കെജെ യേശുദാസിന്റെ 84ാം പിറന്നാളിന് 84 ചിത്രങ്ങള്‍ വരച്ച് ആരാധകന്‍

ആയിരം പൗര്‍ണമി ശോഭയില്‍ തിളങ്ങുന്ന ഗാനഗന്ധര്‍വന് സമ്മാനവുമായി ആരാധകന്‍. കെജെ യേശുദാസിന്റെ 84ാം പിറന്നാളിന് 84 ചിത്രങ്ങള്‍ വരച്ച് സ്‌നേഹമറിയിച്ചിരിക്കുകയാണ് എറണാകുളം ചെറായി സ്വദേശിയായ വിനോദ് ഡിവൈന്‍.

യേശുദാസിനോടുള്ള ആരാധനയില്‍ പിറന്നതാണ് ഈ ചിത്രങ്ങളത്രയും. കോവിഡ് കാലത്ത് എല്ലാവരും അടച്ചുപൂട്ടിയിരുന്ന സമയത്താണ് വിനോദ് ചിത്രങ്ങള്‍ വരച്ച് തുടങ്ങിയത്. അങ്ങനെ കൈ അറിയാതെ കാന്‍വാസില്‍ ചിത്രങ്ങള്‍ രൂപപ്പെട്ടു.

അഞ്ച് പത്തായി, പത്ത് ഇരുപതായി..ഒടുവില്‍ 84ല്‍ എത്തി നില്‍ക്കുന്നു. പത്ത് രൂപയുടെ പേന ഉപയോഗിച്ചാണ് വരയ്ക്കുന്നത്. മറ്റുള്ളവര്‍ അയച്ച് തന്നതും ഇന്റര്‍നെറ്റില്‍ പരതിയുമാണ് കാന്‍വാസില്‍ പകര്‍ത്തിയതെന്ന് വിനോദ് പറഞ്ഞു.

ഗാനഗന്ധര്‍വനൊപ്പം പ്രവര്‍ത്തിച്ചവരുടേത് ഉള്‍പ്പെടെ 150 ചിത്രങ്ങളാണ് വിനോദ് വരച്ചിട്ടുള്ളത്. ഇന്ന് ആലുവയില്‍ ചിത്രങ്ങള്‍ പ്രദര്‍ശിപ്പിക്കും. ചെറായി കരുത്തല ജംഗ്ഷനില്‍ കഴിഞ്ഞ 32 വര്‍ഷമായി സ്റ്റിക്കര്‍ കട നടത്തുകയാണ് വിനോദ് ഡിവൈന്‍.