തന്റെ അറസ്റ്റ് നിയമവിരുദ്ധമായി പ്രഖ്യാപിക്കണം; അപേക്ഷ നൽകി സെയ്ഫ് അലി ഖാനെ കുത്തിയ കേസിൽ അറസ്റ്റിലായ പ്രതി

കുറച്ച് നാളുകൾക്ക് മുമ്പായിരുന്നു നടൻ സെയ്ഫ് അലി ഖാന് കുത്തേറ്റ സംഭവം വലിയ വാർത്തായായിരുന്നത്. ഇപ്പോഴിതാ തന്റെ അറസ്റ്റ് നിയമവിരുദ്ധമായി പ്രഖ്യാപിക്കണമെന്ന് ആവശ്യപ്പെട്ട് അപേക്ഷ നൽകിയിരിക്കുകയാണ് കേസിലെ പ്രതി ഹമ്മദ് ഷരീഫുൾ ഇസ്ലാം. ഡൽഹി കോടതിയിൽ ആണ് അപേക്ഷ നൽകിയിരിക്കുന്നത്.

മുംബൈയിലെ ആർതർ റോഡ് ജയിലിൽ ആണ് പ്രതിയായ ബംഗ്ലാദേശി പൗരൻ മുഹമ്മദ് ഷരീഫുൾ ഇസ്ലാം (30) കഴിയുന്നത്. കഴിഞ്ഞ ദിവസം, ഇയാൾ സെഷൻസ് കോടതിയിൽ സമർപ്പിച്ച ജാമ്യാപേക്ഷ പിൻവലിച്ചിരുന്നു. പിന്നീട്, തന്റെ അറസ്റ്റ് നിയമവിരുദ്ധമാണെന്ന് പ്രഖ്യാപിക്കണമെന്നും ജയിലിൽ നിന്ന് മോചിപ്പിക്കണമെന്നും ആവശ്യപ്പെട്ട് പ്രതി തന്റെ അഭിഭാഷകൻ അജയ് ഗാവ്‌ലി മുഖേന ഫസ്റ്റ് ക്ലാസ് ജുഡീഷ്യൽ മജിസ്‌ട്രേറ്റ് മുമ്പാകെ അപേക്ഷ സമർപ്പിക്കുകയായിരുന്നു.

ഭാരതീയ നാഗരിക് സുരക്ഷ സംഹിത (ബി.എൻ.എസ്.എസ്)യുടെ സെക്ഷൻ 47 അന്വേഷണ ഏജൻസി വ്യക്തമായി അവഗണിച്ചാണ് അറസ്റ്റ് ചെയ്തിരിക്കുന്നുവെന്ന് ഹരജിയിൽ പറയുന്നു. അറസ്റ്റ് ചെയ്യപ്പെടുമ്പോൾ തന്നെ ഒരാളെ അറസ്റ്റ് ചെയ്യാനുള്ള കാരണങ്ങളെക്കുറിച്ചും ജാമ്യത്തിനുള്ള അവകാശത്തെക്കുറിച്ചും അറിയിക്കുന്നതാണ് ഈ വ്യവസ്ഥ.

പ്രതിക്കെതിരെ ചുമത്തിയിരിക്കുന്ന കുറ്റകൃത്യത്തിന്റെ എല്ലാ വിവരങ്ങളും പൊലീസ് രേഖാമൂലം അറിയിച്ചിട്ടില്ലെന്ന് ഹർജിയിൽ വാദിച്ചു. ഈ നിർബന്ധിത വ്യവസ്ഥകൾ പാലിക്കുന്നുണ്ടെന്ന് കാണിക്കുന്നതിന് അനുബന്ധ രേഖകളൊന്നും ലഭ്യമല്ലെന്നും കൂട്ടിച്ചേർത്തു. പൊലീസിനോട് മറുപടി നൽകാൻ കോടതി ആവശ്യപ്പെട്ടിട്ടുണ്ട്. കേസ് മേയ് 13 ലേയ്ക്ക് മാറ്റി വെച്ചു.