Malayalam
ഇഷ്ടമല്ലാത്ത ജീവിതത്തില്‍ നിന്ന് വിട്ടു നില്‍ക്കുന്നത് തന്നെയാണ് മരിക്കുന്നതിനെക്കാല്‍ ഭേദം, വിവാഹ മോചനം നേടിയതില്‍ അഭിമാനിക്കുന്നു വെന്ന് നടി സാധിക വേണുഗോപാല്‍
ഇഷ്ടമല്ലാത്ത ജീവിതത്തില്‍ നിന്ന് വിട്ടു നില്‍ക്കുന്നത് തന്നെയാണ് മരിക്കുന്നതിനെക്കാല്‍ ഭേദം, വിവാഹ മോചനം നേടിയതില്‍ അഭിമാനിക്കുന്നു വെന്ന് നടി സാധിക വേണുഗോപാല്‍
കഴിഞ്ഞ ദിവസമാണ് കൊല്ലത്ത് സ്ത്രീധന പീഡനത്തെ തുടര്‍ന്ന് മെഡിക്കല്‍ വിദ്യാര്‍ത്ഥിനിയെ ഭര്‍തൃ ഗൃഹത്തില്‍ മരിച്ച നിലയില്‍ കണ്ടെത്തുന്നത്. ഇതിനു പിന്നാലെ അതേദിവസം തന്നെ സമാന സംഭവങ്ങള്‍ പലയിടത്തായി റിപ്പോര്‍ട്ട് ചെയ്യപ്പെടുകയും ചെയ്തിരുന്നു. സിനിമാ മേഖലയില്‍ നിന്നടക്കം നിരവധി പേരാണ് ഈ വിഷയത്തില്‍ പ്രതികരണവുമായി രംഗത്തെത്തിയത്. ഇപ്പോഴിതാ ഈ വിഷയത്തെ കുറിച്ച് തുറന്ന് പറഞ്ഞിരിക്കുകയാണ് മിനിസ്‌ക്രീനിലൂടെ പ്രേക്ഷകര്‍ക്ക് സുപരിചിതയായ സാധിക വേണുഗോപാല്‍. ഇത്തരം സാഹര്യങ്ങളില്‍ വിവാഹ മോചനം ഒരിക്കലും തെറ്റായ കാര്യമല്ല എന്നാണ് സാധിക വേണു ഗോപാല്‍ പറയുന്നത്.
ഇഷ്ടമല്ലാത്ത ജീവിതത്തില്‍ നിന്ന് വിട്ടു നില്‍ക്കുന്നത് തന്നെയാണ് മരിക്കുന്നതിനെക്കാല്‍ ഭേദം എന്ന് സാധിക പറയുന്നു. വിവാഹ മോചനം നേടിയതില്‍ അഭിമാനിക്കുന്നു എന്ന തരത്തിലുള്ള ഇന്‍സ്റ്റഗ്രാം പോസ്റ്റുകളും നടി പങ്കുവയ്ക്കുന്നുണ്ട്. വിവാഹ മോചനം പറയുന്നത് പോലെ ട്രാജഡി അല്ല. സന്തോഷകരമല്ലാത്ത ഒരു ദാമ്പത്യത്തില്‍ തുടരുന്നു എന്നതാണ് ട്രാജഡി. അത് നിങ്ങളുടെ കുട്ടികളെ പഠിപ്പിക്കുന്നത് സ്നേഹം എന്ന വാക്കിന്റെ തെറ്റായ അര്‍ത്ഥമാണ്. വിവാഹ മോചനം കൊണ്ട് ആരും മരിച്ചിട്ടില്ല’ എന്ന് സാധിക വേണുഗോപാല്‍ ഇന്‍സ്റ്റഗ്രാമില്‍ കുറിച്ചു.
‘ഒരു പുരുഷന്‍ മാറുമെന്നും, വളരുമെന്നും കരുതി വര്‍ഷങ്ങളോളം കാത്തിരിയ്ക്കുന്നതാണ് ഒരു സ്ത്രീ ചെയ്യുന്ന ഏറ്റവും മോശമായ തെറ്റ്’ എന്ന് മറ്റൊരു പോസ്റ്റിലൂടെ സാധിക പറഞ്ഞു. അനുഭവമാണ് ഏറ്റവും വലിയ ഗുരു. പുരുഷന്‍ മാറുന്നതിനെ കുറിച്ചല്ല, മനസ്സിലാക്കുന്നതിനെ കുറിച്ചാണ് പറയുന്നത് എന്നും, അതേ സമയം എല്ലാവരും അങ്ങനെയാണ് എന്ന് പറയുന്നില്ല എന്നും സാധിക പറയുന്നു.
തന്റെ വിവാഹ ജീവിതത്തെ കുറിച്ചും, വിവാഹ മോചനത്തെ കുറിച്ചും മുന്‍പ് ഒരു അഭിമുഖത്തില്‍ സാധിക വേണുഗോപാല്‍ വെളിപ്പെടുത്തിയിരുന്നു. കരിയറും കുടുംബവും എല്ലാം ഉപേക്ഷിച്ച്, മറ്റൊരാളോടൊപ്പം നമ്മള്‍ ജീവിയ്ക്കുമ്പോള്‍ അര്‍ഹിയ്ക്കുന്ന സ്നേഹവും പരിഗണനയും ലഭിക്കണം. അത് ഇല്ലാതായാല്‍ വിവാഹ മോചനമാണ് നല്ലത് എന്നാണ് തന്റെ വിവാഹ മോചനത്തെ കുറിച്ച് സാധിക പറഞ്ഞത്.
വിവാഹമോചനം ശരിയ്ക്കും എന്റെ ആവശ്യമായിരുന്നു എന്നാണ് സാധിക പറയുന്നത്. ഭര്‍ത്താവിന്റെ ഭാഗത്ത് നിന്ന് വന്ന അഭിപ്രായമല്ല. ഒത്തു പോകാന്‍ കഴിയാത്ത ഒരു ബന്ധം, അത് എന്ത് തന്നെയായാലും, ഏറ്റവും ഭംഗിയില്‍ നില്‍ക്കുമ്പോള്‍ കട്ട് ചെയ്യുക എന്നതാണ്. അല്ലാതെ അത് വീണ്ടും വീണ്ടും വഷളാക്കി കൊണ്ടു പോയാല്‍ പരസ്പരം ശത്രുക്കളായി മാറും. അതിനോട് എനിക്ക് താത്പര്യം ഇല്ലാത്തത് കൊണ്ടാണ് വിവാഹ മോചനം ആവശ്യപ്പെട്ടത് എന്നും സാധിക വ്യക്തമാക്കി.
‘സത്യത്തില്‍ ഞങ്ങളുടെ രണ്ട് പേരുടെയും ജാതകം ശരിയ്ക്കും ചേരില്ല. അത് അറിയാവുന്നത് കൊണ്ട് തന്നെ ജാതകം നോക്കാതെയാണ് കല്യാണം കഴിച്ചത്. നിശ്ചയത്തിന് ജാതകം കൂട്ടി കെട്ടുക എന്നൊരു ചടങ്ങുണ്ട്. ജാതകം നോക്കാത്തത് കൊണ്ട് നിശ്ചയം നടത്തിയിട്ടില്ല. താലി കെട്ടലും ചടങ്ങുകളും എല്ലാം ഉണ്ടായിരുന്നു.
വിവാഹ ശേഷം ഞാന്‍ എപ്പോഴും എന്റെ ഭര്‍ത്താവിനോട് പറഞ്ഞിരുന്ന കാര്യം, ഞാന്‍ വളരെ ഇന്റിപെന്റന്റ് ആയി നടന്നിട്ടുള്ള കുട്ടിയാണ്. എന്നിരുന്നാലും വിവാഹ ശേഷം ഒതുങ്ങി ജീവിയ്ക്കാന്‍ ഞാന്‍ തയ്യാറാണ്. എന്നാല്‍ ഒറ്റയ്ക്ക് ചെയ്തു പോയ കാര്യങ്ങള്‍ പിന്നീടങ്ങോട്ട് ഒരാളുടെ സപ്പോര്‍ട്ട് ഓടെ ചെയ്യുമ്പോള്‍ ഞാന്‍ അയാളില്‍ വല്ലാതെ ഡിപ്പന്റഡ് ആവും. അങ്ങനെ ഒരാളില്‍ മാത്രം ഞാന്‍ ഡിപ്പന്റഡ് ആവുമ്പോള്‍ എനിക്ക് ആ ആളിന്റെ പൂര്‍ണ ശ്രദ്ധയും പരിഗണനയും ആവശ്യമാണ്.
ഇമോഷണലി ഞാന്‍ തളര്‍ന്ന് പോവുമ്പോഴെല്ലാം ആള് എന്റെ കൂടെ വേണം. ഞാന്‍ എന്റെ കരിയര്‍ ഉപേക്ഷിച്ച്, വീട്ടുകാരെയും വീടും ഉപേക്ഷിച്ച് ഒരാളുടെ അടുത്ത് വന്ന് നില്‍ക്കുമ്പോള്‍ അയാളുടെ അറ്റന്‍ഷന്‍ ഇല്ലാതെ ജീവിക്കാന്‍ കഴിയില്ല. അത് കിട്ടാതെ വന്നപ്പോള്‍ പല തവണ ഞാന്‍ അദ്ദേഹത്തോട് പറഞ്ഞിട്ടുണ്ട്, ഈ ബന്ധം അധികം മുന്നോട്ട് പോവും എന്ന് തോന്നുന്നില്ല എന്ന്. പല തവണ ഞങ്ങള്‍ അതേ കുറിച്ച് സംസാരിച്ചു. ഒരുപാട് തവണ സംസാരിച്ചിട്ടും മാറ്റമൊന്നും വന്നില്ല. ഒരു ഘട്ടം എത്തിയപ്പോള്‍ എനിക്ക് തീരെ യോജിക്കാന്‍ പറ്റാത്ത അവസ്ഥ വന്നപ്പോള്‍, വേര്‍പിരിയുന്നത് തന്നെയാണ് നല്ലത് എന്ന് തോന്നി.
ഒരിക്കലും അദ്ദേഹം മോശമായ ഒരു വ്യക്തയായിരുന്നു എന്ന് ഞാന്‍ പറയില്ല. അദ്ദേഹത്തിന് അദ്ദേഹത്തിന്റേതായ തിരക്കുകളും പ്രശ്നങ്ങളും ഉണ്ടായിരുന്നു. അത് എനിക്ക് മനസ്സിലാക്കാന്‍ പറ്റുന്നതായിരുന്നുവെങ്കിലും, മാനസികമായി അത് അംഗീകരിക്കാനും പൊരുത്തപ്പെടാനും എനിക്ക് കഴിയാതെ വന്നു. ആദ്യമൊക്കെ വളരെ ശാന്തമായിട്ടാണ് ഞാന്‍ അദ്ദേഹത്തോട് എന്റെ പ്രശ്നങ്ങളെ കുറിച്ച് പറഞ്ഞത്.
എന്നാല്‍ പിന്നെ പിന്നെ എനിക്ക് മാനസികമായി അത് പിരിമുറുക്കമായപ്പോള്‍ ദേഷ്യപ്പെട്ടു സംസാരിക്കാന്‍ തുടങ്ങി. എനിക്ക് എന്നെ തന്നെ നഷ്ടമാവുന്ന ഘട്ടം എത്തിയപ്പോഴാണ് വേര്‍പിരിഞ്ഞത്. ഇപ്പോഴും അദ്ദേഹത്തിനൊപ്പം വിവാഹ ജീവിതത്തോട് താത്പര്യമില്ലെങ്കിലും, നല്ല സുഹൃത്തുക്കളായി തുടരാന്‍ ഞാന്‍ ആഗ്രഹിച്ചിരുന്നു. ഞങ്ങള്‍ രണ്ട് വ്യക്തികള്‍ക്കിടയിലുള്ള പ്രശ്നം കുടുംബത്തെ ബാധിക്കാതെയും ഞാന്‍ ശ്രദ്ധിച്ചു. അദ്ദേഹത്തിന്റെ ബന്ധുക്കളുമായൊക്കെ ഇപ്പോഴും നല്ല ബന്ധമാണ് സൂക്ഷിക്കുന്നത്.
കരിയര്‍ എല്ലാം ഉപേക്ഷിച്ചിട്ടാണ് ഞാന്‍ വിവാഹ ജീവിതത്തിലേക്ക് കടന്നത്. എന്നാല്‍ ദാമ്പത്യ ജീവിതം തകര്‍ന്ന് ഞാന്‍ തിരിച്ചു വന്നപ്പോള്‍ ഇന്‍സ്ട്രി നല്‍കിയ സ്വീകരണം വളരെ നല്ല രീതിയില്‍ തന്നെയായിരുന്നു. എനിക്കൊരിക്കലും കഷ്ടപ്പെടേണ്ടി വന്നില്ല. എല്ലാ നല്ല അവസരങ്ങളും എന്നെ തേടി എത്തുകയായിരുന്നുവെന്നും സാധിക വേണുഗോപാല്‍ പറഞ്ഞു.
