News
സ്റ്റേജ് ഷോയ്ക്കിടെ ഭോജ്പുരി ഗായികക്ക് വെടിയേറ്റു; സംഭവിച്ചത് ഇങ്ങനെ
സ്റ്റേജ് ഷോയ്ക്കിടെ ഭോജ്പുരി ഗായികക്ക് വെടിയേറ്റു; സംഭവിച്ചത് ഇങ്ങനെ
സ്റ്റേജ് ഷോയ്ക്കിടെ ഗായികക്ക് വെടിയേറ്റു. ബീഹാറിലെ സരണ്‍ ജില്ലയിലെ സെന്‍ദുര്‍വ ഗ്രാമത്തില്‍ നടന്ന പരിപാടിക്കിടെയായിരുന്നു ഗായിക നിഷ ഉപാധ്യായക്ക് വെടിയേറ്റത്.
ഇടത് തുടയില്‍ വെടിയേറ്റ നിഷ ഉപാധ്യായയെ പട്‌നയിലെ സ്വകാര്യ ആശുപത്രിയില്‍ പ്രവേശിപ്പിച്ചു. ഗായികയുടെ ആരോഗ്യനില തൃപ്തികരമാണെന്നാണ് പുറത്ത് വരുന്ന റിപ്പോര്‍ട്ട്. പരിപാടിക്കിടെ ചിലര്‍ വെടിയുതിര്‍ക്കുകയായിരുന്നു.
ഇതിനിടെയായിരുന്നു നിഷയുടെ കാലില്‍ വെടിയേറ്റത്. വെടിവെച്ച ആളുകള്‍ സംഭവ സ്ഥലത്ത് നിന്ന് ഓടി രക്ഷപ്പെട്ടു. ഷോയില്‍ നിന്നുള്ള വീഡിയോകള്‍ സോഷ്യല്‍ മീഡിയയില്‍ വൈറലായതിനെ തുടര്‍ന്നാണ് സംഭവം പുറത്തറിയുന്നത്.
സംഭവത്തില്‍ പരാതിയൊന്നും ലഭിച്ചിട്ടില്ലെന്നും സോഷ്യല്‍ മീഡിയയില്‍ നിന്നാണ് ഇക്കാര്യം അറിഞ്ഞതെന്നും ജന്ത ബസാര്‍ സ്റ്റേഷന്‍ ഹൗസ് ഓഫീസര്‍ നസറുദ്ദീന്‍ ഖാന് മാധ്യമങ്ങളോട് പറഞ്ഞു. സംഭവത്തില്‍ കൂടുതല്‍ വിവരങ്ങള്‍ ശേഖരിച്ചു വരികയാണെന്നും പൊലീസ് വ്യക്തമാക്കി.
ബിഹാറിലെ അറിയപ്പെടുന്ന ഗായികയാണ് നിഷ. സരണ്‍ ജില്ലയിലെ ഗാര്‍ഖ ഗൗഹര്‍ ബസന്ത് സ്വദേശിനിയാണ്.
