ബോളിവുഡ് നടന്‍ അഭിഷേക് ബച്ചന് ചിത്രീകരണത്തിനിടെ പരിക്ക്, മുംബൈ ലീലാവതി ആശുപത്രിയില്‍ ചികിത്സയിൽ

ബോളിവുഡ് നടന്‍ അഭിഷേക് ബച്ചന് ചിത്രീകരണത്തിനിടെ പരിക്കേറ്റതിനെ തുടർന്ന് താരത്തെ ആശുപത്രിയില്‍ പ്രവേശിപ്പിച്ചു വലത് കൈക്കാണ് താരത്തിന് പരിക്കേറ്റത്. നിലവില്‍ അഭിഷേക് മുംബൈ ലീലാവതി ആശുപത്രിയില്‍ ചികിത്സയിലാണ്.

ഇന്നലെ പിതാവ് അമിതാഭ് ബച്ചനും സഹോദരി ശ്വേതാ ബച്ചനും അഭിഷേകിനെ കണ്ടിരുന്നു. ആര്‍ പാര്‍ഥിപന്‍ സംവിധാനം ചെയ്ത അഭിനയിച്ച ‘ഒത്ത സെരുപ്പ് സൈസ് 7’ എന്ന ചിത്രത്തിന്റെ ഹിന്ദി റീമേക്കില്‍ അഭിനയിക്കവെയാണ് താരത്തിന് അപകടം സംഭവിച്ചത്.

ബോബ് ബിസ്വാസ് എന്ന ചിത്രമാണ് ഷൂട്ടിങ്ങ് തുടങ്ങാനിരിക്കുന്ന അഭിഷേകിന്റെ മറ്റൊരു സിനിമ. ചിത്രത്തില്‍ ചിത്രാങ്കത സിങ്ങും കേന്ദ്ര കഥാപാത്രമാണ്. കൂടാതെ ദാസ്വി എന്ന ചിത്രത്തിലും അഭിഷേക് കേന്ദ്ര കഥാപാത്രമാണ്. വിദ്യാഭ്യാസമില്ലാത്ത രാഷ്ട്രീയക്കാരന്റെ വേഷമാണ് താരം ചിത്രത്തില്‍ അവതരിപ്പിക്കുന്നത്. യാമി ഗൗതം, നിമ്രത് കൗര്‍ എന്നിവരും ചിത്രത്തിലുണ്ട്.