2023ലെ ഏറ്റവും ഉയര്‍ന്ന ഗ്രോസ്സ് കളക്ഷന്‍ നേടിയ ചിത്രം; ബാര്‍ബി ഒടിടിയിലേയ്ക്ക്

ബാര്‍ബി ഡോളിനെ പ്രധാന കഥാപാത്രമാക്കി ഗ്രെറ്റ ഗെര്‍വിഗ് സംവിധാനം ചെയ്ത ചിത്രമാണ് ‘ബാര്‍ബി’. ക്രിസ്റ്റഫര്‍ നോളന്‍ ചിത്രം ‘ഓപ്പണ്‍ഹൈമറി’നോട് ഏറ്റുമുട്ടിയ സിനിമ ആഗോളതലത്തില്‍ റെക്കോഡ് കളക്ഷന്‍ നേടിയാണ് തിയേറ്റര്‍ റണ്‍ അവസാനിപ്പിച്ചത്. ഒടിടിയില്‍ സ്ട്രീമിങ് ആരംഭിക്കാന്‍ ഒരുങ്ങുകയാണ് ചിത്രം.

ആമസോണ്‍ െ്രെപമിലും ബുക്ക് മൈ ഷോയിലും വാടക അടിസ്ഥാനത്തില്‍ നേരത്തെ സിനിമ സ്ട്രീം ചെയ്തിരുന്നു. ഡിസംബര്‍ 21 മുതല്‍ ജിയോ സിനിമയില്‍ സിനിമ ലഭ്യമാകും. 128-145 മില്ല്യണ്‍ ഡോളര്‍ നിര്‍മ്മാണ ചെലവ് കണക്കാക്കുന്ന സിനിമ 1.386 ബില്ല്യണ്‍ ഡോളര്‍ കളക്ഷന്‍ നേടി. 2023ലെ ഏറ്റവും ഉയര്‍ന്ന ഗ്രോസ്സ് കളക്ഷന്‍ ആണ് സിനിമയുടേത്.

മികച്ച സംവിധായകയ്ക്കുള്ള ഓസ്‌കര്‍ നോമിനേഷന്‍ ലഭിച്ച സംവിധായികയാണ് ഗ്രെറ്റ ഗെര്‍വിഗ്. സമൂഹത്തിന്റെ ചട്ടക്കൂടിനുള്ളില്‍ ഒതുങ്ങാത്ത ‘ലേഡി ബേഡ്’, പാട്രിയാര്‍ക്കിയെ പൊളിച്ചെഴുതുന്ന ‘ലിറ്റില്‍ വിമണ്‍’ പോലുള്ള സിനിമകളുടെ സംവിധായിക ബാര്‍ബിയുടെ ലോകത്തെ എങ്ങനെ പൊളിച്ചെഴുതുമെന്ന പ്രതീക്ഷയായിരുന്നു പ്രേക്ഷകര്‍ക്ക്.

മാര്‍ഗോട്ട് റോബിയും റയാന്‍ ഗോസ്ലിംഗും ആയിരുന്നു ബാര്‍ബി, കെന്‍ എന്നീ കഥാപാത്രങ്ങളെ അവതരിപ്പിച്ചത്. ചിത്രം റിലീസ് ചെയ്തതിന് ശേഷം ലോകമെമ്പാടും ബാര്‍ബി പാവകളുടെ വില്‍പ്പനയില്‍ വര്‍ധനയുണ്ടായതായാണ് കണക്കുകള്‍ സൂചിപ്പിക്കുന്നത്.