മാത്യുവിനെ ലോകേഷ് വെറുതെ കാസ്റ്റ് ചെയ്തതല്ല, കാര്യമുണ്ട്!; വൈറലായി ആ ചിത്രങ്ങള്‍

തെന്നിന്ത്യന്‍ പ്രേക്ഷകര്‍ ഏറെ കാത്തിരുന്ന ചിത്രമാണ് ലിയോ. ലോകേഷ് കനകരാജ് – വിജയ് കൂട്ടുകെട്ടില്‍ പുറത്തെത്തിയ ചിത്രം കളക്ഷന്‍ റെക്കോര്‍ഡുകള്‍ തിരുത്തി മുന്നേറുകയാണ്. വമ്പന്‍ താരനിരയാണ് ചിത്രത്തില്‍ അണിനിരക്കുന്നത്. അതേസമയം മലയാളിയായ മാത്യു തോമസിന്റെ പ്രകടനത്തിന് നിരവധി പ്രശംസകളാണ് കിട്ടികൊണ്ടിരിക്കുന്നത്. വിജയിയുടെ മകനായാണ് ചിത്രത്തില്‍ മാത്യു എത്തുന്നത്.

മാത്യുവിനെ ലോകേഷ് കനകരാജ് വെറുതെ കാസ്റ്റ് ചെയ്തതല്ല. കുട്ടിക്കാലത്തെ വിജയിയുടെ രൂപവുമായി നല്ല സാമ്യമാണ് മാത്യുവിന്. സോഷ്യല്‍ മീഡിയയില്‍ രണ്ടുപേരുടെയും ചിത്രങ്ങള്‍ വെച്ച് ആരാധകര്‍ ഇത് ചര്‍ച്ച ചെയ്യുന്നുണ്ട്.

‘തന്റെ ചിത്രങ്ങള്‍ കണ്ട ശേഷമാണ് ലിയോയിലേക്ക് വിളിച്ചത് എന്നാണ് മാത്യു പറഞ്ഞത്. നേരിട്ടാണ് വിളിച്ചത്. ആദ്യം ആരോ കളിയാക്കാന്‍ ചെയ്തതാണ് എന്നാണ് കരുതിയത്. പിന്നെയാണ് ഒറിജിനല്‍ വിളിയാണെന്ന് മനസിലായത്. ഓഡിഷന്‍ ഒന്നും ഉണ്ടായിരുന്നില്ല.’ എന്നാണ് മുന്‍പ് ഒരു അഭിമുഖത്തില്‍ മാത്യു പറഞ്ഞത്.

അതേസമയം ബോക്‌സ് ഓഫീസില്‍ വന്‍ കുതിപ്പാണ് ലോകേഷ് വിജയ് കൂട്ടുക്കെട്ടിലിറങ്ങിയ ‘ലിയോ’ നടത്തികൊണ്ടിരിക്കുന്നത്. ഇന്ത്യന്‍ സിനിമയില്‍ സമീപകാലത്ത് ലഭിച്ച ഏറ്റവും ഉയര്‍ന്ന ഓപ്പണിംഗ് കളക്ഷന്‍ ആയിരുന്നു ലിയോക്ക് ലഭിച്ചത്. ഷാരൂഖ് ഖാന്‍ ചിത്രങ്ങളായ ‘പഠാന്‍’, ‘ജവാന്‍’ എന്നീ ചിത്രങ്ങളെ പിന്നിലാക്കിയാണ് ലിയോയുടെ കുതിപ്പ്. ഇതുവരെ 461 കോടി രൂപയാണ് ചിത്രം ആഗോള കളക്ഷനായി നേടിയിരിക്കുന്നത്. കേരളത്തില്‍ നിന്നുമാത്രം 41 കോടി രൂപയാണ് ചിത്രം നേടിയത്.

തൃഷ, സഞ്ജയ് ദത്ത്, അര്‍ജുന്‍ സര്‍ജ, ഗൗതം മേനോന്‍, മിഷ്‌കിന്‍, മാത്യു തോമസ്, മന്‍സൂര്‍ അലി ഖാന്‍, പ്രിയ ആനന്ദ്, സാന്‍ഡി, ജനനി, അഭിരാമി വെങ്കിടാചലം, ബാബു ആന്റണി എന്നിവരാണ് ചിത്രത്തിലെ മറ്റ് താരങ്ങള്‍. സെവന്‍ സ്‌ക്രീന്‍ സ്റ്റുഡിയോ, ദി റൂട്ട് എന്നിവയുടെ ബാനറുകളില്‍ ലളിത് കുമാറും ജഗദീഷ് പളനിസാമിയും ചേര്‍ന്നാണ് ലിയോ നിര്‍മിച്ചത്.