പരിഹാസങ്ങളും ട്രോളുകളും അതിരുവിട്ടു; ഡെപ്യൂട്ടി കമ്മീഷണര്‍ക്ക് പരാതി നല്‍കുവാനൊരുങ്ങി മോഹന്‍ലാല്‍ ഫാന്‍ ബോയി സന്തോഷ് വര്‍ക്കി

മോഹന്‍ലാല്‍- ബി ഉണ്ണികൃഷ്ണന്‍ കൂട്ടുക്കെട്ടില്‍ പുറത്തെത്തിയ ചിത്രമായിരുന്നു ആറാട്ട്. ആറാട്ടിന്റെ റിലീസ് ദിവസം പുറത്തുവന്ന ഒരു ആരാധകന്റെ വീഡിയോ വലിയ ശ്രദ്ധ നേടിയിരുന്നു. മോഹന്‍ലാല്‍ ആറാടുകയാണ് എന്ന് പറഞ്ഞ് ട്രോളുകളിലും നിറഞ്ഞ സന്തോഷ് വര്‍ക്കി എന്ന ആരാധകന്‍ ഇപ്പോള്‍ താരമാണ്.

എന്‍ജിനീയര്‍ ആയ സന്തോഷ് വര്‍ക്കി ഫിലോസഫിയില്‍ പിഎച്ച്ഡി ചെയ്യുകയാണ്. മോഹന്‍ലാലിന്റെ എല്ലാ സിനിമകളും ഫസ്റ്റ് ഡേ ഫസ്റ്റ് ഷോ കാണുകയും മോഹന്‍ലാലിനുവേണ്ടി സംസാരിക്കുകയും ചെയ്യുന്ന വ്യക്തിയാണ് സന്തോഷ് വര്‍ക്കി.

സന്തോഷ് ഏറ്റവും അവസാനം പങ്കുവെച്ച ഫേസ്ബുക് കുറിപ്പ് ഇപ്പോള്‍ ചര്‍ച്ചയായി മാറുകയാണ്. തനിക്ക് എതിരെ സോഷ്യല്‍ മീഡിയയില്‍ മുറവിളി കൂട്ടിയവര്‍ക്ക് എതിരെ താന്‍ പരാതി കൊടുക്കുവാന്‍ പോവുകയാണ് എന്നാണ് പറയുന്നത്.

തനിക്കെതിരെ സോഷ്യല്‍ മീഡിയയിലൂടെ മുറവിളി കൂട്ടിയവര്‍ക്കെതിരെ ഡെപ്യൂട്ടി കമ്മീഷണര്‍ക്ക് പരാതി നല്‍കുവാന്‍ പോകുവാണ് എന്ന് തന്റെ ഫേസ്ബുക് കുറിപ്പിലൂടെ സന്തോഷ് വ്യക്തമാക്കി. സോഷ്യല്‍ മീഡിയയിലൂടെ നിരവധി പരിഹാസങ്ങള്‍ക്കും ഭീഷണികള്‍ക്കും താരം കഴിഞ്ഞ ദിവസങ്ങളില്‍ നേരിടേണ്ടി വന്നിരുന്നു.