ബേബി ഒടിടിയിലേക്ക്! റിലീസ് തിയ്യതി പ്രഖ്യാപിച്ചു

വിജയ് ദേവരകൊണ്ടയുടെ സഹോദരന്‍ ആനന്ദ് ദേവരകൊണ്ട നായകനായ ബേബി ഒടിടിയിലേക്ക്. റിലീസിന്‍റെ ആദ്യ ദിനങ്ങളില്‍ തന്നെ പോസിറ്റീവ് മൌത്ത് പബ്ലിസിറ്റി നേടിയ ചിത്രം നിര്‍മ്മാതാക്കള്‍ക്ക് വലിയ ലാഭമാണ് നേടിക്കൊടുത്തത്. ചെറിയ ബജറ്റില്‍ നിര്‍മ്മിക്കപ്പെട്ട ചിത്രം ഒരു മാസം കൊണ്ട് നേടിയത് 91 കോടി രൂപയാണെന്ന് നിര്‍മ്മാതാക്കള്‍ തന്നെ അറിയിച്ചിരുന്നു. റിലീസിന്‍റെ ഒരു മാസത്തിനിപ്പുറമാണ് ചിത്രം ഒടിടി റിലീസിന് ഒരുങ്ങുന്നത്.

അഹ വീഡിയോ എന്ന പ്ലാറ്റ്ഫോമിലൂടെ ഓഗസ്റ്റ് 25 നാണ് ചിത്രം സ്ട്രീമിംഗ് ആരംഭിക്കുക. കേരളത്തില്‍ തിയറ്റര്‍ റിലീസ് ഇല്ലാതിരുന്ന ചിത്രമാണിത്. തെലുങ്കില്‍ വന്‍ വിജയം നേടിയ ഒരു ചിത്രത്തിന് കേരളത്തില്‍ റിലീസ് ഇല്ലാതിരുന്നതിലെ നിരാശ ഇവിടുത്തം പല സിനിമാപ്രേമികളും സോഷ്യല്‍ മീഡിയയിലൂടെ പങ്കുവച്ചിരുന്നു. ഒടിടി റിലീസിലൂടെ അവര്‍ക്കും സിനിമ കാണാം.

വൈഷ്ണവി ചൈതന്യ നായികയായ ചിത്രം ജൂലൈ 14 നാണ് തിയറ്ററുകളില്‍ എത്തിയത്.

കമിംഗ് ഓഫ് ഏജ് റൊമാന്‍റിക് ഡ്രാമ വിഭാഗത്തില്‍ പെടുന്ന ചിത്രമാണിത്. ദൊരസാനി എന്ന ചിത്രത്തിലൂടെ 2019 ല്‍ ആയിരുന്നു ആനന്ദ് ദേവരകൊണ്ടയുടെ സിനിമാ അരങ്ങേറ്റം. മിഡില്‍ ക്ലാസ് മെലഡീസ്, പുഷ്പക വിമാനം, ഹൈവേ എന്നീ ചിത്രങ്ങളിലും അഭിനയിച്ചു. കരിയറിലെ അഞ്ചാമത്തെ ചിത്രമാണ് ബേബി. വൈഷ്ണവി ചൈതന്യയാണ് ചിത്രത്തിലെ നായിക. വിരാജ് അശ്വിന്‍, നാഗേന്ദ്ര ബാബു, ലിറിഷ കുനപ്പറെഡ്ഡി, ഹര്‍ഷ ചെമുഡു, സാത്വിക് ആനന്ദ്, സായ് പ്രസാദ് തുടങ്ങിയവര്‍ മറ്റ് കഥാപാത്രങ്ങളെ അവതരിപ്പിച്ചിരിക്കുന്നു.