Actor
ഞാനിപ്പോള്‍ ബോളിവുഡ് സിനിമകള്‍ കാണുന്നത് നിര്‍ത്തി; നസറുദ്ദീന്‍ ഷാ
ഞാനിപ്പോള്‍ ബോളിവുഡ് സിനിമകള്‍ കാണുന്നത് നിര്‍ത്തി; നസറുദ്ദീന്‍ ഷാ
ബോളിവുഡ് സിനിമകളുടെ ഇപ്പോഴത്തെ അവസ്ഥയില്‍ നിരാശ തോന്നുന്നുവെന്ന് നടന് നസറുദ്ദീന്‍ ഷാ. പണം ഉണ്ടാക്കുക എന്ന ലക്ഷ്യമാല്ലാതെ നല്ല സിനിമകള്‍ ചെയ്യണമെന്ന ലക്ഷ്യത്തോടെ മുന്നോട്ടുവരുന്ന സിനിമാപ്രവര്‍ത്തകരില്‍ മാത്രമാണ് പ്രതീക്ഷയെന്നും അദ്ദേഹം കൂട്ടിച്ചേര്‍ത്തു. കഴിഞ്ഞ നൂറുവര്‍ഷങ്ങളായി ഒരേ തരത്തിലുള്ള സിനിമകള്‍ ഉണ്ടാക്കുന്നുവെന്നും നസറുദ്ദീന്‍ ഷാ പറഞ്ഞു.
”ഞാനിപ്പോള്‍ ഹിന്ദി സിനിമകള്‍ കാണുന്നത് നിര്‍ത്തി. ഹിന്ദി സിനിമ 100 വര്‍ഷങ്ങള്‍ പിന്നിടുന്ന അവസരത്തിലും എന്നില്‍ നിരാശയുണ്ടാക്കുന്നു, നല്ല കാതലില്ലാത്ത സിനിമകള്‍ കാണുമ്പോള്‍. ഒരേ തരത്തിലുള്ള സിനിമകള്‍ കണ്ട് മടത്തു. എനിക്കിപ്പോള്‍ ഇഷ്ടമോ താല്‍പര്യമോ തോന്നുന്നില്ല. ഞാന്‍ മാത്രമല്ല പ്രേക്ഷകരും അധികം വൈകാതെ ഇതേ അവസ്ഥയിലെത്തും.
ഈ അവസ്ഥയില്‍ നിന്നും ബോളിവുഡ് മാറണമെങ്കിലും സാമ്പത്തിക ലക്ഷ്യം മുന്‍നിര്‍ത്തിയല്ലാതെ സിനിമ ഗൗരവകരമായി കാണുന്ന സിനിമാപ്രവര്‍ത്തകര്‍ മുന്നോട്ട് വരണം. വളരെ വൈകിപ്പോയെന്നറിയാം. ആയിരക്കണക്കിനാളുകള്‍ കാണുന്ന സിനിമകളാണ് ഇവിടെ ഉണ്ടാകുന്നത്.
ജനങ്ങള്‍ കാണുംതോറും വീണ്ടും അത്തരം സിനിമകള്‍ ഉണ്ടാക്കപ്പെട്ടുകൊണ്ടിരിക്കും. ഇതെന്നുവരെ ഉണ്ടാകുമെന്ന് ദൈവത്തിന് അറിയാം. സമൂഹത്തിലെ യാഥാര്‍ത്ഥ്യം കാണിക്കുക എന്നത് ഗൗരവമുള്ള സിനിമകള്‍ നിര്‍മിക്കാന്‍ ആഗ്രഹിക്കുന്നവരുടെ ഉത്തരവാദിത്തമാണ്. അതേ സമയം ഇഡി നിങ്ങളുടെ വാതില്‍മുട്ടില്ലെന്നും അല്ലെങ്കില്‍ നിങ്ങള്‍ക്കെതിരേ ഫത്‌വ ഇറങ്ങില്ലെന്നും ഉറപ്പുവരുത്തണം” എന്നും അദ്ദേഹം കൂട്ടിച്ചേര്‍ത്തു.
