കരണ്‍ ജോഹറിന്റെ വെബ് സീരീസിന് ആറ് രാജ്യങ്ങളില്‍ വിലക്ക്

കരണ്‍ ജോഹറിന്റെ നിര്‍മ്മാണത്തില്‍ ഒരുങ്ങുന്ന വെബ് സീരീസിന് ആറ് രാജ്യങ്ങളില്‍ വിലക്ക്. കരണ്‍ ജോഹറിന്റെ പ്രൊഡക്ഷന്‍ കമ്പനിയായ ധര്‍മ്മയുടെ ബാനറില്‍ നിര്‍മ്മിച്ച ‘ലവ് സ്‌റ്റോറിയാന്‍’ എന്ന വെബ് സീരിസിനാണ് ആറ് രാജ്യങ്ങളില്‍ വിലക്ക് ഏര്‍പ്പെടുത്തിയിരിക്കുന്നത്.

യുഎഇ, സൗദി അറേബ്യ, തുര്‍ക്കി, ഇന്തോനേഷ്യ, ഈജിപ്ത് എന്നീ രാജ്യങ്ങളാണ് സീരീസിന് വിലക്കേര്‍പ്പെടുത്തിയത്.

ആറ് ദമ്പതികളുടെ പ്രണയകഥ പറയുന്ന സീരീസില്‍ സ്വ വര്‍ഗ പ്രണയത്തെയും ഉള്‍പ്പെടുത്തിയിട്ടുണ്ട്. അതിനാലാണ് സീരീസിനെ ഇസ്ലാമിക രാജ്യങ്ങള്‍ വിലക്കിയത്. അക്ഷ് ഇന്ദികര്‍, അര്‍ച്ചന ഫട്‌കെ, കോളിന്‍ ഡി കുന്‍ഹ, ഹാര്‍ദിക് മേഹ്ത, ഷാസിയ ഇഖ്ബാല്‍, വിവേക് സോണി എന്നിവരാണ് സീരീസിന്റെ സംവിധായകര്‍.

ഇതിലെ ആറാമത്തെ എപ്പിസോഡായ ‘ലവ് ബിയോണ്ട് ലേബല്‍സി’ലാണ് ട്രാന്‍സ്‌ജെന്‍ഡര്‍ പങ്കാളികളായ ടിസ്റ്റ, ദിപ എന്നിവരുടെ കഥ പറയുന്നത്.

ഈ സീരീസ് പ്രഖ്യാപിച്ചതുമുതല്‍ ഏറെ വിവാദങ്ങള്‍ക്ക് വഴിയൊരുക്കിയിരുന്നു. കൊല്‍ക്കത്തയില്‍ താമസിക്കുന്ന ഇവര്‍ ലിംഗമാറ്റ ശസ്ത്രക്രിയയ്ക്കിടെ കണ്ടുമുട്ടുകയും തുടര്‍ന്ന് പ്രണയത്തിലാവുകയും ചെയ്യുന്നതാണ് കഥ.