ആട്ടം പ്രാദേശിക ജൂറി തഴഞ്ഞത് വിചിത്രമായി തോന്നുന്നു, ഏറെ വേദന തോന്നി; ആനന്ദ് ഏകർഷി

കഴിഞ്ഞ ദിവസമായിരുന്നു ദേശീയ ചലച്ചിത്ര പുരസ്കാരങ്ങൾ പ്രഖ്യാപിച്ചത്. മികച്ച മലയാള ചിത്രത്തിനുള്ള പുരസ്കാരം ആട്ടം സ്വന്തമാക്കിയിരുന്നു. കൂടാതെ മികച്ച തിരക്കഥയ്ക്കും എഡിറ്റിങ്ങിനുമുളള അവാർഡുകളും ആനന്ദ് ഏകർഷി സംവിധാനം ചെയ്ത ആട്ടം സ്വന്തമാക്കിയിരുന്നു. എന്നാൽ സംസ്ഥാന ചലച്ചിത്ര പുരസ്കാരത്തിൽ ആട്ടത്തിന് അവാർഡുകൾ ഒന്നും തന്നെ ലഭിച്ചിരുന്നില്ല.

ഇപ്പോഴിതാ ഇതിൽ പ്രതികരണമറിയിച്ച് രം​ഗത്തെത്തിയിരിക്കുകയാണ് സംവിധായകൻ ആനന്ദ് ഏകർഷി. ആട്ടം പ്രാദേശികജൂറി തഴഞ്ഞിരുന്നുവെന്നത് വിചിത്രമായി തോന്നുന്നു ഇപ്പോൾ. സംസ്ഥാന പുരസ്കാര നിർണ്ണയത്തിൽ തഴയപ്പെട്ടത് വേദന തോന്നി. പക്ഷേ ആരെയും കുറ്റപ്പെടുത്താനില്ല എന്നുമാണ് അദ്ദേഹം പറഞ്ഞത്.

അതേസമയം ആട്ടം വീണ്ടും പ്രദർശനത്തിനെത്തുകയാണ്. അടുത്ത ആഴ്ച മുതൽ ആയിരിക്കും തിയേറ്ററിലെത്തുക. കൊച്ചി പിവിആറിൽ ആയിരിക്കും ചിത്രം പ്രദർശിപ്പിക്കുക എന്നാണ് അണിയറപ്രവർത്തകർ പറയുന്നത്. നാടകം രക്തത്തിലലിഞ്ഞു ചേർന്ന പന്ത്രണ്ടു പേരുടെ കഥയാണ് ആട്ടം പറയുന്നത്. 11 പുരുഷൻമാരും ഒരു നായികയും.

അരങ്ങ് ട്രൂപ്പിൻറെ നാടകം കണ്ട് ഇഷ്ടപ്പെട്ട വിദേശ ദമ്പതികൾ നാടകക്കാർക്കായി ഒരു പാർട്ടി ഒരുക്കുന്നതും തുടർന്ന് അവിടെ വെച്ചുണ്ടാകുന്ന സംഭവ വികാസങ്ങളിലുമാണ് ചിത്രം മുന്നോട്ട് പോകുന്നത്.പാർട്ടിക്കിടെ കൂട്ടത്തിലെ ഏക അഭിനേത്രിയായ അഞ്ജലിക്കു നേരെ ഒരു അതിക്രമം നടക്കുന്നു.എന്നാൽ ആരാണ് ഈ അതിക്രമം നടത്തിയതെന്ന് വ്യക്തമല്ല. തുടർന്ന് നടക്കുന്ന സംഭവങ്ങളാണ് സിനിമയുടെ ഇതിവൃത്തം.