല്‍ മീഡിയയില്‍ വൈറലായിരുന്നു. ഇപ്പോഴിതാ ജമ്മു കശ്മീരിലെ വൈഷ്ണവോ ദേവി ക്ഷേത്രം സന്ദര്‍ശിച്ചിരിക്കുകയാണ് ഷാരൂഖ് ഖാന്‍. ഞായറാഴ്ച രാത്രി ഏറെ വൈകിയാണ് നടന്‍ ക്ഷേത്രം സന്ദര്‍ശിച്ചത്.

അംഗരക്ഷകര്‍ക്കൊപ്പമാണ് താരം എത്തിയത്. ഷാരൂഖാന്റെ ക്ഷേത്രദര്‍ശനത്തിന്റെ വിഡിയോ ഇപ്പോള്‍ സോഷ്യല്‍ മീഡിയയില്‍ വൈറലായിട്ടുണ്ട്. ജിദ്ദയില്‍ നടന്ന റെഡ് സി അന്താരാഷ്ട് ചലച്ചിത്രോത്സവത്തില്‍ പങ്കെടുക്കാനെത്തിയപ്പോഴാണ് താരം മക്കയിലെത്തി ഉംറ സ്വീകരിച്ചത്. ഇതിന് പിന്നാലെയാണ് ക്ഷേത്രദര്‍ശനം നടത്തിയത്.

അതേസമയം ഷാരൂഖ് ഖാന്റ ഏറ്റവും പുതിയ ചിത്രമായ പത്താന്റെ റിലീസിനായി കാത്തിരിക്കുകയാണ് ആരാധകര്‍. ദീപിക പദുകോണാണ് നായിക. നടന്‍ ജോണ്‍ എബ്രാഹാമും ചിത്രത്തില്‍ ഒരു പ്രധാനകഥപാത്രത്തെ അവതരിപ്പിക്കുന്നുണ്ട്. ജനുവരി 25 നാണ് ചിത്രം പ്രദര്‍ശനത്തിനെത്തുന്നത്.