നടന്‍ വിശാലിന്റെ വീടിന് നേരെ കല്ലേറ്, സിസിടിവി ദൃശ്യങ്ങൾ പൊലീസിന് കൈമാറി

നടന്‍ വിശാലിന്റെ വീടിന് നേരെ കല്ലേറ്. ചെന്നൈ അണ്ണാനഗറിലുള്ള വീടിന് നേരെ തിങ്കളാഴ്ച ഒരു സംഘം ആളുകളാണ് ആക്രമണം നടത്തിയത്. തിങ്കളാഴ്ച ഒരു സംഘം ആളുകള്‍ വിശാലിന്റെ വീടിന് കല്ലെറിയുകയായിരുന്നു. ആക്രമണത്തില്‍ ബാല്‍ക്കണിയിലെ ഗ്ലാസുകള്‍ തകരുകയും വീടിന് മറ്റ് കേടുപാടുകള്‍ സംഭവിക്കുകയും ചെയ്തു.

മാനേജര്‍ മുഖേന താരം നല്‍കിയ പരാതിയില്‍ പൊലീസ് അന്വേഷണം നടക്കുകയാണ്. മാതാപിതാക്കള്‍ക്കൊപ്പമാണ് താരം അണ്ണാനഗറിലെ വീട്ടില്‍ കഴിയുന്നത്. ചുവന്ന കാറിലെത്തിയ ഒരു സംഘം ആളുകളാണ് ആക്രമണത്തിന് പിന്നിലെന്ന് നടന്‍ പരാതിയില്‍ പറയുന്നു.

സംഭവത്തിന്റെ സിസിടിവി ദൃശ്യങ്ങളും വിശാല്‍ പൊലീസിന് കൈമാറിയിട്ടുണ്ട്. തമിഴ് സിനിമാ താരങ്ങളുടെ സംഘടനയായ നടികര്‍ സംഘത്തിന്റെ ജനറല്‍ സെക്രട്ടറി കൂടിയാണ് വിശാല്‍. ലൈക പ്രൊഡക്ഷന്‍സും വിശാലുമായുള്ള തര്‍ക്കവുമായി ബന്ധപ്പെട്ടുള്ള കേസ് ഇപ്പോള്‍ കോടതിയുടെ പരിഗണനയിലാണ്.

അതേസമയം, എ വിനോദ് കുമാര്‍ സംവിധാനം ചെയ്യുന്ന ‘ലാത്തി’ ആണ് വിശാലിന്റേതായി റിലീസിന് ഒരുങ്ങുന്ന ചിത്രം. ആധിക് രവിചന്ദര്‍ സംവിധാനം ചെയ്യുന്ന ‘മാര്‍ക്ക് ആന്റണി’യും താരത്തിന്റെതായി അണിയറയില്‍ ഒരുങ്ങുന്നുണ്ട്. ഷൂട്ടിംഗിനിടെ പരിക്ക് പറ്റി വിശാല്‍ വിശ്രമത്തിലായതിനാല്‍ ചിത്രീകരണം നിര്‍ത്തി വച്ചിരിക്കുകയാണ്.