ഞാന്‍ സ്വന്തം ബ്രദറിനെപ്പോലെയാണ് കാണുന്നത് എന്ന് കേട്ടപ്പോൾ ഡിപ്രഷനടിച്ചു; ഇഷ്ടമല്ലെന്ന് പറഞ്ഞാലും കുഴപ്പമില്ലായിരുന്നു; മാളവികയുമായുള്ള വിവാഹത്തെക്കുറിച്ച് തേജസ്
നായികനായകനിലൂടെയായി ശ്രദ്ധിക്കപ്പെട്ട താരങ്ങള്‍ ഏറെയാണ്. പുതിയ സിനിമയിലേക്ക് നായികയേയും നായകനേയും കണ്ടെത്തുന്നതിന് വേണ്ടിയായിരുന്നു ലാല്‍ജോസ് ഈ റിയാലിറ്റി ഷോ സംഘടിപ്പിച്ചത്. ഷോയില്‍ അണിനിരന്നവരെയെല്ലാം അദ്ദേഹം തന്റെ സിനിമകളുടെ ഭാഗമാക്കുകയും ചെയ്തിരുന്നു. മാളവിക കൃഷ്ണദാസും തേജസ് ജ്യോതിയും നായികനായകനില്‍ മത്സരിച്ചവരാണ്. അടുത്തിടെയായിരുന്നു ഇരുവരും വിവാഹിതരാവാന്‍ പോവുകയാണെന്നറിയിച്ചത്. പ്രണയവിവാഹമെന്ന് തോന്നുമെങ്കിലും ഇത് അങ്ങനെയല്ല പക്കാ അറേഞ്ച്ഡ് മാര്യേജാണെന്ന് ഇരുവരും പറയുന്നു. മാളവികയ്‌ക്കൊപ്പം ഡാന്‍സിംഗ് സ്റ്റാര്‍സില്‍ തേജസും അതിഥിയായി എത്തിയപ്പോഴുള്ള വിശേഷങ്ങള്‍ വൈറലായിക്കൊണ്ടിരിക്കുകയാണ്.
നായികനായകനില്‍ മത്സരിച്ചിരുന്ന സമയത്ത് മാളവികയും തേജസും ഒന്നിച്ച് സ്‌കിറ്റ് ചെയ്തിരുന്നു. ജീവിതത്തിലും നിങ്ങള്‍ ഒന്നിച്ചിരുന്നുവെങ്കില്‍ നന്നായേനെ എന്നായിരുന്നു അന്ന് വിധികര്‍ത്താക്കള്‍ അഭിപ്രായപ്പെട്ടത്. വര്‍ഷങ്ങള്‍ക്കിപ്പുറം ഇരുവരും വിവാഹിതരാവുകയാണെന്ന വാര്‍ത്ത വന്നപ്പോള്‍ പഴയ വീഡിയോയും വൈറലായിരുന്നു.
സ്‌പോട്ട് കോറിയോഗ്രാഫി റൗണ്ടില്‍ വരമഞ്ഞളാടിയ എന്ന ഗാനമായിരുന്നു മാളവികയ്ക്കും അന്നയ്ക്കും കിട്ടിയത്. പെട്ടെന്ന് തന്നെ ഇരുവരും പ്ലാന്‍ ചെയ്ത് ഡാന്‍സ് ഗംഭീരമാക്കിയിരുന്നു. ഇത് ഈസിയായെന്നും ഇനി വേറൊരു ഗാനം തരാമെന്നായിരുന്നു ശ്വേത മേനോന്‍ പറഞ്ഞത്. സ്‌റ്റേജ് മുഴുവനും കവര്‍ ചെയ്യണമെന്നും നന്നായി എക്‌സ്പ്രഷന്‍ ഇടണമെന്നും ശ്വേത നിര്‍ദേശിച്ചിരുന്നു. ആദ്യം പകച്ച് പോയെങ്കിലും പെട്ടെന്ന് തന്നെ മാളവിക ചുവടുവെക്കുകയായിരുന്നു.
ഒരുമുറൈ വന്ത് പാര്‍ത്തായ എന്ന ഗാനത്തിലെ തോം തോം എന്ന ഭാഗമെത്തിയപ്പോഴായിരുന്നു തേജസ് വേദിയിലേക്ക് എത്തിയത്. പ്രിയപ്പെട്ടയാളെ പെട്ടെന്ന് മുന്നില്‍ കണ്ടതിന്റെ അമ്പരപ്പിലായിരുന്നു മാളവിക. ആരാണ് ഇത് മാളൂ എന്നായിരുന്നു എല്ലാവരും ചോദിച്ചത്. ഞാന്‍ കല്യാണം കഴിക്കാന്‍ പോവുന്ന ആളാണ് ഇതെന്നായിരുന്നു മാളവിക പറഞ്ഞത്. ഡാന്‍സില്ല
ഡാന്‍സുമായി ഒരു ബന്ധവുമില്ലാത്ത ആളാണ് ഞാന്‍. ഞങ്ങള്‍ നേരത്തെ ഒരു റിയാലിറ്റി ഷോയിലുണ്ടായിരുന്നു. അതില്‍ എന്റെ കൂടെ ഡാന്‍സ് കളിക്കാന്‍ ഒട്ടും താല്‍പര്യമില്ലാത്ത ആളായിരുന്നു മാളു. എന്നോട് നേരിട്ട് പറഞ്ഞിട്ടില്ല, അങ്ങേര്‍ക്കൊട്ടും ടൈമിംഗില്ല, അങ്ങേരുടെ കൂടെ എന്നെ ഇടരുത് എന്ന് പറഞ്ഞതായി ഞാന്‍ അറിഞ്ഞിട്ടുണ്ട്.
ആ ആള്‍ എന്റെ ലൈഫ് പാര്‍ട്‌നറായി ജീവിതകാലം മുഴുവനും കൂടെയുണ്ടാവും. വേറെ ഏതെങ്കിലും പാട്ടാണെങ്കില്‍ ഞങ്ങള്‍ എന്തെങ്കിലും കാണിച്ചേനെ. ഇത് പക്കാ അറേഞ്ചഡ് മാര്യേജാണ്. അന്ന് എനിക്ക് 24 വയസും മാളൂന് 18 മായിരുന്നു. ഞങ്ങള്‍ ഒട്ടും യോജിക്കാത്തവരായിരുന്നു. പിന്നെ നല്ല കമ്പനിയായി. കല്യാണം ആലോചിക്കുന്ന സമയത്താണ് ഞാന്‍ മാളുവിനോട് ചോദിച്ചത്. കല്യാണം കഴിക്കാന്‍ ഈ കുട്ടി ഓക്കെയാണ്, അങ്ങനെയാണ് സിംഗിളാണോ എന്ന് ചോദിച്ചത്.എന്താ ഇങ്ങനെ ചോദിക്കുന്നത്. അല്ല, കല്യാണം കഴിച്ചാല്‍ കൊള്ളാമെന്നുണ്ടെന്ന് പറഞ്ഞപ്പോള്‍ തേജസേട്ടനെ ഞാന്‍ സ്വന്തം ബ്രദറിനെപ്പോലെയാണ് കാണുന്നതെന്നായിരുന്നു മറുപടി. അതുകേട്ടതും ഞാന്‍ ഡിപ്രഷനടിച്ചു. ഇഷ്ടമല്ലെന്ന് പറഞ്ഞാലും കുഴപ്പമില്ലായിരുന്നു. ബ്രദറാക്കിയതായിരുന്നു എന്നെ തളര്‍ത്തിയത്. ഒരാഴ്ച ഞാന്‍ മിണ്ടിയതേയില്ല. അതുകഴിഞ്ഞ് മാളു ഇങ്ങോട്ട് സംസാരിച്ച് തുടങ്ങി. ഞാന്‍ വിട്ടില്ല, അതില്‍ പിടിച്ച് കയറി.
