Malayalam
അവതാര്‍ 2 വിനെയും മറികടന്ന് കണ്ണൂര്‍ സ്‌ക്വാഡ്; പുതിയ നേട്ടം ഇങ്ങനെ!
അവതാര്‍ 2 വിനെയും മറികടന്ന് കണ്ണൂര്‍ സ്‌ക്വാഡ്; പുതിയ നേട്ടം ഇങ്ങനെ!
കഴിഞ്ഞ രണ്ട് വര്‍ഷമായി ഹിറ്റ് സിനിമകളുമായി എത്തിയ നടനാണ് മമ്മൂട്ടി. ജോര്‍ജ് മാര്‍ട്ടിന്‍ എന്ന പൊലീസ് ഉദ്യോഗസ്ഥനായി മമ്മൂട്ടി നിറഞ്ഞാടിയ ചിത്രം കണ്ണൂര്‍ സ്‌ക്വാഡ്. ബോക്സ് ഓഫീസില്‍ തരംഗമായ ചിത്രം പല റെക്കോര്‍ഡുകളും ഭേദിച്ചിരുന്നു. ഇപ്പോഴിതാ പതുവര്‍ഷം തുടങ്ങുമ്പോള്‍ 2023ലെ പുത്തന്‍ നേട്ടം സ്വന്തമാക്കിയിരിക്കുകയാണ് കണ്ണൂര്‍ സ്‌ക്വാഡ്.
പ്രമുഖ ഒടിടി പ്ലാറ്റ്‌ഫോമായ ഡിസ്‌നി പ്ലസ് ഹോട് സ്റ്റാറിലൂടെയാണ് കണ്ണൂര്‍ സ്‌ക്വാഡ് പുത്തന്‍ നേട്ടം സ്വന്തമാക്കിയിരിക്കുന്നത്. പ്ലാറ്റ് ഫോമിലൂടെ 2023ല്‍ ഏറ്റവും കൂടുതല്‍ ആളുകള്‍ കണ്ട സിനിമ എന്ന ഖ്യാതിയാണ് മമ്മൂട്ടി ചിത്രം സ്വന്തമാക്കിയിരിക്കുന്നത്. എട്ട് സിനിമകളെ പിന്നിലാക്കിയാണ് കണ്ണൂര്‍ സ്‌ക്വാഡ് ഈ നേട്ടം സ്വന്തമാക്കിയിരിക്കുന്നത് എന്നത് ശ്രദ്ധേയമാണ്. സീരീസുകളും ഇക്കൂട്ടത്തിലുണ്ട്.
തെലുങ്ക് ചിത്രം സ്‌കന്ദയാണ് രണ്ടാം സ്ഥാനത്ത് ഉള്ളത്. മൂന്നാം സ്ഥാനത്ത് മലയാളത്തിന്റെ യുവതാരം ദുല്‍ഖര്‍ സല്‍മാന്റെ കിംഗ് ഓഫ് കൊത്തയാണ്. ഗുഡ് നൈറ്റ്, ആബി71 ഇന്ത്യാസ് ടോപ് സീക്രട്ട് മിഷന്‍, ഗാര്‍ഡിയന്‍സ് ഓഫ് ദി ഗ്യാലക്‌സി, പിച്ചൈക്കാരന്‍ 2, അവതാര്‍: ദ വേ ഓഫ് വാട്ടര്‍, രോമാഞ്ചം എന്നിവയാണ് ലിസ്റ്റിലുള്ള മറ്റ് സിനിമകളും സീരീസുകളും.
നവാഗതനായ റോബി വര്‍ഗീസ് രാജ് സംവിധാനം ചെയ്ത ചിത്രമാണ് കണ്ണൂര്‍ സ്‌ക്വാഡ്. 2023 സെപ്റ്റംബര്‍ 28ന് ആയിരുന്നു റിലീസ്. യഥാര്‍ത്ഥ സംഭവത്തെ ആസ്പദമാക്കി ഒരുങ്ങിയ ചിത്രത്തില്‍ അസീസ് നെടുമങ്ങാട്, ശബരീഷ് വര്‍മ, റോണി വര്‍ഗീസ്, വിജയരാഘവന്‍ തുടങ്ങി നിരവധി താരങ്ങള്‍ അണിനിരന്നിരുന്നു. നവംബര്‍ 17ന് ആയിരുന്നു ചിത്രം ഒടിടിയില്‍ എത്തിയത്. ഡിസ്‌നി പ്ലസ് ഹോര്‍ട് സ്റ്റാറിലൂടെ ആയിരുന്നു സ്ട്രീമിംഗ്.
