‘പരാതിപ്പെടാനില്ല, നേരിട്ടിറങ്ങി കുഴിയടച്ചു’, റോഡിലെ കുഴി നികത്തി ഹോളിവുഡ് താരം അര്‍നോള്‍ഡ് ഷ്വാസ്‌നഗര്‍

നിരവധി ആരാധകരുള്ള ഹോളിവുഡ് താരമാണ് അര്‍നോള്‍ഡ് ഷ്വാസ്‌നഗര്‍. ഇപ്പോഴിതാ കാലിഫോര്‍ണിയയിലെ തന്റെ താമസസ്ഥലത്തിനടുത്ത് റോഡില്‍ രൂപപ്പെട്ട കുഴി നേരിട്ടിറങ്ങി നികത്തുകയാണ് നടന്‍.

‘പരാതിപ്പെടാനില്ല, നേരിട്ടിറങ്ങി കുഴിയടച്ചു’ എന്നു കുറിച്ച് കൊണ്ട് അര്‍നോള്‍ഡ് തന്നെയാണ് സമൂഹമാധ്യമങ്ങളിലൂടെ വിവരം പങ്കുവെച്ചത്.

‘റോഡില്‍ രൂപപ്പെട്ട ഭീമന്‍ കുഴി കാറുകള്‍ക്കും സൈക്കിളുകള്‍ക്കും പ്രശ്‌നമാകാന്‍ തുടങ്ങിയിട്ട് ആഴ്ചകളായി. ഞങ്ങള്‍ ഒരു സംഘമായി ചേര്‍ന്ന് കുഴിയടച്ചിട്ടുണ്ട്. ഞാനെപ്പോഴും പറയുന്നതുപോലെ പരാതിപ്പെട്ടിരിക്കാതെ ഇറങ്ങി പ്രവര്‍ത്തിക്കാം,’ വീഡിയോ പങ്കുവെച്ചുകൊണ്ട് അര്‍ണോള്‍ഡ് കുറിച്ചു.

പിന്നാലെ നടന്റെ പ്രവര്‍ത്തിക്ക് അഭിനന്ദനവുമായി കാലിഫോര്‍ണിയയുടെ മുന്‍ മേയര്‍ അടക്കം രംഗത്തുവന്നിട്ടുണ്ട്. എന്നാല്‍ അര്‍ണോള്‍ഡിന്റെ നടപടി സര്‍ക്കാരില്‍ നിന്ന് പിഴ ലഭിക്കാന്‍ കാരണമായേക്കാം എന്ന മുന്നറിയിപ്പും ചിലര്‍ നല്‍കുന്നു. കാലിഫോര്‍ണിയയിലെ മുന്‍ ഗവര്‍ണര്‍ കൂടിയായിരുന്നു അര്‍നോള്‍ഡ് ഷ്വാസ്‌നഗര്‍.