മാസ്‌ക് വെയ്ക്കാതെ അടുത്ത് വന്ന് സെല്‍ഫി എടുക്കാന്‍ ശ്രമിച്ചു, ആരാധകന്റെ ഫോണ്‍ പിടിച്ചു വാങ്ങി നടന്‍ അജിത്ത്

മാസ്‌ക് വെയ്ക്കാതെ സെല്‍ഫി എടുക്കാന്‍ ശ്രമിച്ച ആരാധകന്റെ കയ്യില്‍ നിന്നും ഫോണ്‍ തട്ടിപ്പറിച്ച് നടന്‍ അജിത്ത്. ഇതിന്റെ വീഡിയോ ആണ് സോഷ്യല്‍ മീഡിയയില്‍ ഇപ്പോള്‍ വൈറലായിരിക്കുന്നത്.

തിരുവാണ്‍മിയൂര്‍ സ്‌കൂളിലാണ് അജിത്തും ശാലിനിയും വോട്ട് ചെയ്യാനെത്തിയത്. പ്രിയ താരം എത്തിയതോടെ ബൂത്തില്‍ ആരാധകരും നിറഞ്ഞു. ഇതിനിടയില്‍ ചിലര്‍ അജിത്തിനൊപ്പം സെല്‍ഫി എടുക്കാനുള്ള ശ്രമവും തുടങ്ങി.

എന്നാല്‍ മാസ്‌ക് വെക്കാതെ അടുത്ത് വന്ന് സെല്‍ഫി എടുക്കാന്‍ ശ്രമിച്ച ആരാധകന്റെ കൈയ്യില്‍ നിന്നും അജിത്ത് ഫോണ്‍ തട്ടിപ്പിടിച്ചു വാങ്ങി. അയാളോട് അവിടെ നിന്നും പോകാനും താരം ആവശ്യപ്പെട്ടു.

കോവിഡ് മാനദണ്ഡങ്ങളോ ശാരീരിക അകലമോ പാലിക്കാതെയാണ് ഇയാള്‍ ഫോട്ടോ എടുക്കാനെത്തിയത്. സംഭവത്തിന്റെ വീഡിയോ സോഷ്യല്‍ മീഡിയയില്‍ ചര്‍ച്ചയാവുകയാണ്. ഇതിനെ അനുകൂലിച്ചും പ്രതികൂലിച്ചും നിരവധി പേര്‍ രംഗത്തെത്തിയിട്ടുണ്ട്.