‘ഹലോ യുകെ, അയ്യപ്പൻ വരുന്നു’, സന്തോഷ വാർത്തയുമായി ഉണ്ണി മുകുന്ദൻ

‘മാളികപ്പുറം’ ഇനി യുകെയിലേക്ക്. ജനുവരി 13ന് ചിത്രം യുകെയിലെ തിയറ്ററുകളിൽ പ്രദർശനത്തിന് എത്തുമെന്ന് നടൻ ഉണ്ണി മുകുന്ദൻ അറിയിച്ചു. ‘ഹലോ യുകെ, അയ്യപ്പൻ വരുന്നു’, എന്നാണ് റിലീസ് വിവരം പങ്കുവച്ച് ഉണ്ണി മുകുന്ദൻ കുറിച്ചത്.

ജനുവരി ആറിന് മാളികപ്പുറത്തിന്റെ തെലുങ്ക്, തമിഴ് പതിപ്പുകൾ റിലീസിന് എത്തിയിരുന്നു. ജിസിസി, യുഎഇ എന്നിവിടങ്ങളിലും ചിത്രത്തിന്റെ പ്രദർശനം തുടരുകയാണ്. ഇവിടങ്ങളിലും മികച്ച പ്രേക്ഷക പ്രതികരണങ്ങളാണ് ചിത്രത്തിന് ലഭിച്ചു കൊണ്ടിരിക്കുന്നത്.

2022 ഡിസംബർ 30നാണ് ഉണ്ണി മുകുന്ദന്‍ നായകനായി എത്തിയ മാളികപ്പുറം റിലീസ് ചെയ്തത്. കല്യാണി എന്ന എട്ടു വയസ്സുകാരിയുടെയും അവളുടെ സൂപ്പർ ഹീറോ ആയ അയ്യപ്പന്റെയും കഥ പറയുന്ന ചിത്രം സംവിധാനം ചെയ്തിരിക്കുന്നത് നവാഗതനായ വിഷ്ണു ശശി ശങ്കറാണ്.

കാവ്യ ഫിലിം കമ്പനി, ആന്‍ മെഗാ മീഡിയ എന്നീ ബാനറുകളില്‍ പ്രിയ വേണു, നീത പിന്‍റോ എന്നിവരാണ് ചിത്രത്തിന്‍റെ നിര്‍മ്മാണം.സൈജു കുറുപ്പ്, ഇന്ദ്രന്‍സ്, മനോജ് കെ ജയന്‍, രമേശ് പിഷാരടി, സമ്പത്ത് റാം, ദേവനന്ദ, ശ്രീപദ് എന്നിവരും ചിത്രത്തിൽ മറ്റ് പ്രധാന കഥാപാത്രങ്ങളെ അവതരിപ്പിക്കുന്നു. പ്രിയാ വേണുവും നീറ്റ പിന്റോയുമാണ് ചിത്രത്തിന്റെ നിര്‍മ്മാതാക്കള്‍.